މެލޭޝިއާގައި އެންމެ ދިގު މުއްދަތަކަށް ވެރިކަން ކުރެއްވި ޑރ. މަހާތީރު މުހައްމަދު، އެމަނިކުފާނުގެ 100 ވަނަ އުފަން ދުވަހާ ދިމާކޮށް، ޣައްޒާގައި އިސްރާއީލުން ހިންގަމުންދާ އަސްކަރީ ޖެނޮސައިޑްގެ ޢަމަލުތަކަކީ ނަސްލު ފޮހެލުމުގެ ޢަމަލުތަކެއް ކަމަށް ވިދާޅުވެ، މި ޢަމަލުތައް އަންނާން އޮތް ޖީލުތަކުން ހަނދާން ކުރާނޭ ކަމަށް ވިދާޅުވެއްޖެއެވެ.
"ޣައްޒާގައި ހިނގަމުންދާ ކަންތައްތަކަކީ ވަރަށް ނުރައްކާތެރި ކަންތައްތަކެއް. އެމީހުން މަރަމުން ދަނީ މާބަނޑު އަންހެނުންނާއި، އަލަށް އުފަންވާ ކުދިންނާއި، ޒުވާނުންނާއި، އަންހެން ފިރިހެން ކުދިންނާއި، ބަލިމީހުންނާއި، ފަގީރުން… މިފަދަ ކަންތައްތައް ހަނދާން ނައްތާލެވޭނީ ކިހިނެއްތޯ؟" މަހާތީރު އަލްޖަޒީރާއަށް ވިދާޅުވިއެވެ.
ހޮލޯކޯސްޓާއި ބޮސްނިއާގެ ހަނގުރާމައާ އަޅާކިޔުއްވަމުން، ނަސްލު ފޮހެލުމުގެ ވޭނުން އުފަންވި ޤައުމަކުން އެހެން ބަޔަކަށް އެފަދަ ވޭނެއް ދިނުމަކީ ޤަބޫލުކުރެވޭ ކަމެއް ނޫން ކަމަށް މަހާތީރު ވިދާޅުވިއެވެ. "އެފަދަ ވޭނެއް ތަހައްމަލުކުރި ބަޔަކު އެހެން ބަޔަކަށް އެފަދަ ވޭނެއް ދޭން ބޭނުންވާނެ ކަމަކަށް އަޅުގަނޑު ނުދެކެން،" އެމަނިކުފާނު ވިދާޅުވިއެވެ.
100 އަހަރުގެ އުމުރުފުޅުގައިވެސް، މަހާތީރު ގެންދަވަނީ ދުވަހުން ދުވަހަށް ލިޔުއްވުމުގެ މަސައްކަތާއި ކަސްރަތު ކުރައްވައި، އަދި ދުނިޔޭގެ ކަރަންޓް އެފެއާޒްގެ ކަންކަމުގައި ޝާމިލުވެ ވަޑައިގަންނަވަމުންނެވެ. މަހާތީރު ވިދާޅުވީ، ދެ ދައުލަތުގެ ހައްލަކަށް އެމަނިކުފާނު ތާއީދު ކުރައްވާ ކަމަށާއި، ނަމަވެސް އެކަން ޙަޤީޤަތަކަށްވާ ތަން ފެނިވަޑައި ނުގަންނަވާނެ ކަމަށް ޤަބޫލުފުޅު ކުރައްވާ ކަމަށެވެ.
މީގެއިތުރުން، ޗައިނާގެ ތަރައްގީއާ ބެހޭގޮތުން ވާހަކަފުޅު ދައްކަވަމުން، ވިދާޅުވީ، ކުރިއަށް އޮތް 10 އަހަރުގެ ތެރޭގައި ޗައިނާއިން އެމެރިކާ ޖަހައި ކުރި އަރައިގެން ދާނެ ކަމަށެވެ. އަދި ރައީސް ޑޮނަލްޑް ޓްރަމްޕްގެ އިޤްތިޞާދީ ސިޔާސަތުތަކަށް ފާޑުވިދާޅުވެ، މަތީ މުސާރައާއި ހަރުދަނާ ނޫން ގޮތް ގޮތަށް ގައުމު ހިންގުމުގެ ސަބަބުން ސިނާއީ މަސައްކަތް އެމެރިކާއަށް ބަދަލުކުރުމަށް ޓްރަމްޕް ގެންގުޅޭ ސިޔާސަތު ނާކާމިޔާބުވާނެ ކަމަށް އިންޒާރު ދެއްވިއެވެ.
