އިޒްރޭލުގެ ބޮޑުވަޒީރު ބެންޖަމިން ނެތަންޔާހޫ ނޯވޭއަށް ވަދެއްޖެނަމަ އޭނާއާ ދެކޮޅަށް ނެރެފައިވާ ބައިނަލްއަޤްވާމީ ހައްޔަރު އަމުރު ތަންފީޒުކުރާނެ ކަމަށް ނޯވޭގެ ޑެޕިއުޓީ ފޮރިން މިނިސްޓަރު އެންޑްރިއަސް ކްރާވިކް ވިދާޅުވެއްޖެއެވެ.
އަލްޖަޒީރާއަށް ދެއްވި ޚާއްސަ ބަޔާނެއްގައި ކްރާވިކް ވިދާޅުވީ، ޣައްޒާގައި އިޒްރޭލުން ހިންގާ ޖެނޮސައިޑަކީ އެ ސަރަހައްދުގެ ރައްޔިތުންނާ ދެކޮޅަށް ހިންގަމުންދާ "ނަސްލު ފޮހެލުމުގެ" ޢަމަލުތަކެއް ކަމަށެވެ.
އިތުރަށް ވާހަކަފުޅު ދައްކަވަމުން އޭނާ ފާހަގަކުރެއްވި ގޮތުގައި، އިޒްރޭލުން ސްކޫލްތަކާއި ނޫސްވެރިންނަށް އަމާޒުކޮށް ހަމަލާދެމުންދާކަން ނޯވޭއިން ވަނީ އަބަދުވެސް ފާހަގަކޮށްފައެވެ. އަދި މިއީ ޤަބޫލުކުރެވޭނެ ކަމެއް ނޫން ކަމަށްވެސް އޭނާ ވިދާޅުވިއެވެ.
މި ވާހަކަތަކަކީ ޣައްޒާގައި ހިނގަމުންދާ އިންސާނީ ނަސްލު ފަނާކޮށްލުމުގެ މައްޗަށް ބައިނަލްއަޤްވާމީ މުޖުތަމަޢުގެ ކަންބޮޑުވުން އިތުރުވަމުންދާ ދަނޑިވަޅެއްގައި ދައްކަވާފައިވާ ވާހަކައެކެވެ. އަދި މިއީ އިޒްރޭލުގެ ޢަމަލުތަކާ ދެކޮޅަށް ބައިނަލްއަޤްވާމީ ފެންވަރުގައި އަޑުއުފުލަމުންދާ ޤައުމުތަކުގެ ސަފަށް ނޯވޭއިން ގުޅިފައިވާކަން ދައްކުވައިދޭ ބަޔާނެކެވެ.
