އެމެރިކާގެ ޤާނޫނުއަސާސީން ތަންދީފިނަމަ، ރިއާސީ ތިންވަނަ ދައުރަކަށް ކުރިމަތިލެއްވުމަށް އުފަލާއެކު ތައްޔާރަށް ހުންނެވި ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
ސައުތު ކެރޮލައިނާގައި އޭނާއަށް ތާއީދުކުރާ ފަރާތްތަކާއެކު ބޭއްވި އެއްވުމެއްގައި ވާހަކަފުޅު ދައްކަވަމުން ރައީސް ޓްރަމްޕް ވަނީ، ރިއާސީ ތިންވަނަ ދައުރަކަށް ކުރިމަތިލެއްވުމަށް މިހާރު އޮތް ޤާނޫނީ ހުރަސްތަކާމެދު ހިތާމަކުރައްވާކަން ހާމަކުރައްވާފައެވެ.
"ތިންވަނަ ދައުރަކަށް ކުރިމަތިލުން މަނާކުރާ ބައެއް ޤާނޫނުތަކާއި އުޞޫލުތައް އެބަހުރި. އެކަންކަން ބަދަލުކުރުމަށް އެބޭފުޅުން ބޭނުންފުޅުވާނަމަ، ތިންވަނަ ދައުރަކަށް ކުރިމަތިލުމަށް އުފަލާއެކު ހުރީމު،" ސައުތު ކެރޮލައިނާގެ ސަޕޯޓަރުންނާ މުޚާތަބުކުރައްވައި ޓްރަމްޕް ވިދާޅުވިއެވެ.
އެމެރިކާގެ ރިއާސީ އިންތިޚާބު ދެން އެންމެ އަވަހަށް ބޭއްވުމަށް ހަމަޖެހިފައިވަނީ 2028 ވަނަ އަހަރުއެވެ. ނަމަވެސް، ޓްރަމްޕް ވަނީ މީގެ ކުރިންވެސް ތިންވަނަ ދައުރަކަށް ކުރިމަތިލެއްވުމުގެ ޝައުޤުވެރިކަން އެކި ފަހަރު މަތިން ފާޅުކުރައްވައި، އެކަމަށް "މަގުތަކެއް އެބައޮތް" ކަމަށް އިޝާރާތް ކުރައްވާފައެވެ.
އެމެރިކާގެ ޤާނޫނުއަސާސީއަށް ގެނެވުނު 22 ވަނަ އިޞްލާޙު އޮންނަ ގޮތުން، އެއްވެސް ފަރުދަކަށް އެމެރިކާގެ ރައީސްކަން ދެ ދައުރަށްވުރެ އިތުރަށް ނުކުރެއްވޭނެއެވެ. ކޮންމެ ރިއާސީ ދައުރަކީ 4 އަހަރުގެ މުއްދަތެކެވެ. ރައީސް ޓްރަމްޕް މިހާރު ފުރުއްވަމުން އެގެންދަވަނީ އޭނާގެ ރިއާސީ ދެވަނަ ދައުރެވެ.
ޤާނޫނުއަސާސީ ބަދަލުކުރުމުގެ ގޮންޖެހުންތައް
މިހާރު އޮތް ޤާނޫނީ ހުރަސްތައް ނައްތާލައި، ތިންވަނަ ދައުރަކަށް މަގުފަހިކުރެވެން އޮތް ހަމައެކަނި ގޮތަކީ އެމެރިކާގެ ޤާނޫނުއަސާސީއަށް އިޞްލާޙު ގެނައުމެވެ. މިއީ ސިޔާސީ ގޮތުން ނުހަނު އުނދަގޫ އަދި ދިގު މުއްދަތެއް ނަގާނެ މަރުޙަލާއެކެވެ. ޤާނޫނުއަސާސީއަށް އިޞްލާޙެއް ގެނެވޭނީ:
- އެމެރިކާގެ ކޮންގްރެސްގެ ދެ މަޖިލިސްގެ ތިންބައިކުޅަ ދެބައިގެ އަޣުލަބިއްޔަތު ލިބިގެންނެވެ.
- އޭގެ އިތުރުން، އެމެރިކާގެ 50 ސްޓޭޓްގެ ތެރެއިން މަދުވެގެން ހަތަރުބައިކުޅަ ތިންބައި (38 ސްޓޭޓް) ގެ ޤާނޫނުހަދާ މަޖިލިސްތަކުން އެ އިޞްލާޙު ތަޞްދީޤުކޮށްގެންނެވެ.
2025 ވަނަ އަހަރުގެ ޖަނަވަރީ މަހުގެ ތެރޭގައި ރިޕަބްލިކަން ޕާޓީގެ ކޮންގްރެސް މެންބަރު އެންޑީ އޯގްލްސް ވަނީ، ވިދާތިބި ގޮތް ނޫން ގޮތަކަށް ތިން ދައުރު ވެރިކަން ކުރެވޭގޮތަށް ޤާނޫނުއަސާސީއަށް އިޞްލާޙެއް ހުށަހަޅުއްވާފައެވެ. ނަމަވެސް، އެމެރިކާގެ މިހާރުގެ ސިޔާސީ މަސްރަޙު ބެހިފައިވާ ގޮތުންނާއި، ދެ ޕާޓީގެ މެދުގައި އޮތް ބޮޑު ޚިޔާލުތަފާތުވުންތަކުގެ ސަބަބުން، މިފަދަ އިޞްލާޙެއް ފާސްވުމުގެ ފުރުޞަތު ނުހަނު ކުޑަކަމަށް ސިޔާސީ މަހައްލިލުން ދެކެވަޑައިގަންނަވައެވެ.
