ވިލާތުގެ ވައިގެ ދަތުރުފަތުރަށް އަމާޒުކޮށް، ގޮވާތަކެތި ހުރި ކަމަށް ބުނެ ދޮގު އިންޒާރު ދިނުމުގެ ސިލްސިލާ އަމަލުތަކެއް ފެށި، އެ ބައްރުގެ ގުޅިފައިވާ ސަލާމަތީ ނިޒާމުތަކަށް ބޮޑެތި މައްސަލަތަކެއް ކުރިމަތިވެއްޖެއެވެ. މި ހަފުތާގެ ތެރޭގައި ތިންވަނަ ފަހަރަށް ހިންގި މި ޙާދިސާތަކާއެކު، ސްޕެއިންގެ ޚާރިޖީ ވަޒީރު ޚޯސޭ މެނުއެލް އަލްބާރޭސް ވަނީ މިއީ ވިލާތާ ދެކޮޅަށް ދެވޭ "ހައިބްރިޑް އުދުވާނެއް" އަދި "ނަފްސާނީ ހަނގުރާމައެއް" ގެ ގޮތުގައި ސިފ ކުރައްވާފައެވެ.
ޑެންމާކުގެ ކޯޕަންހޭގަން އެއާޕޯޓާއި، ޗެކް ރިޕަބްލިކްގެ ޕްރާގް، އިޓަލީގެ ރޯމާއި މިލާން، އަދި ފްރާންސުގެ ވައިގެ ސަރަހައްދުން ދަތުރުކުރި އެކި އެއާލައިންތަކުގެ ފްލައިޓްތަކަށް ވަނީ ގޮވާތަކެތި ހުރި ކަމުގެ އިންޒާރުތައް ލިބިފައެވެ. މި ކަމާ ގުޅިގެން ބައެއް ފްލައިޓްތައް ކުއްލި ޙާލަތުގައި އެހެން އެއާޕޯޓްތަކަށް ޖެއްސުމަށް މަޖުބޫރުވި އިރު، ބައެއް ބޯޓުފަހަރަށް ވަނީ ފައިޓަރު ޖެޓްތަކުގެ އެހީތެރިކަން ފޯރުކޮށްދީފައެވެ. ނަމަވެސް، ފުލުހުންނާއި ސަލާމަތީ އިދާރާތަކުން ބެލި ބެލުމުން އެއްވެސް ބޯޓަކުން ގޮވާތަކެތި ފެނިފައެއް ނުވެއެވެ. އަދި ހުރިހާ ބޯޓެއްވެސް ވަނީ ރައްކާތެރިކަމާއެކު ޖައްސާފައެވެ.
ސަލާމަތީ މާހިރުން ބަޔާންކުރާ ގޮތުގައި، މިއީ ރޭވިގެން ދެވޭ ހައިބްރިޑް ހަމަލާތަކެއްގެ ނިޝާންތަކެކެވެ. މީގެ ކުރިންވެސް ޖަރުމަނުގެ ކަރަންޓު އުފައްދާ މަރުކަޒުތަކަށާއި، ބޯލްޓިކް ސަރަހައްދުގެ ދިފާއީ ވަސީލަތްތަކަށާއި، ފްރާންސުގެ ސުޕަރމާކެޓްތަކުގެ ފިނިކުރާ ނިޒާމުތަކަށް ސައިބަރ ހަމަލާ ދީފައިވާތީ، ގިނަ އޮފިޝަލުން އަންނަނީ މި ކަންކަމަކީ ޔުކްރޭން ހަނގުރާމަ އާ މެދު ވިލާތުން ގެންގުޅޭ ސިޔާސަތުތަކަށް ހުރަސްއެޅުމުގެ ގޮތުން ބަޔަކު ހިންގާ ހަރަކާތްތަކެއް ކަމަށް ތުހުމަތުކުރަމުންނެވެ.
