ކުރީގެ ބޮޑު ވަޒީރު އިމްރާން ޚާންގެ ވެރިކަމުގައި ޕާކިސްތާނުގެ ބުޑިސްޓް ފަތުރުވެރިކަން ކުރިއެރުވުމަށް މަސައްކަތްތަކެއް ފެށްޓެވިއެވެ. ނަމަވެސް މިމަސައްކަތުގައި އަޅާ ނުލެވި، ފާރުވާ ކުޑަ ވުމުން، މިހާރު ހުރަސްތަކެއް ކުރިމަތިވަމުންދާ ކަމަށް މީޑިއާއިން ފާހަގަކުރެވެއެވެ.
މިގޮތުން އާސާރީ ތަންތަނަށް އިހުމާލުވުމާއި، ގަވާއިދާ ޚިލާފަށް އާސާރީ ތަންތަން ކޮނުމާއި ޒަމާނީ ތަރައްޤީއަށް އެތަންތަން ބޭނުން ކުރުމުގެ ސަބަބުން ޕާކިސްތާންގެ އާސާރީ ތާރީޚީ ތަންތަނަށް ނުރައްކާވެފައިވާކަން ފާހަގަކުރެވެއެވެ.
ޕާކިސްތާނަކީ، ޚާއްޞަކޮށް 2،500 އަހަރުގެ ބުޑިސްޓް ޙަޟާރަތެއް އާލާވި މަރުކަޒެކެވެ. ޕާކިސްތާންގެ ގަންދާރާ ސަރަޙައްދަކީ އާސާރީ މަރުކަޒެކެވެ. ނަމަވެސް މިހާރު އެތަނަށް އެކަށީގެންވާ ރައްކާތެރިކަމެއް ނެތް ސަރަޙައްދަކަށް ވެފައިވާ ކަމަށް ބުނެއެވެ.
މީގެ އިތުރުން، ސިންދު އަދި ޕަންޖާބުގައި ދިރިއުޅޭ މަދު އަދަދެއްގެ ބުޑިސްޓުންނަށް އަޅުކަން ކުރުމަށް ބޭނުންވާ ތަންތަން ނެތުމަކީ މިކަމުގެ ބޮޑު މަންޒަރު ހާމަވާ ކަމެއް ކަމަށް މީޑިއާއިން ފާހަގަ ކުރެއެވެ.
ޕާކިސްތާނުގެ ބުދު ދީނަށް އުޅޭ މީހުންގެ އާބާދީ ވަނީ މަދުވަމުން ގޮސްފައެވެ.
ޕާކިސްތާނުގެ މުއްސަނދި އާސާރީ ތަންތަން ދެމެހެއްޓުމަށްތަކައި ހައްލެއް ހޯދުމުގެ ގޮތުން، ޕާލަމެންޓްގައި ބައިމަދު މީހުން ތަމްސީލު ކުރާ ޑރ. ރަމޭޝް ކުމާރު ވަންކުވާނީ ވަނީ "ގަންދަރާ ކޮރިޑޯ ބިލް، 2024″ ގެ ނަމުގައި އައު ބިލެއް ވެސް ތަޢާރަފްކޮށްފައެވެ. މި ބިލުގެ މަޤްޞަދަކީ ޕާކިސްތާނާއި ދުނިޔޭގެ ބުޑިސްޓް މަރުކަޒުތަކާއި ގުޅުވައި ޕާކިސްތާނުގެ ބުޑިސްޓް ތަރިކަ ދުނިޔޭގެ ސަމާލުކަމަށް ގެނަސް، އެކަމަށްޓަކައި ޤާނޫނީ އިދާރާއެއް ޤާއިމްކުރުމެވެ.
އެއަށްފަހު އާސާރީ ތަންތަން ބެލެހެއްޓމުގެ މަސައްކަތް ލާމަރުކަޒު ކުރެވުނެވެ. ނަމަވެސް، މިކަމުގައި އެންމެ ބޮޑު ގެއްލުމެއް ފެނުނީ، ޚައިބަރު ޕަޚްތުންޚްވާގައި ހުރި ގިނަ އާސާރީ ތަންތަނާ އެ ޕްރޮވިންސުން އަޅާ ނުލުމުގެ ސަބބުން ތަންތަން ވީރާނާ ވުމެވެ. އެހެންވެ ޚައިބަރު ޕަޚުތުން ޚުވާގައި ގަވާއިދާ ޚިލާފަށް ގިނަ އާސާރީ ތަންތަން އާންމުންގެ ބާރުގެ ދަށަށް ގޮސް ނައްތާލެވިފައިވާކަން ފާހަގަކުރެވެއެވެ. މިކަމަށް މަސްއޫލު ފަރާތްތަކުން އަޅާލުމެއް ނެތި ކުރިއަށްދާކަމަށްވެސް ކަމާބެހޭ ފަރާތްތަކުން ފާހަގަކުރެއެވެ.
ޕާކިސްތާނަކީ އާދަޔާ ޚިލާފަށް މުއްސަނދި އާސާރީ ތަރިކަތަކެއް ހުރި ސަރަހައްދެއްކަމުން، އެކަށީގެންވާ ފިޔަވަޅުތަކެއް އަވަހަށް ނޭޅިއްޖެނަމަ، ޕާކިސްތާނުގެ މުހިންމު ސަގާފީ ތަރިކައިގެ ބޮޑު ބައެއް އިހުމާލަށް ވެއްޓި، އާންމުންގެ ނަހަމަ ބޭނުންކުރުމުގެ ސަބަބުން އަބަދުގެ އަބަދަށް ގެއްލިގެން ހިނގައިދާނެކަމުގެ ބިރު އޮތް ކަމަށް ފާހަގަ ކުރެވެއެވެ.
