ސައުދީ ޕްރޯ ލީގުގެ އިއްތިހާދު ޖިއްދާއިން އެ ޓީމުގެ އާ ކޯޗަކަށް ޖަރުމަނުގެ މަޝްހޫރު ކޯޗު ޔާގަން ކްލޮޕް އައްޔަންކުރުމަށް ޝައުގުވެރިކަން ފާޅުކޮށް، އޭނާ އަލުން ކޯޗިންގެ ދާއިރާއަށް ރުޖޫއަވުމަށް ބާރުއަޅަން ފަށައިފިއެވެ. މި ނިންމުން އައިސްފައިވަނީ ޕޯޗުގަލްގެ ކޯޗު ސާޖިއޯ ކޮންސެއިސާއޯއާއެކު އެ ކްލަބުން ކުރިއަށްގެންދިޔަ މަސައްކަތްތައް ނިމުމަކަށް އައުމާ ގުޅިގެންނެވެ.
ސްޕޯޓް އިޓާލިއާގެ ނޫސްވެރިޔާ ޖިއަންލުއިޖީ ލޮންގާރީ ރިޕޯޓްކޮށްފައިވާ ގޮތުގައި، އިއްތިހާދުގެ މެނޭޖްމަންޓުން މިހާރު ވަނީ ކްލޮޕްއާ ގުޅޭގޮތުން ދިރާސާތައް ފަށާފައެވެ. 2024 ވަނަ އަހަރު ލިވަޕޫލް ދޫކޮށްލުމަށްފަހު ކޯޗިންއާ ދުރުގައި ހުރި ކްލޮޕް، އަލުން ދަނޑުމަތީގެ މަސައްކަތަށް ނެރުމަކީ އެ ކްލަބުގެ ބޮޑު އަމާޒެކެވެ.
ކްލޮޕަކީ ފާއިތުވި ދިހަ އަހަރު ތެރޭގައި ދުނިޔޭގައި އުފެދުނު އެންމެ ކާމިޔާބު އެއް ކޯޗެވެ. އޭނާ ވަނީ ލިވަޕޫލާއެކު 2019 ވަނަ އަހަރުގެ ޗެމްޕިއަންސް ލީގާއި 2020 ވަނަ އަހަރުގެ އިނގިރޭސި ޕްރިމިއާ ލީގު ކާމިޔާބުކޮށްފައެވެ. މީގެ އިތުރުން ގިނަ އަދަދެއްގެ ލޯކަލް ކަޕްތައްވެސް އޭނާ ވަނީ އެ ޓީމަށް ހޯދައިދީފައެވެ.
އިއްތިހާދުން ކްލޮޕަށް ފާރަލަމުންދަނީ އެ ކްލަބުގެ ފަންނީ މަޝްރޫއު އަލުން ބިނާކޮށް، ސަރަހައްދީ އަދި ލޯކަލް މުބާރާތްތަކުގައި ވަރުގަދައަށް ވާދަކުރުމުގެ މަގްސަދުގައެވެ. މިކަމަށްޓަކައި ބޭނުންވަނީ ބައިނަލްއަގުވާމީ ފެންވަރުގައި ބޮޑެތި ތަޖުރިބާތަކެއް ލިބިފައިވާ ކޯޗެކެވެ.
ސައުދީގެ މި ހުށަހެޅުމާ މެދު ކްލޮޕް ދެކޭގޮތުގެ އެއްވެސް ރަސްމީ އިޝާރާތެއް އަދި ލިބިފައި ނުވި ނަމަވެސް، އިއްތިހާދުން އުންމީދު ކުރަނީ އޭނާއަށް އެ ކްލަބުގެ ޕްރޮޖެކްޓް ކަމުދާނެ ކަމަށެވެ. މިއީ މީގެ ކުރިން އިންޓަ މިލާންގެ ކޯޗު ސިމޯން އިންޒާގީ އަލް ހިލާލާ ގުޅުނު ފަދަ ބޮޑު ބަދަލަކަށް ވެގެންދާނެއެވެ.
ޔާގަން ކްލޮޕް މިވަގުތު ހުރީ ރެޑްބުލް ކުންފުނީގެ ގްލޯބަލް ސޮކާ ހެޑްގެ މަގާމުގައެވެ. އެހެންކަމުން އޭނާ އަލުން ކޯޗިން ބެންޗަށް ގެނައުމަކީ އިއްތިހާދަށް ކުރިމަތިވާނެ ބޮޑު ގޮންޖެހުމެކެވެ.
