އެމެރިކާއިން ހުރުމުގައި ހަމަނުޖެހުން އުފެއްދުމުން ތެލުގެ އަގު މައްޗަށް ދިއުމާއި، ދުނިޔޭގެ ބާޒާރުގައި ފްލައިޓްތަކަށް އޮތް ޑިމާންޑް ކުރިން އުންމީދު ކުރިވަރަށްވުރެ ދަށްވުމުގެ ސަބަބުން، 2026 ވަނަ އަހަރުގެ ވޯލްޑް ކަޕަށް ސަޕޯޓަރުން ގެންދިއުމަށް އާޖެންޓީނާގެ ސަރުކާރުގެ އެއާލައިނުން އެ ގައުމުގެ ތިން ސިޓީއަކުން މިއާމީއަށް ކުރަން ހަމަޖެއްސި ޚާއްސަ ފްލައިޓްތަކެއް ކެންސަލްކޮށްފިއެވެ.
އާޖެންޓީނާގެ ގައުމީ އެއާލައިން "އެއިރޯލީނިއަސް އާޖެންޓީނަސް" އިން ވަނީ ކޯޑޮބާ، ރޮޒާރިއޯ އަދި ޓުކުމާން މި ތިން ސިޓީން ވޯލްޑް ކަޕަށް ކުރަން ހަމަޖެއްސި ޚާއްސަ ދަތުރުތައް ހުއްޓާލުމަށް ނިންމާފައެވެ. މިއީ އާންމުކޮށް އެމެރިކާއަށް ސީދާ ފްލައިޓްތައް ނޯންނަ ސިޓީތަކެކެވެ. މި ފްލައިޓްތައް ކުރިން ތާވަލުކޮށްފައި އޮތީ 2026 ގެ ވޯލްޑް ކަޕް ފުޓްބޯޅަ މުބާރާތާ ދިމާކޮށް ޖޫން އަދި ޖުލައި މަހުގައެވެ.
މި ފްލައިޓްތަކަކީ އަސްލު އާޖެންޓީނާގެ އެކި ސަރަހައްދުތަކުގައި ތިބި، މުބާރާތް ބަލަން ދާން ބޭނުންވާ ސަޕޯޓަރުންނަށް ދަތުރުފަތުރު ފަސޭހަކޮށްދިނުމަށް ހަމައްސި ދަތުރުތަކެކެވެ.
ޓިކެޓްގެ އަގުތައް ބޮޑުވުމުގެ ސަބަބުން ދުނިޔޭގެ އެކِ ކޮޅުތަކުން ސަޕޯޓަރުން ޓިކެޓް ގަތުމަށް ފަސްޖެހެމުންދާ ދަނޑިވަޅެއްގައި، މި ކެންސަލްކުރި ފްލައިޓްތަކުގެ މުހިންމުކަން ވަރަށް ބޮޑެވެ. ސަބަބަކީ މިއީ މަޝްހޫރު ތަރި ލިއޮނަލް މެސީގެ ފަހު ވޯލްޑް ކަޕަށް ވުން ވަރަށް ގާތްވުމެވެ. މީގެއިތުރުން، މެސީގެ ކެޕްޓަންކަމުގެ ދަށުން އާޖެންޓީނާއިން ތަށި އުފުލާލި، އެންމެ ފަހުން ގަތަރުގައި ބޭއްވި ވޯލްޑް ކަޕާ އަޅާބަލާއިރު އެމެރިކާއަށް ދަތުރުކުރުން މާ ފަސޭހައެވެ. ގަތަރުގެ މުބާރާތުގައިވެސް އާޖެންޓީނާގެ ގިނަ އަދަދެއްގެ ސަޕޯޓަރުން އެ ގައުމަށް ޒިޔާރަތްކުރިއެވެ.
އެއާލައިނުން ވަނީ އެ ރޫޓްތައް ކެންސަލްކޮށް، އޭގެ ބަދަލުގައި ބުއެނޮސް އައިރިސްގެ އެޒޭޒާ އިންޓަނޭޝަނަލް އެއާޕޯޓް މެދުވެރިކޮށް ކުރާ ދަތުރުތަކަށް ސަމާލުކަން ދޭން ނިންމާފައިވާކަން ކަށަވަރުކޮށްދީފައެވެ. އެއާލައިންގެ އޮފިޝަލުން ވިދާޅުވީ، މި ނިންމުން ނިންމަން ޖެހُނީ ތެލުގެ އަގު "ވަރަށް ބޮޑަށާއި ހުއްޓުމެއްނެތި" މަތިވަމުންދާތީ، އެހެން ސިޓީތަކުން ފަށާ ދަތުރުތަކުން ލިބޭނެ ކަމަށް އުންމީދުކުރި ފައިދާގެ އަންދާޒާތަކަށް ބޮޑު ބަދަލެއް އައުމުންނެވެ.
އެއާލައިނުން އިތުރަށް ބުނިގޮތުގައި، ވެރިރަށުގައި ހުންނަ އެޒޭޒާ އިންޓަނޭޝަނަލް އެއާޕޯޓް މެދުވެރިކޮށް ކުރާ ދަތުރުތައް ފުޅާކުރުމަށް ސަމާލުކަން ދޭނެއެވެ. މީގެތެރޭގައި ވޯލްޑް ކަޕްގެ މުހިންމު ތާރީޚުތަކުގައި އިތުރު ފްލައިޓްތައް ބޭއްވުން ހިމެނެއެވެ. "އެއިރޯލީނިއަސް އާޖެންޓީނަސް" އިން މިހާރުވެސް ދަނީ ބުއެނޮސް އައިރިސް އާއި މިއާމީއާ ދެމެދު ދުވާލަކު ދެ ފްލައިޓް ބާއްވަމުންނެވެ. އަދِ އާޖެންޓީނާގެ ގައުމީ ޓީމު މުބާރާތުގެ ފުރަތަމަ މެޗުތައް ކުޅުމަށް ހަމަޖެހިފައިވާ ޑެލަސް އަދި ކެންސަސް ސިޓީއަށްވެސް ޚާއްސަ ފްލައިޓްތަކެއް ބޭއްވުމަށް ވަނީ ހަމަޖެހިފައެވެ.
