ދުނިޔޭގެ އާބާދީގެ ދެބައިކުޅަ އެއްބައި އަދި މުޅި ދުނިޔޭގެ އިޤްތިޞާދުގެ 40 އިންސައްތަ ތަމްސީލުކުރާ ބްރިކްސް ޖަމްޢިއްޔާއިން، އެ ޖަމްޢިއްޔާގެ އިޤްތިޞާދީ ބާރުގަދަކަން ޙަޤީޤީ ވިޔަފާރިއާއި އިންވެސްޓްމަންޓުގެ ފުރުޞަތުތަކަކަށް ބަދަލުކޮށްދޭންޖެހޭ ކަމަށް އިންޑިއާގެ ބޮޑުވަޒީރު ނަރެންދުރަ މޯދީ ވިދާޅުވެއްޖެއެވެ.
ބްރިކްސް ބިޒްނަސް ފޯރަމްގައި ވާހަކަފުޅުދައްކަވަމުން ބޮޑުވަޒީރު މޯދީ ވަނީ މި ޖަމްޢިއްޔާގެ ދުނިޔޭގެ ނުފޫޒު ދަނީ ފުޅާވަމުންކަން ފާހަގަކުރައްވާފައެވެ. އަދި 2006 ވަނަ އަހަރު މި ޖަމްޢިއްޔާ އުފެދުނީއްސުރެ، މެންބަރު ޤައުމުތަކުގެ ޖުމްލަ ޖީޑީޕީގެ މިންވަރު ގާތްގަނޑަކަށް 4.5 ގުނަ އިތުރުވެފައިވާކަން ފާހަގަކުރެއްވިއެވެ. މިއީ މުޅި ދުނިޔޭގެ އިޤްތިޞާދީ ކުރިއެރުމާ އަޅައިބަލާއިރު ގާތގަނޑަކަށް 2.5 ގުނައިގެ ކުރިއެރުމެއް ކަމަށް ވެސް ވިދާޅުވިއެވެ.
ފޯރަމްގައި ދެއްކެވި ވާހަކަފުޅަށްފަހު އެކްސްގައި ކުރެއްވި ޕޯސްޓެއްގައި ބޮޑުވަޒީރު މޯދީ ވިދާޅުވީ، ދުނިޔޭގެ އާބާދީގެ 50 އިންސައްތައާއި މުޅި ދުނިޔޭގެ ޖީޑީޕީގެ 40 އިންސައްތަ ހިއްސާކުރާ ބްރިކްސް އަކީ ބައިނަލްއަޤުވާމީ މަސްރަހުގައި ވަރަށް މުހިންމު ދައުރެއް އަދާކުރާ ޖަމްޢިއްޔާއެއް ކަމަށެވެ.
ދުނިޔޭގެ އިޤްތިޞާދީ އޮނިގަނޑަށް އަންމުންދާ ބަދަލުތަކާއެކު، ބްރިކްސް ޖަމްޢިއްޔާގެ މުހިންމުކަން ދަނީ ދުވަހަކަށްވުރެ ދުވަހެއް ބޮޑުވަމުންނެވެ. ޚާއްޞަކޮށް ހުޅަނގުގެ އިޤްތިޞާދީ ބާރުތަކަށް ބަރޯސާވުން ކުޑަކޮށް، ތަރައްޤީވަމުން އަންނަ ޤައުމުތަކުގެ މެދުގައި ވިޔަފާރިއާއި މާލީ ގުޅުންތައް ބަދަހިކުރުމަށް މި ޖަމްޢިއްޔާއިން ދަނީ ބާރުއަޅަމުންނެވެ.
މި ފޯރަމްގެ ތެރެއިން ވާހަކަދެއްކެވި ބައިނަލްއަޤުވާމީ ޑިޕްލޮމެޓުންނާއި ވިޔަފާރިވެރިން ފާހަގަކުރިގޮތުގައި، ބްރިކްސްގެ މެންބަރު ޤައުމުތަކުގެ މެދުގައި ސަރަޙައްދީ ފެންވަރުގައާއި ބައިނަލްއަޤުވާމީ މައިދާނުގައި ވިޔަފާރީގެ ފުރުޞަތުތައް ފަހިކުރުމަށް، ޤައުމުތަކުގެ ސަރުކާރުން އެކުލަވާލާ ސްޓްރެޓީޖީތައް އިތުރަށް ހަރުދަނާކުރަންޖެހެއެވެ.
މި ޖަމްޢިއްޔާގައި ހިމެނޭ ބާރުގަދަ ޤައުމުތަކުގެ ސިފައިންނާއި އިޤްތިޞާދީ އިސްވެރިން ދަނީ ކުރިއަށް އޮތް ތަނުގައި ވިޔަފާރީގެ މުޢާމަލާތްތައް ފަސޭހަކުރުމަށްޓަކައި ޤައުމީ ފައިސާ ބޭނުންކުރުން އިތުރުކުރުމާއި، ސަޕްލެމެންޓަރީ މާލީ ނިޒާމުތައް ޤާއިމުކުރުމާ ގުޅޭގޮތުން މަޝްވަރާކުރަމުންނެވެ.
ބްރިކްސް ޖަމާއަތުގެ 18 ވަނަ ވެރިންގެ ސަމިޓް އިންޑިޔާގެ ވެރިރަށް ނިއުދިއްލީގައި މިއަދު ފަށައިފިއެވެ. ސެޕްޓެމްބަރު 12 އިން 13 އަށް ކުރިއަށްދާ މި ބައްދަލުވުމަކީ، ފުޅާވަމުން އަންނަ މި އިއްތިޙާދުން ބައިނަލްއަޤުވާމީ ސިޔާސީ އަދި އިޤުތިޞާދީ މައިދާނުގައި އަދާކުރާ ދައުރު އިތުރަށް ވަރުގަދަކުރުމަށް ބާއްވާ މުހިންމު ސަމިޓެކެވެ.
އިންޑިޔާގެ ބޮޑުވަޒީރު ނަރެންދުރަ މޯދީގެ މެހުމާންދާރީގައި ބާއްވާ މި ސަމިޓުގައި އޭޝިއާ، އެފްރިކާ، މެދުއިރުމަތި އަދި ލެޓިން އެމެރިކާގެ ޤައުމުތަކުގެ އިސް ވެރިން ބައިވެރިވެވަޑައިގަންނަވައެވެ. މިގޮތުން ރަޝިޔާގެ ރައީސް ޕޫޓިންއާއި، ޗައިނާގެ ރައީސް ޝީ ޖިންޕިން އަދި އީރާނުގެ ރައީސް މަސްޢޫދު ޕެޒެޝްކިއަންގެ އިތުރުން އދ. ގެ ސެކްރެޓަރީ-ޖެނެރަލް އެންޓޯނިއޯ ގުޓަރޭސް ވެސް މި ބައްދަލުވުމުގައި ބައިވެރިވެވަޑައިގަންނަވާނެއެވެ.
މި ސަމިޓުގެ އެންމެ މައިގަނޑު މަޤުޞަދަކީ ދުނިޔޭގެ ވިޔަފާރިއާއި، ތަރައްޤީގެ މާލީ ކަންކަމުގެ އިތުރުން ބައިނަލްއަޤުވާމީ މުއައްސަސާތައް އިސްލާޙުކުރުމާ ބެހޭގޮތުން މަޝްވަރާކުރުމެވެ. ޚާއްސަކޮށް، އެމެރިކާއާއި އީރާނާ ދެމެދު އުފެދިފައިވާ ނުތަނަވަސްކަމާއި، އޭގެ ސަބަބުން ދުނިޔޭގެ އިޤުތިޞާދަށާއި ޚާއްސަކޮށް އޭޝިއާ ސަރަޙައްދުގެ ހަކަތައިގެ މައިދާނަށް ކުރަމުންދާ އަސަރުތަކާ މެދު ސަމިޓުގައި ފުޅާދާއިރާއެއްގައި ވާހަކަދެކެވޭނެއެވެ.
މީގެ އިތުރުން، ބްރިކްސް ޤައުމުތަކުގެ މެދުގައި ވިޔަފާރިކުރުމުގައި އެ ޤައުމުތަކުގެ އަމިއްލަ ފައިސާ ބޭނުންކުރުން އިތުރުކުރުމާއި، އެމެރިކާ ޑޮލަރަށް އޮތް ބަރޯސާ ކުޑަކުރުމުގެ ސިޔާސަތުތަކާ ބެހޭގޮތުން މަޝްވަރާކުރާނެއެވެ. ޖަމާއަތުގެ އައު ޑިވަލޮޕްމަންޓް ބޭންކުން ވެސް މިހާރު ދަނީ މެންބަރު ޤައުމުތަކުގެ ފައިސާއިން މާލީ އެހީތެރިކަން ފޯރުކޮށްދިނުމަށް އިސްކަންދެމުންނެވެ.
މި ސަމިޓަކީ އިންޑިޔާއާއި ޗައިނާގެ ނާޒުކު ގުޅުމަށް ވެސް ލިބިގެންދާ މުހިންމު ފުރުސަތެކެވެ. ދެ ޤައުމުގެ މެދުގައި ބޯޑަރުގެ މައްސަލަތަކާއި ސިޔާދަތީ ޚިލާފުތައް ހުރި ނަމަވެސް، މިފަދަ ބައިނަލްއަޤުވާމީ މައިދާންތަކަކީ ދެ ޤައުމުގެ މެދުގައި މަޝްވަރާގެ ދޮރުތައް ހުޅުވާފައި ބެއްވުމަށް ލިބޭ ވަރަށް މުހިންމު ފުރުސަތެއް ކަމަށް ފާހަގަކުރެއެވެ.
ފާހަގަކޮށްލެވޭ ގޮތުގައި، 2006 ވަނަ އަހަރު ބްރިކްސް އުފެދުނު ފަހުން މި ޖަމާއަތް ވަނީ ވަރަށް ބޮޑަށް ފުޅާވެފެވެ. މިއަދު މި ޖަމާއަތަކީ ދުނިޔޭގެ އާބާދީގެ 49.5 އިންސައްތަ އާއި، ދުނިޔޭގެ ޖީޑީޕީގެ 40 އިންސައްތަ ތަމްސީލުކުރާ ބޮޑު ބާރެކެވެ.
