ބެލްޖިއަމްގެ ސިޓީއެއްގައި ކުރިން ރާ އުފެއްދި ކާރުޚާނާއެއް ހުރި ބިމެއްގައި ނަރުދަމާ ހޮޅި ވަޅުލުމުގެ މަސައްކަތް ކުރަމުންދިޔަ ކޮންސްޓްރަކްޝަން މަސައްކަތްތެރިންނަށް، ގާތްގަނޑަކަށް 10.4 މިލިއަން އެމެރިކާ ޑޮލަރުގެ ރަން ބިސްކޯދާއި ރަން ފައިސާފޮތިތަކެއް ފެނިއްޖެއެވެ.
އިމާރާތުގެ ފައުންޑޭޝަންގެ ބައެއް ނަގައިގެން، ނަރުދަމާ ނިޒާމު ގުޅާލުމަށްޓަކައި ބިންގަނޑު ކޮނުމުގެ ތެރޭގައި ފެނުނު މި ރަންތައް ހުރީ ފާރުގެ އެތެރޭގައި ފޮރުވައި ސިމެންތި ޖަހައި ބަންދުކޮށްފައެވެ.
މި ޚަޒާނާ އެންމެ ފުރަތަމަ ފެނުނު އުމުރުން 18 އަހަރުގެ ކޯބީ ނަމަކަށް ކިޔާ މަސައްކަތްތެރިޔާ ބެލްޖިއަމްގެ ވީއާރުޓީ ނޫހަށް މައުލޫމާތު ދެމުން ބުނީ، އެންމެ ފުރަތަމަ ފެނުނު ފައިސާފޮތިތަކަކީ އާދައިގެ 1 ޔޫރޯގެ ފައިސާފޮތިތަކެއް ކަމަށް ހީކުރެވުނު ކަމަށެވެ. ނަމަވެސް އިތުރަށް ކޮންނަމުން ދިޔަވަރަކަށް، ސިމެންތި ފާރުގެ ތެރޭގައި ފޮރުވާފައި ހުރި ބޮޑެތި ރަން ބިސްކޯދުތަކާއި ގިނަ އަދަދެއްގެ ރަން ފައިސާފޮތިތައް ފެންނަން ފެށި ކަމަށް އޭނާ ބުންޏެވެ.
"އަހަރެމެންނަށް އެންމެ ފުރަތަމަ ލިބުނީ ބޮޑު ޝޮކެއް، ޤަބޫލުކުރަންވެސް ދަތިވި. ކޮންސްޓްރަކްޝަން ސައިޓަކުން މިފަދަ ރަން ޚަޒާނާއެއް ފެންނާނެ ކަމަކަށް އެއްވެސް މީހަކު އުންމީދެއް ނުކުރާނެ،" ކޯބީ ބުންޏެވެ. އޭނާ އިތުރަށް ބުނެފައިވަނީ، އެ ފައިސާ ވަގަށް ނެގުމަށް ކުޑަކޮށް ޚިޔާލަށްއައި ނަމަވެސް، އެއީ ގާނޫނީ ގޮތުން ކުށަކަށް ވުމުގެ އިތުރުން 9 މިލިއަން ޔޫރޯ ފޮރުވައިގެން ގެންގުޅުމަކީ ވާނެ ކަމެއް ނޫންކަން ވިސްނުމުން ސަރުކާރުގެ ކަމާބެހޭ ފަރާތްތަކަށް އެންގީ ކަމަށެވެ.
މި ހާދިސާއާ ގުޅިގެން ޕްރޮޖެކްޓް ލީޑަރު މާރިއޯ ބުނީ، މަސައްކަތްތެރިން "ރަން ފެނިއްޖެއޭ" ކިޔައި ހީގަތް އަޑަށް ގޮސް ބެލިއިރު، އެއީ ހަގީގަތުގައިވެސް ބޮޑު ރަން ޚަޒާނާއެއްކަން އެނގުމުން އުފަލުން އުޅެވުނު ގޮތްވެސް ނޭނގުނު ކަމަށެވެ. އޭނާ ވަނީ އަމިއްލަ އަތުން އެ ރަން ބިސްކޯދުތަކުގައި ހިފައި، އޭގެ ހަގީގީ އަގު ވަޒަންކުރެވުނު ކަމަށް ބުނެފައެވެ.
މަސައްކަތްތެރިން ވަގުތުން ފުލުހުންނަށް މައުލޫމާތު ދިނުމުން، ޑެންޑަރމޮންޑޭ ސިޓީގެ ފުލުހުން ވަނީ އެ ސަރަހައްދަށް ގޮސް، 50 އަށްވުރެ ގިނަ ރަން ބިސްކޯދާއި ގިނަ އަދަދެއްގެ ރަން ފައިސާފޮތިތައް ނަގައި، ކެޓަލޮގް ކުރުމަށްފަހު ސަރުކާރުގެ ރައްކާތެރި ސެކިއުރިޓީ ޚަޒާނާއަކަށް ބަދަލުކޮށްފައެވެ.
ފުލުހުން ވަނީ ސޯޝަލް މީޑިއާގައި މި ރަންތަކުގެ ފޮޓޯތައް އާންމުކޮށް، އެ ސަރަހައްދަކީ ނުރައްކާތެރި ވަޅުގަނޑުތައް ހުރި ކޮންސްޓްރަކްޝަން ސައިޓަކަށްވާތީ، ރަން ހޯދުމުގެ ނިޔަތުގައި އާންމުން އެތަނަށް ނުދިއުމަށް އިލްތިމާސްކޮށްފައެވެ. އަދި އެ ސަރަހައްދުގައި ހުރި ރަން މިހާރު ރައްކާތެރިކަމާއެކު ނެގިފައިވާ ކަމަށްވެސް ފުލުހުން ބުނެފައިވެއެވެ.
އިމާރާތުގެ ވެރިފަރާތުގެ ތަރުޖަމާނު ވިދާޅުވީ، މި ރަންތަކަކީ ކުރީގެ ޣައިރުޤާނޫނީ ކަމަކުން ނުވަތަ އޮޅުވާލުމެއްގެ ތެރެއިން ހޯދައި ފޮރުވާފައިވާ ތަކެތި ކަމަށް ބެލެވޭތީ، މީގެ ހަގީގީ ވެރިފަރާތް ހޯދުމުގެ ތަހުގީގު ފުލުހުން މިހާރު ދަނީ ކުރަމުންނެވެ. މަސައްކަތްތެރިން އުންމީދު ކުރަނީ މި މުއާމަލާތުގެ ތެރެއިން ގާނޫނީ ގޮތުން އެމީހުންނަށް ލިބެންޖެހޭ ހޯދި ފަރާތަށް ލިބެންވާ އިނާމު ލިބޭނެ ކަމަށެވެ.
