ބަންގްލަދޭޝްގެ ވެރިރަށް ޑާކާގެ ވައިނުސާފުވެ މިއަދު ހެނދުނު ދުނިޔޭގެ އެންމެ ތަޣައްޔަރުވެފައިވާ ސަރަހައްދުތަކުގެ ލިސްޓުގެ 6 ވަނަ މަރުކަޒަށް އަރައިފިއެވެ. މިއަދު ހެނދުނު 8:31 ގައި ރެކޯޑުކުރެވުނު ގޮތުން، ޑާކާގެ އެއާ ކޮލިޓީ އިންޑޭކް (އޭކިއުއައި) ސްކޯ ހުރީ 166ގައެވެ.
އޭކިއުއައިގެ މިންގަނޑުތައް ދައްކާގޮތުން، 151 އާއި 200 އާ ދެމެދުގެ އަދަދަކީ ސިއްހަތަށް "ގެއްލުންހުރި" މިންވަރެކެވެ. މީގެ މާނައަކީ ވައިގެ ތަޣައްޔަރުވުން ހުރި މިންވަރުގެ ސަބަބުން އާންމު އާންމުންގެ ސިއްހަތަށް ނުރައްކާތަކެއް ކުރިމަތިވެދާނެ ކަމެކެވެ.
މިއަދުގެ ޑޭޓާއަށް ބަލާއިރު، އިންޑިއާގެ ވެރިރަށް ނިއުދިއްލީއާއި އެހެނިހެން ސަރަހައްދުތައް ހިމެނޭ ގޮތަށް ސަރަހައްދީ މައިދާން ގައި ވައިގެ ފެންވަރު ދަނީ ކަންބޮޑުވާ މިންވަރަކަށް ދަށަށް ދަމުންނެވެ. މިއަދުގެ ރޭންކިންގައި އެންމެ މަތީގައި އުޅެނީ އިންޑިއާގެ ކަލްކަޓާއެވެ. އެ ސަރަހައްދުގެ އޭކިއުއައި ސްކޯ 187 ގައި ހުރިއިރު، ދެވަނައިގައި އޮތީ ސިންގަޕޫރެވެ. އަދި ވިއެޓްނާމްގެ ހެނޯއި ވަނީ 178 ގެ ސްކޯއަކާއެކު ތިންވަނައިގައެވެ.
ބަންގްލަދޭޝްގައި ވައިގެ ފެންވަރު މިންކުރަނީ ވައި ތަޣައްޔަރުކުރާ މައިގަނޑު ފަސް މާއްދާއަކަށް ބަރޯސާވެގެންނެވެ. އޭގެ ތެރޭގައި ޕީއެމް10 އަދި ޕީއެމް2.5 ގެ ކުދި ޒައްރާތަކާއި، ނައިޓްރޮޖެން ޑޮއޮކްސައިޑާއި، ކާބަން މޮނޮކްސައިޑާއި، ސަލްފަރ ޑޮއޮކްސައިޑް އަދި އޯޒޯން ހިމެނެއެވެ. ޑާކާގައި ފާއިތުވި އަހަރުތަކުގައިވެސް ވައިގެ ތަޣައްޔަރުވުމުގެ މައްސަލަތައް ކުރިމަތިވަމުންދާއިރު، އާންމުގޮތެއްގައި ފިނި މޫސުމުގައި ވައިގެ ފެންވަރު ވަރަށް ބޮޑަށް ދަށަށް ގޮސް، ވިއްސާރަ މޫސުމުގައި ތަންކޮޅެއް ރަނގަޅުވާކަން ފާހަގަކުރެވެއެވެ.
ދުނިޔޭގެ ސިއްހަތު ޖަމްއިއްޔާ (ޑަބްލިއުއެޗްއޯ) ގެ ލަފާކުރުންތައް ދައްކާގޮތުން، ވައިގެ ތަޣައްޔަރުވުމުގެ ސަބަބުން ކޮންމެ އަހަރަކު މުޅި ދުނިޔެއިން ގާތްގަނޑަކަށް ހަތް މިލިއަން މީހުން މަރުވެއެވެ. މިފަދަ މަރުތައް މައިގަނޑުގޮތަކަށް މެދުވެރިވަނީ ސްޓްރޯކްޖެހުމާއި، ހިތުގެ ބަލިތަކާއި، ނޭވާލާ ނިޒާމުގެ ދިގުދެމިގެންދާ ބަލިތަކާއި، ފުއްޕާމޭގެ ކެންސަރުގެ އިތުރުން ނޭވާލާ ނިޒާމަށް ޖެހޭ ނުރައްކާތެރި އިންފެކްޝަންތަކުގެ ސަބަބުންނެވެ.
