އެމެރިކާގެ ކަނޑުގެ ސިފައިންގެ ނިއުކްލިއާ ބާރުން ހިންގާ މަތިންދާބޯޓު އުފުލާ މަނަވަރު 'ޔޫއެސްއެސް އަބްރަހަމް ލިންކަން' އާއެކު އެމެރިކާ 5,000 ސިފައިން ތައިލޭންޑުގެ ޕަޓާޔާއަށް ބަނދަރުކުރުމަށް ތައްޔާރުވަމުންދާތީ، އެ ސަހަރުގައި ހަށިވިއްކުމުގެ ވިޔަފާރިކުރާ ފަރާތްތަކާއި ނާސިގެތަކާ ދެކޮޅަށް ތައިލޭންޑުގެ ކަމާބެހޭ އިދާރާތަކުން ހާއްސަ އޮޕަރޭޝަނެއް ފަށައިފިއެވެ. އީރާނާ ދެކޮޅަށް މެދުއިރުމަތީގައި ހިންގި އަސްކަރީ ހަރަކާތްތަކުގައި ބައިވެރިވުމަށްފަހު، ކަނޑުމަތީގައި 250 އަށްވުރެ ގިނަ ދުވަސް ހޭދަކޮށްފައިވާ މި މަނަވަރުގެ ސިފައިންނަށް ޗުއްޓީ ދިނުމުގެ ގޮތުން ޕަޓާޔާ ކައިރީގައިވާ ލޭމް ޗަބޭންގް ބަނދަރަށް ކައިރިކުރުމަށް ހަމަޖެހިފައިވަނީ ސެޕްޓެމްބަރު 2 އިން 6 އަށެވެ.
ތައިލޭންޑުގެ ޤާނޫނުތައް ބުނާގޮތުން ހަށިވިއްކުމަކީ މަނާކަމެއް ކަމެކެވެ. ނަމަވެސް، ޕަޓާޔާ ފަދަ ފަތުރުވެރިންގެ މަގުބޫލު ސަރަހައްދުތަކުގައި އެކަން ފުޅާ ދާއިރާއެއްގައި ހިނގައެވެ. ނަމަވެސް އެމެރިކާ ސިފައިން އައުމުގެ ކުރިން ފުލުހުން ހިންގި ހާއްސަ އޮޕަރޭޝަންތަކުގައި ހަށިވިއްކުމުގެ ތުހުމަތުގައި 50 އަށްވުރެ ގިނަ މީހުން ވަނީ ބަންދުކޮށްފައެވެ. މީގެ ތެރޭގައި ތައިލޭންޑުގެ ރައްޔިތުންގެ އިތުރުން އެހެން ގައުމުތަކުގެ އަންހެނުންވެސް ހިމެނެއެވެ. ޕަޓާޔާގެ އޮފިޝަލުންނާއި ފުލުހުން ސިފައިންގެ ސެކިއުރިޓީ ކަންކަން ރޭވުމަށް ބައްދަލުވުންތައް ބޭއްވިއިރު، ސިފައިންނަށް މަސްތުވާ ތަކެތި ވިއްކާ ތަންތަނަށް ދިއުމާއި، ވަކި ގަޑިތަކެއްގެ ފަހުން ނައިޓް ކްލަބްތަކުގައި ތިބުން ވަނީ މަނާކޮށްފައެވެ.
މެދުއިރުމަތީގެ ހަންގުރާމައާ ގުޅިގެން ޕަޓާޔާގެ ފަތުރުވެރިކަމަށް އައިސްފައިވާ މަޑުޖެހުމަށް، 5,000 ސިފައިންގެ ޒިޔާރަތާއެކު ބޮޑު އިގްތިސާދީ ދިރުމެއް ލިބޭނެކަމަށް އެ ސަހަރުގެ ވިޔަފާރިވެރިން އުއްމީދުކުރެއެވެ. ކޮންމެ ސިފައިންގެ މީހަކު ދުވާލަކު 30 އާއި 90 އެމެރިކާ ޑޮލަރާ ދެމެދުގެ އަދަދެއް ހަރަދުކުރާނެ ކަމަށް ލަފާކުރެވޭއިރު، މިއީ އެ ސަހަރުގެ ވިޔަފާރިތަކަށް ލިބޭނެ ބޮޑު ކުރިއެރުމެކެވެ. ނަމަވެސް، ގިނަ އަދަދެއްގެ މީހުން އެއްވެ އުޅުމުގެ ސަބަބުން ކަސްބީ ވިޔާފާރި ހިންގުމާއި އެޗްއައިވީ ފަދަ ސިއްހީ ނުރައްކާތައް އިތުރުވެދާނެތީ ޖަމުއިއްޔާ ތަކުން ވަނީ ކަންބޮޑުވުން ފާޅުކޮށްފައެވެ.
