އެމެރިކާގެ މިނެސޯޓާ ސްޓޭޓްގެ މިނިއާޕޮލިސްގެ ޑައުންޓައުން ސަރަހައްދުގައި ދިން ބަޑީގެ ހަމަލާތަކެއްގައި ތިން މީހުން މަރުވެއްޖެއެވެ. އޭގެ ތެރޭގައި ހަމަލާދިން ކަމަށް ތުހުމަތުކުރެވޭ މީހާވެސް ހިމެނެއެވެ. މި ހާދިސާގައި ފުލުހުންގެ ތިން އޮފިސަރަކަށް ވަނީ އެކި ވަރުގެ އަނިޔާތައް ލިބިފައެވެ.
ހަމަލާދިން ކަމަށް ތުހުމަތުކުރެވޭ މީހާ މަރުވި ސީދާ ސަބަބު އަދި ސާފެއް ނުވެއެވެ. ނަމަވެސް، ހާދިސާ ހިންގި ސަރަހައްދަށް ފުލުހުން ދިޔައިރު ގިނަ ބަޔަކަށް ބަޑީގެ ހަމަލާތައް އަމާޒުވެފައިވާ ކަމަށާއި، އޭގެ ތެރޭގައި ފުލުހުންގެ އޮފިސަރުންވެސް ހިމެނޭ ކަމަށް ބުނެއެވެ.
މި ހާދިސާއާ ގުޅިގެން ޖުމްލަ ހަތް މީހަކު އެ ހޮސްޕިޓަލަށް ގެންގޮސްފައިވެއެވެ. އަދި ބަޑީގެ ހަމަލާތަކުގައި ބޮޑެތި ޒަޚަމްތަކެއް ލިބުނު ތިން މީހަކަށް ކުއްލި އޮޕަރޭޝަންތަކެއް ވަނީ ކޮށްފައެވެ.
މި ހާދިސާއާ ގުޅިގެން އެމެރިކާގެ އިސް ސިޔާސީ ފަރާތްތަކުން ވަނީ ކަންބޮޑުވުން ފާޅުކުރައްވާފައެވެ. މިނެސޯޓާގެ އެޓާނީ ޖެނެރަލް ކީތު އެލިސަން މި ހަމަލާ ސިފަކުރެއްވީ "ނުހަނު ބިރުވެރި" އަމަލެއްގެ ގޮތުގައެވެ. އަދި މިނެސޯޓާގެ ކޮންގްރެސް މެންބަރު އިލްހާން އުމަރު ވަނީ އަނިޔާވި ފަރާތްތަކަށާއި އެމީހުންގެ އާއިލާތަކަށް ތައުޒިޔާ ފޮނުއްވާފައެވެ.
މި ހާދިސާއާ ގުޅިގެން ކައިރީގައިވާ ޔުނިވަރސިޓީ އޮފް ސެއިންޓް ތޯމަސްގެ ކޭމްޕަސް ވަގުތީ ގޮތުން ބަންދުކުރި ނަމަވެސް، މިނިއާޕޮލިސް ސިޓީގެ އިދާރާއިން މިހާރު ވަނީ އެ ސަރަހައްދު ފުރިހަމައަށް ސިފައިންގެ ކޮންޓްރޯލްގެ ދަށަށް ގެނެވިފައިވާ ކަމަށާއި، އާންމުންނަށް އިތުރު ނުރައްކަލެއް ނެތް ކަމަށް އިއުލާނުކޮށްފައެވެ.
