އެމެރިކާގެ ރައީސް ޑޮނަލްޑް ޓްރަމްޕް އީރާނަށް އާ ސޮލީބީ ހަމަލާތަކެއް ދޭނެ ކަމަށް އިންޒާރު ދެއްވުމާ ގުޅިގެން، އެމެރިކާއިން މެދުއިރުމައްޗަށް ތިންވަނަ އެއާކްރާފްޓް ކެރިއާއާއެކު އިތުރު 9،000 އާއި 10،000 އާ ދެމެދުގެ އަދަދަކަށް ސިފައިން ފޮނުވުމަށް ނިންމައިފިއެވެ. މި ފިޔަވަޅަކީ ނޮވެމްބަރު 3 ގައި އޮންނަ މިޑްޓާމް އިންތިޚާބަށްފަހު އީރާނާ ދެކޮޅަށް އަސްކަރީ ވަރުގަދަ ފިޔަވަޅުތަކެއް އަޅަން ތައްޔާރުވަމުންދާ ދަނޑިވަޅެއްގައި ނިންމާފައިވާ ނިންމުމެކެވެ.
މި އޮޕަރޭޝަނުގެ ދަށުން މެދުއިރުމައްޗަށް ފޮނުވުމަށް ހަމަޖެހިފައިވަނީ ޔޫއެސްއެސް ތިއޮޑޯ ރޫޒްވެލްޓް އާއި އެ ކެރިއާގެ ސްޓްރައިކް ގްރޫޕެވެ. މި ބޯޓުތައް ނޮވެމްބަރު މަހުގެ ނިޔަލަށް އެ ސަރަހައްދަށް ފޯރާނެ ކަމަށް ބެލެވެއެވެ. މިވަގުތުވެސް މެދުއިރުމަތީގައި އެމެރިކާގެ ދެ އެއާކްރާފްޓް ކެރިއާ ކަމަށްވާ ޔޫއެސްއެސް ޖޯޖް އެޗްޑަބްލިއު ބުޝް އާއި ޔޫއެސްއެސް ޖޯޖް ވޮޝިންގްޓަން ދަނީ ހަރަކާތެރިވަމުންނެވެ. އާންމުކޮށް ޕެސިފިކް ކަނޑުގައި ހަރަކާތެރިވާ ޖޯޖް ވޮޝިންގްޓަން މެދުއިރުމައްޗަށް ބަދަލުކުރީ، ގިނަ ދުވަސްތަކެއް ވަންދެން އެ ސަރަހައްދުގައި އޮތް ޔޫއެސްއެސް އަބްރަހާމް ލިންކަންގެ ބަދަލުގައެވެ.
އިތުރު ބޯޓުތަކާއި ސިފައިން ފޮނުވުމާއެކު މެދުއިރުމަތީގައި ހަރަކާތެރިވާ އެމެރިކާގެ ކަނޑުގެ ސިފައިންނާއި މެރިންސްގެ އަދަދު 20،000 އަށް އަރައި، ސަތޭކައިން ގުނާލެވޭ އަދަދަކަށް ހަނގުރާމަމަތީ މަތިންދާބޯޓުތައް އެކުލެވިގެންދާނެއެވެ. މިއީ ފަހުގެ ތާރީޚެއްގައި އެމެރިކާއިން އެ ސަރަހައްދުގައި ކަނޑުގެ ސިފައިންގެ ބާރު މި މިންވަރަށް ވަރުގަދަކުރާ ފުރަތަމަ ފަހަރެވެ.
އެމެރިކާގެ އަސްކަރީ ސްޓްރެޓެޖީ ވަރުގަދަކުރަމުންދާއިރު، އީރާނުން މިދިޔަ ހަފުތާގައި އދ ގެ އާންމު މަޖިލީހުގައި އިއުލާނުކުރި ސުލްހައިގެ ހުށަހެޅުން ރައީސް ޓްރަމްޕް ވަނީ ބާތިލުކުރައްވާފައެވެ.
ގަތަރުގެ ޑިޕްލޮމެޓުން މެދުވެރިކޮށް އެމެރިކާއަށް ފޮނުވި މި ހުށަހެޅުމާ މެދު ވައިޓް ހައުސްގައި ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ، އީރާނުން ބޭނުންވަނީ ހުރުމުޒު ކަނޑުއޮޅި ވަގުތުން ހުޅުވާލުމުގެ އެއްބަސްވުމެއް ގާއިމުކުރަން ކަމަށާއި، އެއީ ހަނގުރާމައިގައި އެމީހުން ބަލިވަމުންދާތީ ކުރާ ކަމެއް ކަމަށެވެ.
މީގެ އިތުރުން، އިސްރާއީލަށް ދަތުރުކުރި ފްލައިޑުބާއީގެ މަތިންދާބޯޓެއްގެ ކޮކްޕިޓް ތެރޭގައި ކެޕްޓަނަށް ހަމަލާދީ ބޯޓު ވައްޓާލަން މަސައްކަތްކުރި ކަމަށް ބުނެ ޔަހޫދީން ކުރަމުންދާ ޕްރޮޕެގެންޑާއަށް ސަޕޯޓު ދިނުމުގެ ގޮތުން އެކަމާ އީރާނާ ގުޅުމެއް އޮތް ކަމަށް ޓްރަމްޕް ވަނީ ތުހުމަތުކުރައްވާފައެވެ.
