ޕޯލަންޑްގެ ވެރިރަށް ވާރްސޯގެ ކޮލެޖެއްގައި ހޮނިހިރު ދުވަހު ހިންގި ވަޅީގެ ހަމަލާއެއްގައި 3 އަންހެނުން ޒަޚަމްވެއްޖެއެވެ. މިއީ އެ ގައުމުގެ ޒުވާނުންގެ މެދުގައި އެކަކު އަނެކަކަށް ކޮޕީކޮށްގެން އަނިޔާވެރި އަމަލުތައް ހިންގުމުގެ ނުރައްކާތެރި އާދައެއް ފެތުރެމުންދާ ކަމަށް ބުނެ އުފެދިފައިވާ ކަންބޮޑުވުންތައް އިތުރަށް ބޮޑުވެގެންދިޔަ ހާދިސާއެކެވެ.
ފުލުހުންގެ ތަރުޖަމާނު ޔާކުބް ފިލިޕިއާކް ވިދާޅުވީ، ހޮނިހިރު ދުވަހު މެންދުރު 12:30 ހާއިރު ނުރައްކާތެރި ހަތިޔާރެއް ބޭނުންކޮށްގެން ހަމަލާއެއް ދީގެން އުޅޭ ކަމުގެ ރިޕޯޓު ފުލުހުންނަށް ލިބިފައިވާ ކަމަށެވެ. މިއާއެކު ހަމަލާގައި ޒަޚަމްވި އެކަކަށް ފުރާނައަށް ނުރައްކާނުވާ ވަރުގެ ގެއްލުންތަކެއް ލިބިގެން ހޮސްޕިޓަލުގައި ދަނީ ފަރުވާދެމުންނެވެ. އަދި މަގުމަތިން ދިޔަ އެހެން ދެ މީހަކަށް ކުދި އަނިޔާތަކެއް ލިބުނު ނަމަވެސް ހޮސްޕިޓަލުގައި އެނދުމަތިކުރަން ޖެހިފައެއް ނުވެއެވެ. ހަމަލާދިން ފަރާތަކީ ކޮލެޖުގައި ތައުލީމު ހާސިލުކުރަމުންދާ އުމުރުން 21 އަހަރުގެ ދަރިވަރެކެވެ.
ޕޯލަންޑްގެ ރަސްމީ ނިއުސް އެޖެންސީ (ޕީއޭޕީ) އިން ރިޕޯޓުކުރި ގޮތުގައި، މި ހަމަލާގައި ޒަޚަމްވެފައިވަނީ ކޮލެޖަށް ރަޖިސްޓްރީވުމުގެ ލިޔެކިޔުންތައް ހުށަހެޅުމަށް ދިޔަ އުމުރުން 17 އަހަރުގެ ދެ އަންހެން ކުއްޖަކާއި 24 އަހަރުގެ އަންހެނެކެވެ. ފުލުހުންގެ އިބްތިދާއީ ތަހުގީގުތަކުން ދައްކާ ގޮތުގައި، ހަމަލާދިން ޒުވާނާއާއި ޒަޚަމްވި ތިން މީހުންގެ މެދުގައި ކުރިން އެއްވެސް ގުޅުމެއް ނެތެވެ.
ފާއިތުވި ދެ ދުވަހު ވެސް ދެ މީހަކު ވަޅިން ހަމަލަ ދީފައި ވެއެވެ.
ފުލުހުން ހޮނިހިރު ދުވަހު ހާމަކުރި ގޮތުގައި، ހުކުރު ދުވަހުން ފެށިގެން މިހާތަނަށް 50,000 އަށްވުރެ ގިނަ ތަންތަން ބަލައި ފާސްކޮށް، 76 މީހަކު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. ކަމާބެހޭ ފަރާތްތަކުން ބުނި ގޮތުގައި ހައްޔަރުކުރެވުނު ގިނަ މީހުންނަކީ މީސް މީޑިއާ އާއި އިންޓަނެޓް މެދުވެރިކޮށް އިންޒާރުތައް ދީފައިވާ ކުޑަކުދިންނެވެ.
މީގެކުރިން، ބުރާސްފަތި ދުވަހު ވާރްސޯގެ އުތުރުގެ ސަރަހައްދެއްގެ ޕްރައިމަރީ ސްކޫލެއްގެ ކުރީގެ ދަރިވަރެއް ކަމަށްވާ އުމުރުން 15 އަހަރުގެ ކުއްޖަކު، ބޮލުގައި ކެމެރާ ހަރުކޮށްފައިވާ ހެލްމެޓެއް އަޅައިގެން ގޮސް ސްކޫލުގެ ސެކިއުރިޓީ ގާޑު މަރާލައި، ދެ މުދައްރިސަކު ވަނީ ޒަޚަމްކޮށްލާފައެވެ.
އެހެން ހާދިސާއެއްގައި ބުދަ ދުވަހު އުމުރުން 19 އަހަރުގެ ޒުވާނަކު، ވާރްސޯގެ އުތުރުގައިވާ އޮސްޓްރޯލެންކާގެ ސްކޫލުގައި 9 މީހަކަށް ހަމަލާދީ ޒަޚަމްކޮށްލުމަށްފަހު އަމިއްލައަށް މަރުވާން އުޅެފައި ވެއެވެ.
މި ހާދިސާތަކާ ގުޅިގެން ޕޯލަންޑްގެ ކަމާބެހޭ މުއައްސަސާތަކުން ދަނީ ސްކޫލްތަކާއި ކޮލެޖްތަކުގެ ސަލާމަތީ ސްޓްރެޓެޖީ އިތުރަށް ވަރުގަދަކޮށް، ޒުވާނުންގެ މެދުގައި ނަފްސާނީ އަދި އިޖުތިމާއީ މައްސަލަތައް ހައްލުކުރުމަށް ޚާއްސަ ފިޔަވަޅުތަކެއް އަޅަމުންނެވެ.
