އިންޑިއާގެ ވެރިރަށް ނިއުދިއްލީގައި ބޭއްވުނު 10 ވަނަ ރައިސިނާ ޑައިލޮގްގައި އިންޑިއާގެ ދުނިޔޭގެ ލީޑަރޝިޕްގައި ކުރިއަރަމުން އަންނަކަން ފާހަގަކުރެވިއްޖެއެވެ. މި ފޯރަމްގައި 130 ގައުމަކުން 3،700 އަށްވުރެ ގިނަ ބައިވެރިންނާއި 800 އަށްވުރެ ގިނަ ތަޖުރިބާކާރުން ވާހަކަ ދެއްކިއެވެ.
އޮސްޓްރޭލިއާގެ ކުރީގެ ބޮޑުވަޒީރު ޓޯނީ އެބޮޓް ވިދާޅުވީ، ރައިސީނާ ޑައެލޮގްގައި ގިނަ ބަޔަކު ހިއްސާކުރާ އުންމީދުތަކެއްގެ ވާހަކަ އަޑުއިވިފައިވާ ކަމަށެވެ. އެ ވާހަކަތަކަކީ، ޑިމޮކްރެޓިކް ސަޕްލައި ޗޭންތަކުގައި ޗައިނާގެ ބަދަލުގައި އިންޑިއާ މިނިވަން ދުނިޔޭގެ ލީޑަރެއްގެ ގޮތުގައި އުފެދިދާނެ ކަމުގެ އުންމީދެވެ.
އިންޑިއާގެ އެކްސްޓާނަލް އެފެއާޒް މިނިސްޓަރު އެސް ޖައިޝަންކަރު ވަނީ ތާރީޚީ ގޮތުން ތަރުތީބު ނުކުރެވޭ ދުނިޔޭގެ ނިޒާމެއްގެ ތެރޭގައި އިންޑިއާގެ ޚާއްސަ ހާލަތަށް އަލިއަޅުވާލައްވާފައެވެ. އޭނާ ފާހަގަކުރެއްވި ގޮތުގައި، އިންޑިއާގެ ބޮޑުވަޒީރު ނަރެންދްރަ މޯދީގެ ވެރިކަމުގައި އިންޑިއާ މިހާރު ވަނީ، ދުނިޔޭގެ ފަސްވަނައަށް އެންމެ ބޮޑު އިގްތިސާދަށް ވެފައެވެ. އަދި އެންމެ އާބާދީ ބޮޑު ގައުމު އަންނަނީ ތިންވަނަ މަގާމަށް ލޯ އަޅަމުންނެވެ.
މި ކޮންފަރެންސްގައި ސިޔާސީ ކަންކަމާއި، ފެހި ހަކަތައާއި، ޑިޖިޓަލް ގަވަރނަންސްއާއި، ވިޔަފާރިއާއި، ތަރައްޤީއާއި، ސުލްޙައާ ބެހޭގޮތުން ވެސް މަޝްވަރާކުރެވުނެވެ. މިއީ އިންޑިއާގެ ދުނިޔޭގެ ތަޞައްވުރު ދައްކުވައިދޭ ކަންކަން ކަމަށްވެސް ފާހަގަ ކުރެވުނެވެ. އިންޑިއާގެ ޑިމޮކްރެޓިކް ހަމަތަކާއި އަދި އެހެން ގައުމުތަކުން ބާއްވާ ކޮންޓްރޯލްޑް ފޯރަމްތަކާ ތަފާތު ގޮތަކަށް ރައިސީނާ ޑައެލޮގްގައި ވަނީ ފާޅުކަން ބޮޑު ބަހުސްތަކެއް ކޮށްފައެވެ.
ނިއުޒީލެންޑްގެ ބޮޑުވަޒީރު ކްރިސްޓޮފަރ ލަކްސަން ޗީފް މެހެމާނެއްގެ ގޮތުގައި ބައިވެރިވެވަޑައިގެންނެވި މި ރައިސީނާ މަޝްވަރާގައި، އިންޑިއާގެ އިންޑޯ-ޕެސިފިކް އެންގޭޖްމަންޓާއި ބައިބައިވެފައިވާ ދުނިޔޭގައި ހޯދަމުންދާ ތަފާތު ހައިސިއްޔަތަށް އަލިއަޅުވާލެވުނެވެ.
މި ފޯރަމްގައި އިންޑިއާގެ ސްޓްރެޓެޖިކް އޮޓޮނޮމީގެ ސަބަބުން ބައިބައިވުންތަކުގެ ތެރެއިން ޕާޓްނަޝިޕްތައް ގާއިމްކުރެވުނު ގޮތް ވެސް ބައިވެރިން ފާހަގަކުރިއެވެ. މިއީ ދުނިޔޭގެ މަސްރަޙުގައި އިންޑިއާގެ އިތުރަށް ފުޅާވަމުން އަންނަ ދައުރުގެ ހެއްކެއް ކަމުގައި ބެލެވެއެވެ.
