ރޮނާލްޑޯ: "އަހަރެންނަކީ ސަޢޫދީ މީހެއްއެއް"،

ޕޯޗުގަލްގެ މަޝްހޫރު ފުޓުބޯޅަ ކުޅުންތެރިޔާ ކްރިސްޓިއާނޯ ރޮނާލްޑޯ ވަނީ އޭނާގެ ހިތުގައި ސަޢޫދީ އަރަބިއްޔާއަށް ޚާއްޞަ މަޤާމެއް ދެވިފައިވާކަން ހާމަކޮށް، އޭނާ އަމިއްލައަށް ސަޢޫދީ މީހެއްގެ ގޮތުގައި ދެކޭކަމަށް ބުނެފައެވެ. ރޮނާލްޑޯ މިކަން ހާމަކުރީ ސަޢޫދީ އަރަބްގެ ވެރިރަށް ރިޔާޟްގައި ބޭއްވި "ޓޫރިސް 2025″ ފޯރަމްގައި ވާހަކަ ދައްކަމުންނެވެ. އޭނާ ބުނީ ސަޢޫދީ އަރަބްގެ ޤާބިލުކަން ގަބޫލުކޮށްގެން އެ ޤައުމުގައި ދިރިއުޅެން ބަދަލުވީ ކަމަށެވެ.

ރޮނާލްޑޯ ބުނީ އޭނާ އަމިއްލަ ނަފްސު ސަޢޫދީ މީހެއްގެ ގޮތުގައި ދެކޭ ކަމަށާއި، އެގޮތުން އެކި ސެކްޓަރުތަކަށް އެހީތެރިވަމުންދާ ކަމަށެވެ. އަދި ރިޔާޟަށް ބަދަލުވުމަށް ނިންމުން ނިންމިއިރު އޭނާ ހުރީ ރަނގަޅަށް ކަން މިހާރު އެންމެންނަށް އެނގިފައިވާނެ ކަމަށްވެސް އޭނާ ފާހަގަކުރިއެވެ. ސަޢޫދީގެ އަލްޢުލާ ސިޓީއާއި ރެޑް ސީ ޕްރޮޖެކްޓަށް ވަރަށް ގަޔާވާ ކަމަށާއި، އެ ޤައުމުގެ ތަރައްޤީގެ ބިޔަ މަޝްރޫޢުގެ ބައެއްގެ ގޮތުގައި ވާން ބޭނުންވާ ކަމަށްވެސް ބުންޏެވެ. އޭނާ ވަނީ ސަޢޫދީ އަރަބްގެ ތަރައްޤީގެ މަޝްރޫޢުގެ ޢަޒުމަށް ތައުރީފް ކޮށްފައެވެ.

މިދިޔަ ޖޫން މަހު ރޮނާލްޑޯ ވަނީ އޭނާގެ އުމުރު ގެ ބާކި ބައި ސަޢޫދީގައި ހޭދަކުރަން ރާވާފައިވާކަން ހާމަކޮށްފައެވެ. އަދި އައްނަޞްރު ކްލަބާއެކު ކޮންޓްރެކްޓް އާކުރި އެއް ސަބަބަކީއެއީ ކަމަށް ވެސް ބުންޏެވެ.

އޭނާ ބުނަނީ ސަޢޫދީއަކީ އަމާންކަމާއި ރައްކާތެރިކަން ލިބޭ، ދިރިއުޅެން ވަރަށް މުނާސިބު ޤައުމެއް ކަމަށެވެ. މެންޗެސްޓަރ ޔުނައިޓެޑް ދޫކޮށް 2022 ވަނަ އަހަރު އައްނަޞްރާ ގުޅުނު ރޮނާލްޑޯ ވަނީ ހުރިހާ މުބާރާތެއްގައި 99 ގޯލު ޖަހާފައެވެ.

އޭނާ ދެކޭ ގޮތުގައި ސަޢޫދީ ލީގަކީ ދުނިޔޭގެ އެންމެ ވަރުގަދަ ފަސް ލީގުގެ ތެރޭގައި ހިމެނޭ ލީގެކެވެ. އަދި ރޮނާލްޑޯ ބުނަނީ 2034 ވަނަ އަހަރު ސަޢޫދީގައި ބާއްވާ ވޯލްޑް ކަޕަކީ ތާރީޚުގައި ބޭއްވޭ އެންމެ ރީތި ވޯލްޑް ކަޕަށް ވާނެ ކަމަށެވެ.

ހިއްސާ ކުރައްވާ!