ސްރީލަންކާގެ އާ ރައީސް އަނޫރާ ކުމާރާ ޑިސަނާޔަކަ ރައީސްކަމުގެ ހުވައި ކުރައްވައިފިއެވެ. މުހައްލިލުން ދެކޭ ގޮތުގައި ޑިސަނާޔަކަގެ ކާމިޔާބީއަކީ ގިނަ ދުވަސްތަކެއް ވަންދެން ސްރީލަންކާއަށް ކުރިމަތިވެފައިވާ ކޮރަޕްޝަނާއި ކްރޮނިޒަމްއާ ދެކޮޅު ހެދުމުގެ ގޮތުން މީހުން ލާފައިވާ ވޯޓެއް ކަމަށެވެ.
ހޮނިހިރު ދުވަހު ބެއްވި އިންތިޚާބަކީ 2022 ވަނަ އަހަރު އިގްތިސާދާ މެދު ހިތްހަމަ ނުޖެހުމުން ގިނަ ބަޔަކު މުޒާހަރާތަކަށް ނިކުމެ ކުރީގެ ރައީސް ގޮޓަބަޔާ ރާޖަޕަކްސާ ވެރިކަމުން ދުރުކުރި ފަހުން ބާއްވާފައިވާ ފުރަތަމަ އިންތިޚާބެވެ.
“އައު ސާފު ސިޔާސީ ސަގާފަތެއް ގާއިމް ކުރަން ޖެހޭ،” ޑިސަނާޔަކަ ވިދާޅުވި އެވެ. “މިކަން ހާސިލް ކުރުމަށް އަޅުގަނޑު ވައުދުވަން. ސިޔާސީ ނިޒާމަށް ރައްޔިތުންގެ އިހުތިރާމާއި އިތުބާރު އަނބުރާ ހޯދުމަށް ކުރެވެން އޮތް ހުރިހާ މަސައްކަތެއް ކުރާނަން.”
އޭކޭޑީގެ ނަމުން މަޝްހޫރު އުމުރުން 55 އަހަރުގެ ޑިސަނާޔަކަ ވިދާޅުވީ “ލީޑަރަކަށް ވޯޓުލުމަކުން ޑިމޮކްރެސިއަށް ކުރާ ދަތުރެއް ނުނިމޭނެ” ކަމަށެވެ.
“ޑިމޮކްރަސީ ހަރުދަނާ ކުރަން ޖެހޭ. ޑިމޮކްރަސީ ރައްކާތެރި ކުރުމަށް ކުރެވެން އޮތް ހުރިހާ މަސައްކަތެއް ކުރަން ވައުދުވަން،” އޭނާ ވިދާޅުވި އެވެ.
“ކުރިން ވެސް ދެންނެވިން އަޅުގަނޑަކީ ޖާދޫގަރެއް ނޫން ކަމަށް – އަޅުގަނޑަކީ އާދައިގެ ރައްޔިތެއް. އަޅުގަނޑަށް އެނގޭ އަދި ނޭނގޭ ކަންތައްތަކެއް އެބަހުރި. އަޅުގަނޑުގެ އަމާޒަކީ މި ގައުމު ނެގެހެއްޓުމަށް އެހީތެރިވެދޭނެ ޢިލްމާއި ހުނަރު ހުރި މީހުން އެއްތަންކުރުން.”
ޑިސަނާޔަކަ ހުވައި ކުރެއްވި ރަސްމިއްޔާތުގައި ބުޑިސްޓުންނާއި މުސްލިމުންނާއި ހިންދޫދީނާއި ކްރިސްޓިއަން ދީނުގެ މަންދޫބުން ވެސް ބައިވެރިވެވަޑައި ގަތެވެ.
މި ރަސްމިއްޔާތުގެ ކުރިން ނެރުނު ބަޔާނެއްގައި ޑިސަނާޔަކަ ވިދާޅުވީ ސިންގަޅަ، ތަމަޅަ، މުސްލިމުން އަދި ހުރިހާ އެންމެނާއެކު ސްރީލަންކާގެ އެއްބައިވަންތަކަމަށް މި ފެށީ އާފެށުމެއް ކަމަށެވެ.
ކެމްޕޭންގެ ތެރޭގައި ޑިސަނާޔަކޭ ވަނީ ވޯޓުލާ މީހުންނަށް ހެޔޮވެރިކަމެއް ކޮށްދެއްވާނެ ކަމަށާއި ކޮރަޕްޝަނާ ދެކޮޅަށް ހަރުކަށި ފިޔަވަޅުތައް އަޅުއްވާނެ ކަމަށް ވައުދުވެ ވަޑައިގެންފަ އެވެ.
އުފެއްދުންތެރިކަމާއި ދަނޑުވެރިކަމާއި އައިޓީ ދާއިރާތައް ކުރިއަރުވަން ވައުދުވެވަޑައިގެންނެވިއެވެ. އަދި އިގްތިސާދީ ދަތިކަމުން ސަލާމަތް ކުރުމަށް އިންޓަނޭޝަނަލް މަނިޓަރީ ފަންޑާ އެކު ހެދި އެއްބަސްވުން ކުރިއަށް ގެންދިއުމަށް ވެސް އޭނާ ވަނީ ވައުދުވެފަ އެވެ.
ސްރީލަންކާގެ ބޮޑުވަޒީރު ދިނޭޝް ގުނަވަރްދަނާ ވަނީ ޑިސަނާޔަކަ ހުވާކުރެއްވުމުގެ ކުރިން، އިސްތިއުފާ ދެއްވާފައެވެ. އެއާއެކު ޕާލަމެންޓް އުވާލައްވާނެއެވެ. އަދި ކުރިން ދެއްވި އިންޓަވިއުއެއްގައި ޑިސަނާޔަކަ ވަނީ އިންތިޚާބުވެވަޑައިގަތުމަށްފަހު މާގިނަ ދުވަހެއް ނުވެ ޕާލަމެންޓް އުވާލާނެ ކަމުގެ އިޝާރާތެއް ދެއްވާފައެވެ.
“ރައްޔިތުން އެދޭ ގޮތާ ނުގުޅޭ މަޖިލީހެއް ކުރިއަށް ގެންދިއުމުގެ ބޭނުމެއް ނެތް،” އޭނާ ވިދާޅުވި އެވެ.
ޑިސަނާޔަކަ އިންތިޚާބު ކާމިޔާބު ކުރެއްވީ ޖުމްލަ 5،740،179 ވޯޓާއެކު ކަމަށެވެ. ދެވަނައިގައި އޮތީ 4،530،902 ވޯޓާއެކު އިދިކޮޅު ލީޑަރު ސާޖިތު ޕްރޭމަދާސާ އެވެ. ރައީސް ރަނިލް ވިކްރަމަސިންހަ އޮތީ ތިންވަނާގައެވެ.
ވިކްރަމަސިންހަ ވަނީ ޑިސަނާޔަކައަށް ތަހުނިޔާ ވިދާޅުވެ ފައެވެ.
“މި ލޮބުވެތި ގައުމަށް ވަރަށް ބޮޑަށް ލޯތްބާއި އިހުތިރާމާއެކު، ގައުމުގެ މުސްތަގުބަލު އާ ރައީސްއާ ހަވާލުކުރަން” ވިކްރަމަސިންހަ ވިދާޅުވިއެވެ.
ޑިސަނާޔަކަގެ ޕާޓިއަކީ 1970 އާއި 80 ގެ އަހަރުތަކުގައި ސްރީލަންކާގެ ސަރުކާރާ ދެކޮޅަށް ހަތިޔާރު އެޅި ދެ ހަމަލައެއް ދިން މާކްސިސްޓް ޖަނަތާ ވިމުކްތީ ޕެރަމުނާ (ޖޭވީޕީ) އެވެ. ޑިސަނާޔަކޭގެ ގުޅިފައިވާ ޕާޓީތައް މަޝްހޫރުވެފައި ވަނީ ނޭޝަނަލް ޕީޕަލްސް ޕަވަރ ގެ ނަމުންނެވެ.
ޑިސަނާޔަކޭ ވަނީ ފާއިތުވި އަހަރުތަކުގައި އޭނާގެ ޕާޓީގެ ހަރުކަށި ވާތު ފިޔައިގެ ސިޔާސީ ފިކުރު މެދުމިނަށް ގެންދިއުމަށް ވެސް މަސައްކަތްތަކެއް ކުރައްވާފަ އެވެ.
