ޕާކިސްތާނުގެ ސުޕްރީމް ކޯޓުން ޙުކުމް ސަސްޕެންޑްކޮށް، ކަފާލާތުގެ ދަށުން ދެ ވަކީލުން މިނިވަންކުރުމަށް އަމުރުކުރިތާ މަދު ގަޑިއިރުކޮޅެއްގެ ތެރޭގައި، އިންސާނީ ޙައްޤުތަކަށް ވަކާލާތުކުރާ ވަކީލު އީމާން ޒައިނަބު މަޒާރީ-ހާޒިރު އާއި އޭނާގެ ފިރިކަލުން ހާދީ އަލީ ޗައްތާ ޖަލުގެ އެތެރޭގައި ތިއްބައި އަލުން ހައްޔަރުކޮށްފިއެވެ.
ސުޕްރީމް ކޯޓުން ނެރުނު އަމުރަށް ސަރުކާރުން ގޮންޖަހައި، ދެ ވަކީލުން އަލުން ހައްޔަރުކުރުމާ ގުޅިގެން ޕާކިސްތާނުގެ ޤާނޫނީ ނިޒާމާއި ސަރުކާރުގެ ނުފޫޒާމެދު ބައިނަލްއަޤްވާމީ ފެންވަރުގައި ބޮޑެތި ކަންބޮޑުވުންތަކެއް ވަނީ އުފެދިފައެވެ.
އަށް މަސް ދުވަހުގެ ޖަލު ބަންދަކަށްފަހު، ސެޕްޓެމްބަރު 17 ގައި ސުޕްރީމް ކޯޓުން ދެ ވަކީލުން މިނިވަންކުރުމަށް އަމުރުކުރީ، މީސް މީޑިއާ ގައި އަދީބުންނާއި ސިޔާސީ ފަރާތްތަކުން ކުރިޕޯސްޓްތަކާ ގުޅުވައިގެން އިލެކްޓްރޯނިކް ކުށްތައް ހުއްޓުވުމުގެ ޤާނޫނު (ޕެކާ) ގެ ދަށުން އިއްވާފައިވާ 10 އަހަރާއި 17 އަހަރާ ދެމެދުގެ ޖަލު ޙުކުމް ސަސްޕެންޑްކުރުމަށްފަހުއެވެ. ނަމަވެސް، އަދިއާލާ ޖަލުން އިދާރީ ކަންކަން ނިންމައި މިނިވަން ކުރަން ތައްޔާރު ކޮށްފައިވަނިކޮށް، އެ ރޭގެ ވަގުތެއްގައި ސިފައިން ނާއި ފުލުހުން ވަނީ ޖަލު ތެރެއަށް ވަދެ ދެ ވަކީލުން އަލުން ހައްޔަރުކޮށްފައެވެ.
އަލުން ދެ ވަކީލުން ހައްޔަރުކުރީ މާރިޗު 2025 ގައި އިސްލާމްއާބާދުގެ ކޯހްސާރު ފުލުހުންގެ އިދާރާގައި ރަޖިސްޓްރީކޮށްފައިވާ އާ މައްސަލައަކާ ގުޅުވައިގެންނެވެ. އެއީ ސަރުކާރާ ދެކޮޅަށް އަޑުއުފުލުމާއި، މަގުތައް ބަންދުކުރުމާއި، ޣައިރުޤާނޫނީ އެއްވުމެއްގައި ބައިވެރިވިކަމުގެ ތުހުމަތުގައެވެ. މި މައްސަލައިގައި ދެ ވަކީލުން އެންޓި-ޓެރަރިޒަމް ކޯޓަކަށް ހުށަހެޅުމަށްފަހު، 14 ދުވަހުގެ ބަންދުގެ މުއްދަތެއް ވަނީ ދީފައެވެ.
މި ޙާދިސާއާ ގުޅިގެން ޕާކިސްތާނުގެ ޤާނޫނީ ވަކީލުންނާއި، ނޫސްވެރިންގެ އިތުރުން އިންސާނީ ޙައްޤުތަކަށް މަސައްކަތްކުރާ ޖަމްޢިއްޔާތަކުން ވަނީ ކަންބޮޑުވުން ފާޅުކޮށްފައެވެ. އެމްނެސްޓީ އިންޓަރނޭޝަނަލްގެ ސައުތު އޭޝިއާގެ ޑެޕިއުޓީ ރީޖަނަލް ޑިރެކްޓަރު ބާބޫ ރާމްނާންތު ވިދާޅުވީ، "އީމާން އާއި ހާދީ އަލުން ހައްޔަރުކުރުމުން އެނގެނީ ސަރުކާރުން ޤާނޫނީ ނިޒާމު ސިޔާސީ ހަތިޔާރަކަށް ހަދައި، އިންސާނީ ޙައްޤުތަކަށް ވަކާލާތުކުރާ ފަރާތްތަކުގެ އަޑުއަހާ މީހުންނަށް އަދަބުދޭން މަސައްކަތްކުރާ މިންވަރު،" ކަމަށެވެ.
މީގެއިތުރުން، ޕާކިސްތާނުގެ ސީނިއާ ނޫސްވެރިޔާ މަތީއުﷲ ޖާން ވިދާޅުވީ، ސުޕްރީމް ކޯޓުގެ އަމުރަށް ގޮންޖަހައި، ދުވަސްވީ ފޭކު އެފްއައިއާރްތައް ބޭނުންކޮށްގެން މީހުން ހައްޔަރުކުރުމަކީ ޤާނޫނީ ނިޒާމު މުޅިން ފެއިލްވެފައިވާކަމުގެ ހެކިކަމަށެވެ. އަދި މަޝްހޫރު ނޫސްވެރިޔާ ހާމިދު މިރްވެސް ވަނީ، ކޯޓުން ދޭ ކަފާލާތުގެ އަމުރަކުން ޙަޤީޤީ މިނިވަންކަމެއް ނުލިބޭނަމަ، ޢަދާލަތުގެ އިޢުތިބާރު މުޅިން ގެއްލިގެންދާނެކަމަށް ބުނެފައެވެ.
އީމާންގެ މަންމަ އަދި ކުރީގެ ވަޒީރު ޝިރީން މަޒާރީ މީސް މީޑިއާ ގައި ކުރެއްވި ޕޯސްޓެއްގައި ވިދާޅުވީ، އަދިއާލާ ޖަލުން ދެ ވަކީލުން ހައްޔަރުކޮށްގެން ގެންދިޔަފަހުން އެމީހުންގެ ޚަބަރެއް ނުވާކަމަށާއި، ވަކީލުންނާ ބައްދަލުކުރުމުގެ ފުރުޞަތުވެސް ދީފައިނުވާ ކަމަށެވެ. 200 އަށްވުރެ ގިނަ ވަކީލުންނާއި ނޫސްވެރިން ވަނީ ސުޕްރީމް ކޯޓުގެ އަމުރާ ޚިލާފަށް ސަރުކާރުން ހިންގި މި އަމަލު ކުށްވެރިކޮށް ގުޅިފައިވާ ބަޔާނެއް ނެރެފައެވެ.
