ދައުލަތަށް ލިބުނު ޖުމްލަ އާމްދަނީއާއި ހިލޭ އެހީގެ މިންވަރު ފާއިތުވި މުއްދަތުގައި 6.9 އިންސައްތައިގެ ކުރިއެރުމެއް ހޯދައި، އިމްޕޯޓް ޑިއުޓީއާއި ޓެކްސް އާމްދަނީން ބޮޑު ކުރިއެރުމެއް ރެކޯޑުކޮށްފިއެވެ. މާލީ ކަންކަމާއި ސަރުކާރު ކުންފުނިތަކާ ބެހޭ ވުޒާރާއިން އާންމުކުރެއްވި އެންމެ ފަހުގެ "ވީކްލީ ފިސްކަލް ޑިވެލޮޕްމަންޓްސް" ރިޕޯޓުން ދައްކާ ގޮތުގައި، މިދިޔަ މަހުގެ 27 ވަނަ ދުވަހުގެ ނިޔަލަށް ދައުލަތަށް 27.9 ބިލިއަން ރުފިޔާ ވަނީ އާމްދަނީގެ ގޮތުގައި ލިބިފައެވެ. މިއީ ފާއިތުވި އަހަރުގެ އެ މުއްދަތުގައި ލިބުނު 26.1 ބިލިއަން ރުފިޔާއާ އަޅާބަލާއިރު ފާހަގަކޮށްލެވޭ އިތުރުވުމެކެވެ.
މާލީ ވުޒާރާގެ ތަފާސްހިސާބުތަކަށް ބަލާއިރު، ދައުލަތަށް ލިބުނު އާމްދަނީގެ އެންމެ ބޮޑު ހިއްސާއަކީ ޓެކުހުގެ ގޮތުގައި ލިބުނު ފައިސާއެވެ.
- ޓެކްސް އާމްދަނީގެ ގޮތުގައި 21.7 ބިލިއަން ރުފިޔާ ލިބިފައިވާއިރު، މިއީ ކުރީ އަހަރަށްވުރެ 9.2 އިންސައްތައިގެ އިތުރުވުމެކެވެ.
- އިމްޕޯޓް ޑިއުޓީގެ ގޮތުގައި ލިބުނު 2.2 ބިލިއަން ރުފިޔާއަކީ 12.1 އިންސައްތައިގެ ކުރިއެރުމެކެވެ.
- ވިޔަފާރިއާއި މުދަލުން ލިބުނު ޓެކްސް އާމްދަނީ 5.5 ބިލިއަން ރުފިޔާއަށް އަރާފައިވެއެވެ.
- ކޯޕަރޭޓް އިންކަމް ޓެކްސްގެ ގޮތުގައި 2.8 ބިލިއަން ރުފިޔާ ލިބިފައި ވެއެވެ.
- އާންމު މުދަލާއި ޚިދުމަތުގެ ޓެކްސް (ޖީއެސްޓީ) ގެ ގޮތުގައި 3.5 ބިލިއަން ރުފިޔާ ވަނީ ޚަޒާނާއަށް ވަދެފައެވެ.
ފަތުރުވެރިކަމުގެ ދާއިރާއާއި އިގްތިސާދީ ހަރަކާތްތައް ފުޅާވުމާ ގުޅިގެން:
- އެއާޕޯޓް ސާވިސް ޗާޖާއި ޑިޕާޗާ ޓެކުހުގެ އާމްދަނީ 8.2 އިންސައްތަ އިތުރުވެ 1.2 ބިލިއަން ރުފިޔާއަށް ވަނީ އަރާފައެވެ.
- މުދަލާއި ގޯތިގެދޮރުގެ ދާއިރާއިން ލިބުނު އާމްދަނީ 32 އިންސައްތައިގެ ބޮޑު ކުރިއެރުމަކާއެކު 1.68 ބިލިއަން ރުފިޔާއަށް މަތިވެފައި ވެއެވެ.
- މީގައި ރިސޯޓުތަކުގެ ކުލީގެ ގޮތުގައި ލިބުނު 1.1 ބިލިއަން ރުފިޔާ ހިމެނެއެވެ.
- ބޭރުގެ ފަރާތްތަކުން ލިބުނު ހިލޭ އެހީގެ މިންވަރު 88 އިންސައްތައިގެ ކުރިއެރުމަކާއެކު 471.8 މިލިއަން ރުފިޔާއަށް ވަނީ މައްޗަށް ގޮސްފައެވެ.
އާމްދަނީއަށް ކުރިއެރުންތަކެއް ލިބުނު ނަމަވެސް، ދައުލަތުގެ ޖުމްލަ ޚަރަދުތައް ވަނީ ނިސްބަތުން ބޮޑުތަން އިތުރުވެފައެވެ.
- ޖުމްލަ ޚަރަދު 17.5 އިންސައްތަ އިތުރުވެ، 29.9 ބިލިއަން ރުފިޔާއަށް އަރާފައިވެއެވެ.
- ހޭދައިގެ ތެރެއިން އެންމެ ބޮޑު ބައެއް ހިއްސާކުރަނީ ސަރުކާރު ހިންގުމުގެ ރިކަރަންޓް ޚަރަދެވެ. އެއީ 26.1 ބިލިއަން ރުފިޔާއެވެ.
- އިދާރީ ހިންގުމުގެ ތެރެއިން ސިފައިންނާއި ދައުލަތުގެ މުވައްޒަފުންގެ މުސާރައާއި އުޖޫރައަށް ކުރި ހޭދަ 12.7 އިންސައްތަ އިތުރުވެ، 4.75 ބިލިއަން ރުފިޔާއަށް ވަނީ އަރާފައެވެ.
ޤައުމީ ތަރައްޤީގެ މަޝްރޫޢުތަކާއި ކެޕިޓަލް ޚަރަދުތަކަށް ބަލާއިރު،:
- އިމާރާތްކުރުމާއި ފާލަމާއި ބަނދަރު ހެދުމުގެ މަޝްރޫއުތަކަށް ކުރި ހޭދަ ވަނީ އިތުރުވެފައެވެ.
- ކެޕިޓަލް ޚަރަދުގެ ގޮތުގައި 3.82 ބިލިއަން ރުފިޔާ ހޭދަވެފައިވެއެވެ.
- ބިމާއި އިމާރާތްތަކަށް ކުރި ހޭދަ 44.6 އިންސައްތަ އިތުރުވެ 1.24 ބިލިއަން ރުފިޔާއަށް އަރާފައި ވެއެވެ.
- ފާލަމާއި ބަނދަރު ހެދުމުގެ މަޝްރޫއުތަކަށް ކުރި ހަރަދު 39.8 އިންސައްތަ އިތުރުވެ 292.1 މިލިއަން ރުފިޔާއަށް ވަނީ އަރާފައެވެ.
އިމްޕޯޓް ޑިއުޓީއާއި ޓެކްސް އާމްދަނީ މައްޗަށް ދިއުމަކީ ގޭބިސީތަކާއި ވިޔަފާރިތަކުގެ ހަރަކާތްތެރިކަން އިތުރުވަމުންދާކަމުގެ ނިޝާނެކެވެ. ނަމަވެސް، އާމްދަނީއަށްވުރެ ޚަރަދުތައް މަތީގައި ހުރުމުގެ ސަބަބުން އުފެދޭ ފިސްކަލް ޑެފިސިޓް ކުޑަކުރުމަށްޓަކައި، ރިކަރަންޓް ޚަރަދުތައް ކޮންޓްރޯލްކުރުމުގެ ސްޓްރެޓެޖީތަކެއް ގާއިމުކުރުން މުހިންމެވެ. ޚާއްޞަކޮށް، މާލީ މައިދާނުގައި ހުރި ގޮންޖެހުންތަކުން އަރައިގަތުމަށްޓަކައި ދައުލަތުގެ ޚަރަދުތައް އަލުން ތަރުތީބުކޮށް، ދެމެހެއްޓެނިވި މާލީ ސިޔާސަތުތަކަކަށް އަމާޒުހިފުން ބޭނުންތެރިއެވެ.
