ސިޔާސީ މަސްރަހުގައި ކައުންސިލްތަކުގެ ދައުރު ފުޅާކުރުމުގެ މަގުސަދުގައި އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ފަސްވަނަ ކޮންގްރެސްގެ ހަވާސާގައި ބޭއްވި އިންވެސްޓްމަންޓް ފޯރަމާ ގުޅޭގޮތުން އެމްޑީޕީގެ ކުރީގެ ރައީސް އަދި ކުރީގެ ފޮރިން މިނިސްޓަރު އަބްދުﷲ ޝާހިދު މީސް މީޑިއާގައި ކުރެއްވި ޕޯސްޓެއްގައި ވިދާޅުވީ، ގައުމަކަށް ބޭރުގެ އިންވެސްޓްމަންޓްތައް ދަމައިގަތުމަށް ފަހި މާހައުލެއް ގާއިމުވެފައި އޮތުމަކީ މުހިންމު ކަމެއް ކަމަށެވެ. އަދި އިންވެސްޓަރުންގެ އިތުބާރު ލިބުމާއެކު، މި ފޯރަމަކީ ކައުންސިލްތަކާއި އިންވެސްޓަރުން ސީދާ ބައްދަލުވެ، ގުޅުން ބަދަހިކުރުމަށް ހުޅުވާލެވުނު މުހިންމު މަސައްކަތެއް ކަމަށް އޭނާ ފާހަގަކުރެއްވިއެވެ.
މި ފޯރަމްގެ މުހިންމުކަމުގެ މައްޗަށް އަލިއަޅުވާލައްވަމުން އެމްޑީޕީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު ވިދާޅުވީ، އަތޮޅުތަކުގެ ޖަޒީރާ ރަށްރަށުގެ ރައްޔިތުން އަސާސީ ޚިދުމަތްތަކާއި އިގުތިސޯދީ ބޭނުންތަކަށް މާލެއަށް ހިޖުރަކުރަންޖެހޭ ސަބަބުތައް ނައްތާލައި، ސީދާ ރަށްރަށުގައި އިގުތިސޯދީ ހަރަކާތްތައް ފުޅާކުރުމަކީ އަމާޒެއް ކަމަށެވެ. ލާމަރުކަޒީ އުސޫލުން ކައުންސިލްތަކުން އަމިއްލައަށް މަޝްރޫއުތައް ރާވައި ތަންފީޒުކުރުމުގެ މުހިންމުކަން ފާހަގަކުރައްވަމުން، ޕާޓީގެ ޕްރޮޖެކްޓް އޮފީހާއި ކައުންސިލްތައް ގުޅިގެން ކުރެވުނު މަސައްކަތުގެ ތެރެއިން ވިޔަފާރީގެ 100 މަޝްރޫއެއް މިހާރު އެކުލަވާލެވި ހުށަހެޅިފައިވާކަން ނަޝީދު ހާމަކުރެއްވިއެވެ.
ޑިމޮކްރަސީ ވަރުގަދަވާނީ ރައްޔިތުން ފުދުންތެރިވެ، ގައުމުގެ އިގުތިސޯދު ހަރުދަނާވެގެން ކަމަށް ބުނެ، އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ން މާލެ ސިޓީ ކައުންސިލްގެ ގޯތި ތެރޭގައި ކުރިއަށްދިޔަ މި ފޯރަމަކީ ރަށްރަށުގެ ކައުންސިލްތަކަށް އިގުތިސޯދީ ފުދުންތެރިކަން ހޯދައިދިނުމާއި، ސީދާ އިންވެސްޓަރުންނާ ގުޅުވައިދިނުމުގެ މަގުސަދުގައި ބޭއްވި 300 މިލިއަން އެމެރިކާ ޑޮލަރުގެ އަގުހުރި ހަރަކާތެކެވެ. މި ފޯރަމްގައި ރާއްޖޭގެ 32 ރަށަކުން 76 އިންވެސްޓްމަންޓް ފުރުސަތެއް ވަނީ ހުޅުވާލާފައެވެ.
މި ހަރަކާތަކީ އެމްޑީޕީގެ ޗެއާޕާސަންކަމާ ކުރީގެ ރައީސް މުހައްމަދު ނަޝީދު ހަވާލުވެވަޑައިގަތުމަށްފަހު އުފެއްދެވި "އިންޓަ-ލޯކަލް ކައުންސިލް ޕްރޮޖެކްޓް ޑިވެލޮޕްމަންޓު އޮފީސް" ގެ ބެލުމުގެ ދަށުން އިންތިޒާމުކުރި ފޯރަމެކެވެ. ލޯކަލް ކައުންސިލް އިންތިޚާބުގައި ގިނަ ސިޓީތަކާއި ރަށްރަށުގެ މެޖޯރިޓީ އިދިކޮޅު ޕާޓީން ހޯދާފައިވަނިކޮށް، ސަރުކާރުން ކައުންސިލްތަކުގެ ބާރުތައް ހަނިކުރަމުންދާ ކަމަށް ބުނެ، ސީދާ ކައުންސިލްތަކުން އިގުތިސޯދީ މަޝްރޫއުތައް ހިންގުމަށް ވަނީ އަމާޒުހިފާފައެވެ.
ރައީސް ނަޝީދު ވިދާޅުވީ، ރަށްރަށުގެ ރައްޔިތުން މާލެ އަންނަންޖެހޭ ސަބަބުތައް ރަށުގައި ފުރިހަމަ ކޮށްދީ، ރަށްރަށުގެ އިގުތިސޯދު ކުރިއަރުވަން ބޭނުންވާ ކަމަށެވެ. އަދި ޕާޓީގެ ޕްރޮޖެކްޓް އޮފީހުން ކުރި މަސައްކަތުން ކައުންސިލްތަކުން 100 އަށްވުރެ ގިނަ ވިޔަފާރި މަޝްރޫއު ހުށަހަޅާފައިވާކަން އޭނާ ފާހަގަކުރެއްވިއެވެ.
"އެމްޑީޕީގެ ޕްރޮޖެކްޓު ޑިޕާޓުމަންޓުގެ އަމާޒަކީ ރަށްރަށުގައި ހިނގާ އާމްދަނީ ލިބޭ މަސައްކަތްތައް، އެ މަސައްކަތްތައް ވިޔަފާރިއަކަށް ބަދަލުވެގެން، ވިޔަފާރީގެ އުސޫލުން ނަފާ ލިބިގެން، ފައިދާ ލިބިގެން ހިންގޭނެ ގޮތްތަކެއް ކައުންސިލްތަކަށް ހޯދައިދިނުން،" ރައީސް ނަޝީދު ވިދާޅުވިއެވެ.
ޕާޓީގެ ޕްރޮޖެކްޓު އޮފީހުގެ ޑިރެކްޓާ ޖެނެރަލް އަދި ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވީ، ކައުންސިލްތަކާއެކު ފީސަބިލިޓީ ސްޓަޑީސް ހެދުމާއި ފައިނޭންސިން ހޯދުމުގެ މަސައްކަތް ކުރިއަށްދާނެ ކަމަށެވެ. އަދި އަމާޒަކީ ކައުންސިލްތަކުން އަމިއްލައަށް ރަށުގެ ތަރައްގީ ލީޑުކުރުން ކަމަށް އޭނާ ވިދާޅުވިއެވެ.
މި ފޯރަމްގައި ހުށަހެޅުނު މަޝްރޫއުތަކުގެ ތެރޭގައި ޓޫރިޒަމާއި، މަސްވެރިކަމާއި، ދަތުރުފަތުރާއި، ކުނި މެނޭޖުކުރުމާއި، ދަނޑުވެރިކަމުގެ އިތުރުން އިއާދަކުރަނިވި ހަކަތައިގެ ދާއިރާގެ މަޝްރޫއުތައް ހިމެނެއެވެ. އެގޮތުން އައްޑޫ ސިޓީން މެރިން ރިސާޗު ފެސިލިޓީއަކާއި ކޮންވެންޝަން ސެންޓަރާއެކު ހޮޓަލެއް ތަރައްގީކުރުން ހުށަހެޅިއިރު، ތިނަދޫ ސިޓީން ވަނީ ބޯޓުޔާޑަކާއި، މަސް ގަނޑުކޮށް ބަންދުކުރާ ފެސިލިޓީއެއްގެ އިތުރުން ސީޕޯޓާއި އެއާޕޯޓު މަޝްރޫއެއް ހުށަހަޅާފައެވެ.
އޭގެ އިތުރުން، ފުވައްމުލައް ސިޓީގެ "ބްލޫ ކާބަން" މަޝްރޫއާއި، އދ. މަހިބަދޫގެ ކޮންޓެއިނާ އެކުއަކަލްޗާ، ބ. ކިހާދޫގެ ބަޔޯމާސް އުފެއްދުން، ފ. މަގޫދޫގެ ޕޯލްޓްރީ ފާމް، ގއ. ކަނޑުހުޅުދޫގެ ފަހެލާ ރަށު ގައި މެރިކަލްޗާ ކުރިއެރުވުން، އަދި ށ. ކޮމަންޑޫގައި އިއްސާއި އިހި ފާމްކުރުމުގެ މަޝްރޫއުތައް ހިމެނެއެވެ. ގޭގޭގައި ސޯލާ ޕެނަލް ހަރުކުރުމުގެ މަޝްރޫއުތަކަކީވެސް ގިނަ ރަށްރަށުން ހުށަހެޅި މުހިންމު ކަންކަމެވެ.
މި ހަރަކާތަކީ ލާމަރުކަޒީ ނިޒާމު ހަރުދަނާކޮށް، ސަރުކާރަށް އެކަނި ބާސާނުވެ، ސީދާ ކައުންސިލްތަކަށް އާމްދަނީ ލިބޭނެ މަގުތައް ފަހިކޮށްދިނުމުގެ މައިގަނޑު ސްޓްރެޓެޖީގެ ދަށުން ކުރިއަށްދިޔަ ފޯރަމެކެވެ.
