އުތުރު އަޔަރލެންޑްގެ ބެލްފާސްޓްގައި ހުންނަ ފުލުހުންގެ މަރުކަޒަކަށް ކާރު ބޮމެއް ބޭނުންކޮށްގެން ދިން ހަމަލާއެއްގެ ޒިންމާ ނޭޝަނަލިސްޓް ގްރޫޕެއް ކަމަށްވާ "ނިއު އައިއާރްއޭ" އިން އުފުލުމާ ގުޅިގެން، މީހަކު ހައްޔަރުކޮށްފިއެވެ.
ޕޮލިސް ސާވިސް އޮފް ނޮދަން އަޔަރލެންޑުން އަންގާރަ ދުވަހު ހާމަކުރި ގޮތުގައި، ޔުނައިޓެޑް ކިންގްޑަމްގެ ޓެރަރިޒަމް ގާނޫނުގެ ދަށުން 66 އަހަރުގެ ފިރިހެނަކު ވަނީ ހައްޔަރުކޮށްފައެވެ. އަދި ބެލްފާސްޓްގެ އިރުމައްޗާއި ހުޅަނގުގެ ސަރަހައްދުތައް ފާސްކުރުމުގެ މަސައްކަތް މިހާރުވެސް ދަނީ ކުރިއަށެވެ.
އުތުރު އަޔަރލެންޑްގައި ދިގުލައިދިޔަ ދާހިލީ ހަމަނުޖެހުންތައް ނިމުމަކަށް ގެނައުމަށް ސިޔާސީ އެއްބަސްވުމެއް ގާއިމުކުރިތާ 28 އަހަރު ފަހުން، އަލުން މަސްރަހު ނުތަނަވަސްވާން ވަނީ ފަށާފައެވެ. "ނިއު އައިއާރްއޭ" އަކީ މީގެ ތިން ދަހަރު ކުރިން ގާއިމުކުރި ސުލްހައިގެ އެއްބަސްވުމާ ދެކޮޅު ހަދާ، އަދިވެސް ހަތިޔާރު އެޅި ހަރަކާތްތައް ހިންގާ މަދު ގްރޫޕްތަކުގެ ތެރެއިން އެއް ގްރޫޕެވެ.
މި ޖަމާއަތުން ދެކޮޅު ހަދަނީ 1998 ވަނަ އަހަރުގެ "ގުޑް ފްރައިޑޭ އެގްރީމަންޓް" އަށެވެ. އެ އެއްބަސްވުމުގައިވާ ގޮތުން، ރިޕަބްލިކް އޮފް އަޔަރލެންޑާ ގުޅުމަށް ރައްޔިތުންގެ ފެންނަ ނުފެންނަ ވޯޓަކުން ނިންމައިފި ނަމަ މެނުވީ، އުތުރު އަޔަރލެންޑް އޮންނާނީ ޔުނައިޓެޑް ކިންގްޑަމްގެ ބައެއްގެ ގޮތުގައެވެ. ނިއު އައިއާރްއޭ އިން ދަނީ ފުލުހުންނަށް އަމާޒުކޮށް ހަމަލާތައް އިތުރުކުރަމުންނެވެ. އެގޮތުން މިދިޔަ މަހުވެސް ބެލްފާސްޓުން ބޭރުގައި ހުންނަ ފުލުހުންގެ މަރުކަޒަކަށް ކާރު ބޮމުގެ ހަމަލާއެއް ދޭން ވަނީ މަސައްކަތް ކޮށްފައެވެ.
ފުލުހުންގެ އޮފިސަރުން ދިރިއުޅޭ ގޭގެއަށް އަމާޒުކޮށް ހަމަލާ ދޭން ފަށާފައި ވެއެވެ. އެންމެ ފަހުން އުތުރު އަޔަރލެންޑްގައި ފުލުހަކު މަރާލާފައިވަނީ މީގެ 15 އަހަރު ކުރިންނެވެ.
