އޮސްޓްރޭލިއާގެ ލޭބަރ ސަރުކާރުން ފަލަސްޠީނުގެ މިނިވަން ދައުލަތް ގަބޫލުކުރުމަށް ތައްޔާރުވަމުންދާ ކަމަށް ބުނެފިއެވެ. މިކަމާ ގުޅޭ ގޮތުން ވަރަށް އަވަހަށް ސަރުކާރުން އިއުލާނެއް ނެރޭނެ ކަމަށް ބުނެއެވެ.
މި ނިންމުމަކީ އިނގިރޭސިވިލާތް، ފްރާންސް އަދި ކެނެޑާ ފަދަ ގައުމުތަކާ އެއް ސަފެއްގައި އޮސްޓްރޭލިއާ ހިމެނިގެންދާނެ ނިންމުމެކެވެ. މިއީ ޣައްޒާގައި އިސްރާއީލުން ހިންގަމުންދާ ހޮލޮކޯސްޓްގެ ހަރަކާތްތަކުން ދެ ދައުލަތުގެ ހައްލަށް ހުރަސްއެޅޭ ކަމުގެ ކަންބޮޑުވުން އިތުރުވަމުންދާ ދަނޑިވަޅެއްގައި އަންނަ ބަދަލެކެވެ.
އޮސްޓްރޭލިއާގެ މި ނިންމުމާ ގުޅިގެން އިސްރާއީލުގެ ބޮޑުވަޒީރު ނެތަންޔާހޫ ވަނީ ހަރުކަށި އިބާރާތުން ކެންބަރައަށް ފާޑުކިޔައިފައެވެ. އޭނާ މި ނިންމުމަށް ސިފަކުރީ "ލަދުވެތި" ނިންމުމެއްގެ ގޮތުގައެވެ. އަދި ޣައްޒާގައި ހިންގަމުންދާ އަސްކަރީ ހަރަކާތްތަކަކީ އެކަށީގެންވާ ވަރުގެ ދިފާއީ ފިޔަވަޅެއް ކަމަށް ވެސް އޭނާ ވަނީ ބުނެފައެވެ.
މި ދަނޑިވަޅަކީ ޔަހޫދީންނާއި ހަމާސްއާ ދެމެދު ތިންވަނަ ހަނގުރާމަ ހުއްޓުމަކަށް ގެނައުމުގެ މަސައްކަތް ޖުލައި މަހު ނާކާމިޔާބުވެފައިވާ ދަނޑިވަޅެކެވެ. އަދި ޣައްޒާގައި ހަމާސްގެ މެހުމާނުންގެ ގޮތުގައި ތިބި ހަނގުރާމައިގެ އަސީރުންގެ 20 އަށް ވުރެ ގިނަ މީހުން ބަދަލުކުރުން ނުވަތަ މިނިވަން ކުރުމުގެ މައްސަލައަށް ވެސް އަދި ހައްލެއް ލިބިފައެއް ނުވެއެވެ.
އޮސްޓްރޭލިއާގެ ބޮޑުވަޒީރު އެންތަނީ އަލްބަނީޒް އަދި ނިއުޒިލެންޑުގެ ބޮޑުވަޒީރު ކްރިސްޓޮފަރ ލަކްސަން ވަނީ އިސްރާއީލުގެ ހޮލޮކޯސްޓާ މެދު އަލުން ވިސްނުމަށް ގޮވާލައްވައިފައެވެ. އަދި އިސްރާއީލުން މިހާރު އަމަލުކުރަމުންދާ ގޮތަކީ ބައިނަލްއަގުވާމީ ގާނޫނުތަކާ ހިލާފު ކަމެއް ކަމަށް ވިދާޅުވެ އެ ދެ ލީޑަރުން ވަނީ އިންޒާރުދެއްވާފައެވެ.
