މާލެ ސަރަހައްދު ގުޅުވާލަދިން އެންމެ އުމްރާނީ ބޮޑު މަޝްރޫއު، ސިނަމާލެ ބްރިޖު ބިނާކުރުމުގެ އެންމެހައި މުހިންމު ނިންމުންތަކާއި ސިޔާސީ މަޝްވަރާތައް ކުރިއަށްދިޔައީ ރައީސް އޮފީހުގެ ސީދާ ބެލުމުގެ ދަށުން ކަމަށާއި، އޭރު ހައުސިން މިނިސްޓަރަކަށް ހުންނެވި މިހާރުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް އެ މަޝްރޫއުގެ އެއްވެސް ކްރެޑިޓެއް ނުނެންގޭވޭނެ ކަމަށް ކުރީގެ ރައީސް އަބްދުއްﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.
ޕީޕަލްސް ނެޝަނަލް ފްރަންޓް (ޕީއެންއެފް) އިން ބޭއްވި ސިޔާސީ ޖަލްސާއެއްގައި ވާހަކަފުޅު ދައްކަވަމުން ރައީސް ޔާމީން ވަނީ، ސިނަމާލެ ބްރިޖު ފަރުމާކުރުމާއި އިސްކޮށް އުޅުއްވި އިންޖިނިއަރެއްގެ ގޮތުގައި ރައީސް މުއިއްޒު ސިފަކުރައްވައި ދައްކަވާ ވާހަކަތަކަށް އިންކާރު ކުރައްވާފައެވެ. އެމަނިކުފާނު ވިދާޅުވި ގޮތުގައި، ސަރުކާރުން މިހާރު ގެންދަނީ އެ މަޝްރޫއާ ގުޅޭ ހަގީގަތްތައް އޮޅުވާލައި، އާންމުންގެ މެދުގައި ކަންކަން އޮތްގޮތް ބަދަލުކޮށް ދެއްކުމަށް މަސައްކަތް ކުރަމުންނެވެ.
"އަޅުގަނޑު ހަމަ ވަރަށް ސާފުކޮށް ދިވެހި ރައްޔިތުންނަށް މި ދަންނަވަނީ، ހައުސިން މިނިސްޓަރަކަށް މުއިއްޒު އޭރު ހުންނެވި ނަމަވެސް ބްރިޖުގެ އެއްވެސް މުހިންމު ކަމެއްގައި އެމަނިކުފާނުގެ ހިއްސާއެއް ނެތް،" ރައީސް ޔާމީން ވިދާޅުވި އެވެ.
އެމަނިކުފާނު ތަފްސީލުކޮށްދެއްވި ގޮތުގައި، މާލެ އާއި ހުޅުލެ ގުޅުވާލަދިން އެ ބްރިޖު އެޅުމުގެ މައިގަނޑު މަޝްވަރާތައް އެންމެ ފުރަތަމަ ފެށުނީ ޗައިނާގެ ރައީސް ޝީ ޖިންޕިންއާއެކު އެމަނިކުފާނު ބޭއްވެވި ރަސްމީ ބައްދަލުކުރެއްވުމެއްގައެވެ. އޭގެ ފަހުން، އެ މަޝްރޫއުގެ ފަންނީ އަދި އިގްތިސާދީ އެންމެހައި ނިންމުންތައް ނިންމީ ރައީސް އޮފީހުގެ އިގްތިސާދީ ކައުންސިލް ގައެވެ. އަދި އޭރު އެ ކައުންސިލްގެ އިސް ބޭފުޅެއްގެ ގޮތުގައި އުޅުއްވީ އޭރުގެ ނައިބު ރައީސް އަހުމަދު އަދީބު ކަމަށާއި، ޑރ. މުއިއްޒަކީ އެ ކައުންސިލްގައި ހިމެނިވަޑައިގެންނެވި ބޭފުޅެއްވެސް ނޫން ކަމަށް ޔާމީން ފާހަގަކުރެއްވި އެވެ.
މީގެއިތުރުން، ސިނަމާލެ ބްރިޖަކީ މުޅިންވެސް ޗައިނާ ސަރުކާރުގެ ތަޖުރިބާކާރުންނާއި ބޭރުގެ އިންޖިނިއަރުންގެ އެހީތެރިކަމާއެކު ކުރިއަށްގެންދިޔަ މަޝްރޫއެއް ކަމަށާއި، ދިވެހި އިންޖިނިއަރުންގެ ދައުރަކީ އެކަންކަމުގައި އެހީތެރިވުން އެކަނި ކަމަށް ވިދާޅުވެ، ރައީސް މުއިއްޒަކީ ބްރިޖުގެ "އާކިޓެކްޓް" ކަމަށް ދައްކާ ވާހަކަތަކަށް އެމަނިކުފާނު ވަނީ ރައްދު ދެއްވާފައެވެ.
ރައީސް ޔާމީންގެ ވާހަކަފުޅުގައި، މިހާރު ކުރިއަށްދާ ތިލަމާލެ ބްރިޖުގެ މަޝްރޫއަށް އަލިއަޅުއްވާލައްވައި، ސަރުކާރުގެ އިސްވެރިންނަށް ފާޑުވިދާޅުވި އެވެ. ނިމިދިޔަ އެމްޑީޕީ ސަރުކާރުގައި އިންޑިއާގެ އެހީގައި ފެށި އެ މަޝްރޫއުގެ މަސައްކަތް ބައްލަވާލެއްވުމަށް ރައީސް މުއިއްޒާއި ކެބިނެޓް ވަޒީރުން ބްރިޖު މަތީގައި ހިނގަވާފައިވާތީ އެކަމަށް އިޝާރާތް ކުރައްވައި ވިދާޅުވީ، "ރީތިކޮށް ނަލަހެދިގެން ގޮސް ހިނގާލުން ނޫން ކަމެއް މިހާރު ސަރުކާރަށް ކުރެވެން ނެތް" ކަމަށެވެ.
