ސަބަބުވެރި ސިކުނޑިއަކުން ސުއާލު އުފައްދާ ފަދަ ހާލަތްތަކެއް އޮތް އިރު، ބޮންޑެޑް ވެއާރހައުސްއިން ސިގިރޭޓު ބޭރު ކުރި މީހުން ދޫކޮށްލައިފިއެވެ.
މޭމަހުގެ 6 ވަނަ ދުވަހު، ފުލުހުން ފެނިގެން ބޮޑުރަސްގެފާނު މަގުމައްޗަށް ތިން ބިދޭސިއަކު އެއްލައިލީ، 221 އަށް ވުރެން ގިނަ ކާޓަން ސިގިރޭޓެވެ. ތިން މީހުންނަކީ ވެސް ބަނގްލަދޭޝް 3 މީހުންނެވެ. ސައްހަ ވިސާއެއްގައި އުޅޭ މީހުންނަކީ ސީނިއާ އިންޓަރނޭޝަނަލް ޕްރައިވެޓް ނަމަކަށް ކިޔާ ކުންފުންޏެވެ. މީޑިއާ ރިޕޯޓުތައް ބުނަނީ މިއީ ލޯޓަސް ފިހާރަ ހިންގާ، ކުންފުނި ކަމަށެވެ.
ސީރިއަސް މައްސަލައެއްގެ ގޮތުގައި އެއިރު ފުލުހުން ބެލިކަމަށް ބުނާ މައްސަލާގެ ސީރިއަސްކަން މިއަދު ކުޑަވެއްޖެއެވެ.
އެއިރު ފުލުހުން ބުނީ، ކަސްޓަމްސްއިން ބޮންޑެޑް ވެއާހައުސެއް ގޮތުގައި ބޭނުންކުރާ ގުދަނަކުން ގެއްލިފައިވާ ސިގިރޭޓުތަކެއް ކަމަށް ތަހުގީގަށް އެނގިފައިވާ ކަމަށެވެ. އަދި އެ މައްސަލަ ބަލަމުންދަނީ، ޖިނާއީ ބޮޑު މައްސަލައެއްގެ ގޮތުގައި ކަމަށެވެ.
ކުރިން ބުނިއެތި ކެންސަލްވާފަދަ ވާހަކައެއްގައި، މިތިން މީހުން ވަނީ ބަންދުން ދޫކޮށްލާފައެވެ. ދިހަ ދުވަސްވަންދެން ބަންދުގައި ގެންގުޅުނު އިރު، ސިގިރޭޓު ގެއްލުނު ކަމަށް ރިޕޯޓުކޮށްފައި ނުވާތީއެވެ.
މިމައްސަލާގައި ކުރާނެ ސުއާލުތަކެއް އެބަހުއްޓެވެ. އެންމެ ފުރަތަމަ ސީރިއަސް މައްސަލައެއްގެ ގޮތުގައި އެ މައްސަލަ ބެލީ، ގުދަނަކުން ސިގިރޭޓު ގެއްލިގެންނެވެ. އެ ގެއްލުނު ކަމަށް ނިންމައި ތަހުގީގު ފެށީ ކީއްވެގެން ހެއްޔެވެ؟
އަނެއް ސުއާލަކީ، ގެއްލުނު ކަމަށް ރިޕޯޓު ކޮށްފައި ނެތް ކަމަށް މިހާރު ބުނާ ވާހަކައެވެ. ބޮންޑެޑް ވެއާހައުސްއިން އެ ސިގިރޭޓު ނެރެފައިވަނީ ޑިއުޓީ ދައްކި ފަހުން ހެއްޔެވެ؟ އެއަށް ޑިއުޓީއެއް ދައްކާފައި ވޭހެއްޔެވެ؟
ބޮޑު މައްސަލައެއް ކަމަށް އިޝްތިހާރުކޮށްފައި، ދޯހަޅި ގޮތަކަށް ދުއްވާލާއިރު ކޮޅު ބެދޭގޮތަށް ސުއާލުތަކަށް ޖަވާބުތަކެއްވެސް ހުންނަން ޖެހޭނެއެވެ.
