އަފްޣާނިސްތާނުގެ ސަރުކާރުން ބުނާ ގޮތުގައި ޕާކިސްތާނައެކު ބޯޑަރުގައި ހިނގި ހަމަލަތައް ބަދަލު ކުރުމުގައި ޕާކިސްތާންގެ 58 ސިފައިންނާއި އަފްޣާނު ސިފައިންގެ 9 މީހަކު މަރުވެއްޖެއެވެ. މި ހަމަލާތައް ފެށުނީ ބުރާސްފަތި ދުވަހުގެ ރޭ ޕާކިސްތާނުން ކާބޫލްގައި ދިން ވައިގެ ހަމަލައަށް ބަދަލު ހިފުމުގެ ގޮތުންނެވެ.
ޕާކިސްތާނުން ސީދާ ވައިގެ ހަމަލަ ދިން ކަމަށް ބުނެފައި ނުވިނަމަވެސް، އަފްޣާނިސްތާނުގެ ސަރަހައްދުން ޕާކިސްތާނަށް ދޭ ޓެރަރިސްޓް ހަމަލާތަކުން ދިފާއުވުމުގެ ހައްގު އިސްލާމްއާބާދަށް އޮތް ކަމަށް ބުނެއެވެ. ސައޫދީ އަރަބިއްޔާ، އީރާން އަދި ގަތަރުން ވަނީ ދެ ގައުމަށް ހިމޭން ވުމަށް ގޮވާލާފައެވެ.
ޕާކިސްތާނުގެ ބޯޑަރު ސަރަހައްދުގައި ހަރުކަށި ޓެރަރިސްޓް އަމަލު އިތުރުވެފައިވަނީ 2021 ގައި އަފްޣާނިސްތާނުން އެމެރިކާގެ ސިފައިން ފައިބައިގެން ދިޔަ ފަހުން ޠާލިބާން ސަރުކާރ ާހަވާލު ވުމުންނެވެ. ޓެރަރިސްޓް ޖަމާއަތެއް ކަމަށްވާ ޕާކިސްތާނު ޠާލިބާން (ޓީޓީޕީ) ޖަމާއަތުން ޕާކިސްތާނުގެ ފުލުހުންނާއި ސިފައިންނަށް ދޭ ހަމަލާތައް މިއަހަރު އިތުރުވެފައި ވެއެވެ، އަދި މިއަހަރަކީ ވޭތުވެދިޔަ 10 އަހަރާ އަޅާ ބަލާއިރު އެންމެ ގިނަ މީހުން މަރުވި އަހަރެވެ.
ޖެނުއަރީ މަހުން ސެޕްޓެމްބަރު 15 އާ ހަމައަށް ހިނގި ހަމަލާތަކުގައި 311 ސިފައިންނާއި 73 ފުލުހުން މަރުވެފައި ވެއެވެ. އަދި 500 އަށްވުރެ ގިނަ އާންމު ރައްޔިތުން މަރުވެފައި ވެއެވެ. ޓީޓީޕީ ހުއްޓުވުމަށް އަފްޣާނު ސަރުކާރަށް އިސްލާމްއާބާދުން ގޮވާލުމުން އެއްވެސް ކަމެއް ހާސިލު ވެފައި ނުވާ ކަމަށް ޕާކިސްތާނުގެ ޑިފެންސް މިނިސްޓަރު ވަނީ ވިދާޅުވެފައެވެ.
