ކަނޑުގެ އަޑީގެ ހޯދުންތަކުގެ ތެރެއިން އެންމެ ފާހަގަކޮށްލެވޭ އެއް ހޯދުމުގެ ގޮތުން، އެންޓާކްޓިކާގެ ފިނި ކަނޑުގެ އަޑިއަށް ފޮނުވި ކެމެރާއަކުން ސައިންސްވެރިންނަށް ވަނީ ގާތްގަނޑަކަށް 60 މިލިއަން "އައިސް ފިޝް" ބިސް އަޅާ ހާލި ހޯދާފައެވެ. މިއީ މިހާތަނަށް ފެނުނު މަސް ބިސް އަޅާ އެންމެ ބޮޑު ސަރަހައްދު ކަމުގައި ވެއެވެ. ވެޑެލް ކަނޑުގެ އަޑީގައި އޮތް މީގެ ކުރިން ނޭނގޭ ފޮރުވިފައިވާ ދުނިޔެއެއް މިހާރު ވަނީ ހާމަވެފައެވެ.
މި ހޯދުން ހޯދާފައިވަނީ ޖަރުމަނުގެ "ޕޮލާސްޓާން" އައިސް ބްރޭކަރުގައި ކުރިއަށް ގެންދިޔަ ސައިންޓިފިކް ދަތުރެއްގައެވެ. އަލްފްރެޑް ވެޖެނާ އިންސްޓިޓިއުޓްގެ ޓީމުން ވެޑެލް ކަނޑުގެ ނިޒާމު ދިރާސާކުރަމުން ދިޔައީ އައު އެޑްވާންސްޑް އިމޭޖިން ސިސްޓަމެއް ބޭނުންކޮށްގެންނެވެ. މިއީ ގާތްގަނޑަކަށް އެއް ޓަނުގެ ބަރުދަން ހުންނަ ބިޔަ ކެމެރާއެއް ފޮނުވައިގެން ކަނޑުގެ އަޑީގެ ތަސްވީރުތައް ނަގައި އެ ސަރަހައްދުގެ ޖިއޮގްރަފީ ދެނެގަތުމަށް އުޅަނދުގެ ފަހަތުން ކަނޑުގެ އަޑީގައި ދަމަމުން ގެންގޮސް ކުރި މަސައްކަތެކެވެ.
ދިރާސާކުރާ ފަރާތްތަކުން އުޅުނީ މަސް ބިސް އަޅާ ސަރަހައްދެއް ހޯދުމަކަށް ނޫނެވެ. ނަމަވެސް ކެމެރާއިން ފެނުނީ ހައިރާންކުރުވަނިވި މަންޒަރެކެވެ؛ އެތައް މިލިއަން ހާލިތަކެއް ފުޅާ ސަރަހައްދެއްގައި ފެތުރިފައިވާއިރު، ގިނަ ހާލިތަކުގެ މަތީގައި ބޮޑެތި މަސްތައް ބިސްތައް ހިމާޔަތްކުރަން ތިބި މަންޒަރު ފެނެއެވެ. މިއީ މިހާ ބޮޑު މިންވަރަކަށް މީގެ ކުރިން ރެކޯޑް ކުރެވިފައި ނުވާ ފަދަ އިންތިޒާމުވެފައިވާ މަސް އާލާވުމުގެ އާދައެކެވެ.
މި ހާލިތައް ނިސްބަތްވަނީ އެންޓާކްޓިކާގެ "ނިއޮޕެޖީޓޮޕްސިސް އައިނާ" ކިޔާ އައިސް ފިޝްއަކަށެވެ. މިއީ އެންޓާކްޓިކާގެ ހާއްސަ މަހެކެވެ. މިއީ އެނގިފައިވާ ގޮތުގައި ހިމޮގްލޮބިން ނުހިމެނޭ ހަމައެކަނި މައިބަދަ ހިމެނޭ ދިރޭ މަޚުލޫގެވެ. މިމަހުގެ ސިފައިގެ ސަބަބުން މަހުގެ ކުލަ ފަނޑު ހުދު ކުލައަކަށް ބަދަލުވުމުގެ އިތުރުން، އާދަޔާ ހިލާފު ފިނި ކަނޑުގެ މާހައުލަށް ހޭނުމުގެ ގާބިލުކަން ލިބެއެވެ.
ކޮންމެ މަސް ޖޯޑެއް ކަނޑުގެ އަޑީގެ ޗަކަ ފަސްގަނޑުގައި ކުޑަ ހާއްޔެއް ކޮނެފައިވާއިރު، އެވްރެޖްކޮށް ކޮންމެ ހާއްޔެއްގައި 1700 ބިސް ހުރެއެވެ. މިއިން ދައްކުވައިދެނީ މި ސަރަހައްދުގައި އެތައް މިލިއަން މަހުގެ ކުދި މަސް އާލާވަމުން އަންނަ ކަމެވެ.
ފާހަގަކޮށްލެވޭ ހޯދުމެއް
އަލްފްރެޑް ވެޖެނާ އިންސްޓިޓިއުޓްގެ ދިރާސާވެރިޔާ އޮޓަން ބޯސާ ވިދާޅުވީ، މި ހޯދުންތައް މުރާޖައާ ކުރުމަށްފަހު އެމީހުންނަށް ކުރިމަތިވެފައިވަނީ އާދަޔާ ހިލާފު ހޯދުމެއްކަން ވަގުތުން ދެނެގަނެވުނު ކަމަށެވެ. އޭނާ އިތުރަށް ވިދާޅުވީ، މި ހާލިތައް ހުރި ސަރަހައްދު ނިމޭ ހިސާބު ވަރަށް ސާފުކޮށް ފެންނަން ހުރި ކަމަށާއި، އެއީ ޕެންގުއިންތައް ބިސް އަޅާ ސަރަހައްދުތަކާ އެއްގޮތް ތަނެއް ކަމަށެވެ.
ބޮޑު އެއްވުމެއްގެ ސިއްރު
ސައިންސްވެރިން ގަބޫލުކުރާ ގޮތުގައި މިހާ ގިނަ އަދަދެއްގެ މަސް އެއްތަނަކަށް ޖަމާވަނީ ކަނޑުގެ އަޑިން އަރާ ހޫނު ފެނުގެ އޮއިވަރެއްގެ ސަބަބުންނެވެ. އެ ފެންގަނޑު ވަށައިގެންވާ ފެނަށްވުރެ ދެ ޑިގްރީ ސެލްސިއަސް ހޫނު ކަމަށް ދައްކައެވެ. މި އޮއިވަރުގެ ސަބަބުން ކުދިކުދި ދިރޭ ފަނިތައް މައްޗަށް ގެންގޮސްދޭތީ، މަހުގެ ބިހުން ދަރި ނުކުތުމަށްފަހު ކާނާ ހޯދަން އެންމެ އެކަށީގެންވާ މާހައުލަކަށް މި ސަރަހައްދު ވެއެވެ.
މީގެ އިތުރުން، އެ ސަރަހައްދުގައި މަރުވެފައިވާ ގިނަ އަދަދެއްގެ އައިސް ފިޝް ފެނިފައިވާއިރު، މިއީ އެ ސަރަހައްދު ކާނާގެ ޗޭނުގައި ވަރަށް މުހިންމު ދައުރެއް އަދާކުރާކަން އަންގައިދޭ ކަމެކެވެ. އެގޮތުން ވެޑެލް ސީލް ފަދަ ކަނޑުގެ ދިރޭ އެއްޗެހި ކާނާ ހޯދުމަށް މި ސަރަހައްދަށް ބަރޯސާވެއެވެ.
މި ހޯދުމުގެ ނަތީޖާ "ކަރަންޓް ބަޔޮލޮޖީ" ޖާނަލްގައި ޝާއިއުކޮށްފައިވާއިރު، ސައިންސްވެރިން ބުނަނީ މިއީ މިހާތަނަށް ދުނިޔެއިން ފެނުނު އެންމެ ބޮޑު، މަސް އާލާވާ ސަރަހައްދު ކަމަށެވެ. އަދި އެންޓާކްޓިކާގެ ކަނޑުގެ އަޑީގެ ބަޔޮމާސް އެންމެ މަތީ އެއް ސަރަހައްދު ކަމަށްވެސް ކަނޑައަޅާފައިވެއެވެ.
މި ހޯދުމާއެކު ސައިންސްވެރިން ވަނީ މި ސަރަހައްދު ހިމާޔަތްކުރުމަށް ގޮވާލާފައެވެ. އެންޓާކްޓިކާގެ ކަނޑުގެ ދިރުންތައް ހިމާޔަތްކުރާ ކޮމިޓީއާ ގުޅިގެން، މި ސަރަހައްދު ހިމާޔަތްކޮށްފައިވާ ސަރަހައްދެއްގެ ގޮތުގައި ކަނޑައެޅުމުގެ މަސައްކަތް މިހާރު ދަނީ ކުރަމުންނެވެ.
މި ސަރަހައްދުން ފުރުމުގެ ކުރިން، ދިރާސާވެރިން ވަނީ ކަނޑުގެ އަޑީގައި ދެ ކެމެރާއެއް ބަހައްޓާފައެވެ. މީގެ މަގްސަދަކީ މި ސަރަހައްދު ދިގު މުއްދަތަކަށް މޮނިޓަރުކޮށް، އައިސް ފިޝްތަކުގެ ދިރިއުޅުމާއި، ދުނިޔޭގެ އެންމެ ފިނި މާހައުލަކަށް އެމީހުން ހޭނޭ ގޮތް އިތުރަށް ދެނެގަތުމެވެ.
