އެއީ ހަމައެކަނި ބޮޑެތި މީހުންނަށް ހާއްސަ، ފުރިހަމަ އަރާމާއި ލަގްޒަރީ ހިދުމަތްތައް ލިބޭ 'ވާޖިން ވޮޔޭޖަސް’ގެ 'ބްރިލިއަންޓް ލޭޑީ' އެވެ. ނަމަވެސް އެ ބޯޓުގެ ހިމޭން ކޮޓަރިއެއްގެ ތެރޭގައި، ހިދުމަތުގެ ނަމުގައި ހިނގަމުން ދިޔައީ އިންސާނީ ކަރާމާތް ގެއްލޭ ފަދަ ނުރައްކާތެރި ޖަރީމާއެކެވެ. އިސްތަށިގަނޑު ރީތިކުރުމުގެ ނަމުގައި ފަސިންޖަރުންނާ ބައްދަލުކުރި ހެއާޑްރެސަރު، މިހާރު ހުރީ ތަހުގީގުގެ ބަންދެއްގެ ދަށުގައެވެ.
އުމުރުން 26 އަހަރުގެ ޕްރަނިތު ނަރަޔަން ޕަވާރ، އެ ބޯޓުގައި މަސައްކަތް ކުރަމުން ދިޔައީ ހެއާޑްރެސަރެއްގެ ގޮތުގައެވެ. ނަމަވެސް އޭނާގެ ހަގީގީ މަގްސަދު މާ ނުރައްކާތެރިއެވެ. އެމެރިކާގެ ވޮޝިންޓަންގެ އެޓާނީ އޮފީހުން ހާމަކުރި ގޮތުގައި، އޭނާ ޚިދުމަތް ހޯދަން އަންނަ އަންހެނުންނަށް މޮޅު ދަޅައެއް ދައްކައެވެ. "ހެއާ ސެލޫންއިން ތިން ފަހަރު ޚިދުމަތް ހޯދުމުން، ހިލޭ މައްސާޖެއް ކޮށްދޭނަން،" މިއީ އޭނާގެ މަޅިއެވެ.
އެލަސްކާއަށް ކުރި ދަތުރުގެ ތެރޭގައި، އޭނާ މަސައްކަތްކުރާ ސެލޫންއާ ޖެހިގެން ހުރި ބޯކޮށާ ފިހާރައިގެ ތެރެއަށް ފަސިންޖަރުން ގެންގޮސް، އެތަނުގައި ޖިންސީ އަނިޔާދިނުމުގެ އަމަލުތައް އޭނާ ހިންގިއެވެ.
އެފްބީއައިއިން ހިންގި ތަހުގީގުގައި އޭނާ ވަނީ ކުށް ގަބޫލުކޮށްފައެވެ. އޭނާގެ ވަޒީފާއަކީ އިސްތަށިގަނޑު ރީތިކުރުން ކަމަށާއި، މައްސާޖު ކުރުމަކީ އޭނާގެ ޒިންމާއެއް ނޫން ކަމަށް އޭނާ އެއްބަސްވިއެވެ. އޭނާ އަމިއްލައަށް ބުނި ގޮތުގައި، ގާތްގަނޑަކަށް ދެ ހަފުތާ ވަންދެން ހަތަރު ނުވަތަ ފަސް އަންހެނުންނަށް އޭނާ ވަނީ މިފަދަ 'ހިދުމަތް' ދީ ބެހިފައެވެ.
އޭނާގެ ދިފާއުގައި ބުނީ، އެއީ ފަރުވާގެ ގޮތުން ކުރި ސްޓްރެސް ރިލީފްކޮށްދިނުމަށް ކުރި ކަމެއް ކަމަށާއި އެއްވެސް މީހަކަށް ގެއްލުމެއް ދޭން ބޭނުން ނުވާ ކަމަށެވެ. ނަމަވެސް، ފަހުން ލިބުނު ހެކިތަކާއެކު އޭނާގެ އަމަލުތަކާ މެދު ކުށްވެރި އިހުސާސްތަކެއް ކުރެވޭ ކަމަށާއި، އެއީ ޖިންސީ ފުރައްސާރައެއްކަން އޭނާއަށް މިހާރު ވިސްނޭ ކަމަށް ވެސް ބުނެފައިވެއެވެ.
ވާޖިން ވޮޔޭޖަސް އިން މިކަން ސިފަކުރީ، ބޯޓުގެ މުވައްޒަފުންގެ ފަރާތުން ފެނިގެން ނުވާނެ، އިތުބާރު ގެއްލުވާލި މުޑުދާރު އަމަލެއްގެ ގޮތުގައެވެ. "އެމީހާ ވަގުތުން ބޯޓުން ބާލައި، އެފްބީއައިއަށް މައްސަލަ ހުށަހެޅިން،" ބޯޓުގެ މެނޭޖްމަންޓުން ނެރުނު ބަޔާނެއްގައި ބުނެފައިވެއެވެ. އޭނާއަކީ އެ ބޯޓުގެ ސީދާ މުވައްޒަފެއް ނޫން ކަމަށާއި، އެއީ ތިންވަނަ ފަރާތެއްގެ ކުންފުންޏަކުން ކޮންޓްރެކްޓަށް ގެނައި މީހެއް ކަމަށް ވެސް އެ ކުންފުނިން ފާހަގަކުރިއެވެ.
ޕްރަނިތު ނަރަޔަން ޕަވާރގެ މައްޗަށް މިހާރު ވަނީ ޖިންސީ އަނިޔާ ދިނުމުގެ ދެ ދައުވާއެއް އުފުލާފައެވެ. މި ހާދިސާއަކީ މާކަނޑުގެ ހަމަހިމޭން ދަތުރުތަކުގައި ވެސް ކަނބަލުންގެ އިސްތަށިގަނޑާ މެދު ފަރުވާން ޖެހޭކަން އަންގައިދޭ ހާދިސާއެކެވެ.
