މަގުތަކުގައި ތޮއްޖެހުން ކުޑަކުރުމަށާއި އުޅަނދުފަހަރު ގިނަވުން ކޮންޓްރޯލްކުރުމުގެ ސްޓްރެޓެޖީގެ ދަށުން، އަމިއްލަ ފަރުދުންނާއި ޤާނޫނީ ޝަހުޞުތަކުގެ ނަމުގައި އެއް އުޅަނދަށްވުރެ ގިނައިން ރަޖިސްޓަރީކޮށްގެން އުޅަނދު ގެންގުޅޭ ފަރާތްތަކުގެ އަތުން އަހަރަކު އެއްފަހަރު "މަލްޓިޕަލް އޯނާޝިޕް ފީ" ނެގުމަށް އެއްގަމު ދަތުރުފަތުރުގެ ޤާނޫނަށް ގެނައި އިޞްލާޙަކުން ކަނޑައަޅައިފިއެވެ.
މި ގެނެވުނު އިޞްލާޙުގެ 99 ވަނަ މާއްދާގައިވާ ގޮތުން، އަމިއްލަ ބޭނުމަށް އެއް ބާވަތެއްގެ އެއް އުޅަނދަށްވުރެ ގިނައިން ނުވަތަ ދެ ބާވަތަކުން ވިޔަސް އިންޖީނުލީ ދެ އުޅަނދަށްވުރެ އިތުރަށް އުޅަނދެއް ރަޖިސްޓަރީކުރާ ނަމަ، މި ޚާއްޞަ ފީ ދެއްކުން ލާޒިމުވާނެއެވެ. މި ޤާނޫނަށް ތަޞްދީޤުކުރާ ތާރީޚުން ފެށިގެން ހަ މަސްދުވަހުގެ މުހުލަތެއް ދިނުމަށްފަހު ފީ ނަގަން ފަށާއިރު، ފީގެ މިންވަރު ކަނޑައެޅުމުގައި ބަލާނީ އުޅަނދުގެ އިންޖީނު ކެޕޭސިޓީ (ސީސީ) އަށެވެ.
މި އިޞްލާޙުގައި މަލްޓިޕަލް އޯނާޝިޕް ފީ ނެގުމަށް މައިގަނޑު ދެ ކެޓަގަރީއެއް ވަނީ އެކުލަވާލާފައެވެ.
- އެއީ ސައިކަލާއި އިންޖީނުލީ ބައިސްކަލުގެ ކެޓަގަރީގެ އިތުރުން ހަތަރު ފުރޮޅުލީ އުޅަނދުފަހަރާއި މުދާ އުފުލާ އުޅަނދުތަކުގެ ކެޓަގަރީއެވެ.
ސައިކަލުތަކުން ފީ ނަގާނެ ރޭޓްތަކަށް ބަލާއިރު،
- ސައިކަލު: 50 ސީސީ ހަމަނުވާ – 360 ރުފިޔާ
- ސައިކަލު: 50 – 100 ސީސީ – 720 ރުފިޔާ
- ސައިކަލު: 100 – 150 ސީސީ – 1،296 ރުފިޔާ
- ސައިކަލު: 150 – 200 ސީސީ – 2،304 ރުފިޔާ
- ސައިކަލު: 200 – 400 ސީސީ – 12،960 ރުފިޔާ
- ސައިކަލު: 400 ސީސީއަށްވުރެ މަތި – 17،280 ރުފިޔާ
- ކާރު / ޖީޕް / ވޭން (4 ފުރޮޅުލީ) – 4،320 – 22،480 ރުފިޔާ
- މުދާ އުފުލާ އުޅަނދު (ބަރުދަނަށް ބަލައި) – 3،600 – 15،000 ރުފިޔާ
މިފަދަ އިޞްލާޙެއް ގެނައުމުގެ މައިގަނޑު މަޤްޞަދަކީ ރަށްތަކާއި ޚާއްޞަކޮށް މާލެ ސަރަޙައްދުގެ މަގުތަކުގައި ތޮއްޖެހުން ބޮޑުވެ، އުޅަނދުފަހަރު ގިނަވުމުގެ ސަބަބުން ކުރިމަތިވާ ތިމާވެއްޓާއި އިޖުތިމާއީ މައްސަލަތަކަށް ޙައްލެއް ހޯދުމެވެ. ސަރުކާރުން ބާރުއަޅަނީ އަމިއްލަ ވެހިކަލްތައް އިންތިހާއަށް ގިނަކުރުމުގެ ބަދަލުގައި، އާންމު ދަތުރުފަތުރުގެ ނިޒާމު ބޭނުންކުރުމުގެ ވިސްނުން އިސްކުރުމަށެވެ.
