އެންޓިކޮރަޕްޝަން ކޮމިޝަނާއި އިލެކްޝަންސް ކޮމިޝަންގެ ރައީސާއި ނާއިބް ރައީސް މެމްބަރުންގެ ތެރޭން ހޮވުމުގެ ބަދަލުގައި އެ ދެ މުއައްސަސާގެ މަތީ ދެ މަޤާމަށް ރައްޔިތުންގެ މަޖިލީހުން ފާސްކުރާ ނަންތަކެއް ރައީސުލްޖުމްހޫރިއްޔާ އައްޔަނު ކުރާ ގޮތަށް ހަމަޖެއްސުމަށް ގާނޫނަށް އިސްލާހެއް ހުށަހަޅައިފިއެވެ.
ރައްޔިތުންގެ މަޖިލީހަށް ހުށަހަޅާފައިވާ މި ބިލުތަކުގައި ކަނޑައަޅާފައިވާ ގޮތުން އޭސީސީއާއި އީސީގެ ރައީސް ނުވަތަ ނާއިބު ރައީސަކު އައްޔަން ކުރުމަށް ބޭނުންވާ ކޮންމެ ފަހަރަކު، އެ މުއައްސަސާތަކަށް އައްޔަނުކޮށްފައިވާ މެންބަރުންގެ ތެރެއިން މީހެއް ނުވަތަ މީހުންގެ ނަން ރައީސުލްޖުމްހޫރިއްޔާ ރައްޔިތުންގެ މަޖިލީހަށް ހުށަހަޅަންވާނެއެވެ. މަޖިލީހަށް ހުށަހަޅާ ނަންތަކުގެ ތެރެއިން މަޖިލީހުން ފާސްކުރާ މީހަކު، ކޮމިޝަންގެ ރައީސްކަމުގެ މަޤާމަށް ނުވަތަ، ނާއިބު ރައީސް ކަމުގެ މަޤާމަށް ރައީސް އައްޔަންކުރަން ބިލުގައި ލާޒިމު ކުރެއެވެ.
ސަރުކާރުގެ ފަރާތުން އެންޓި-ކޮރަޕްޝަން ކޮމިޝަންގެ ޤާނޫނަށް ހުށަހަޅާ އިސްލާޙު ތައާރަފް ކޮށްދެއްވީ ފެލިދޫ ދާއިރާގެ މެންބަރު އާދަމް ޒާހިރު އެވެ. އަދި އިލެކްޝަންސް ކޮމިޝަންގެ ޤާނޫނަށް އިސްލާޙު ތައާރަފް ކޮށްދެއްވީ ކެލާ ދާއިރާގެ މެންބަރު އަބްދުﷲ ޝަރީފެވެ.
މިއިސްލާހުތަކުގެ މަގްސަދަކީ، މުސްތަޤިއްލު މުއައްސަސާތަކުގެ މަތީ މަގާމުތަކަށް ބޭފުޅުން އައްޔަން ކުރުން އެއްގޮތް ކޮށް، ހިންގުން ހަރުދަނާކޮށް، އުސޫލުތައް އެއްހަމަ ކުރުން ކަމަށް ސަރުކާރުން ބުނެއެވެ.
