ބަންގްލަދޭޝްގެ ކުރީގެ ބޮޑުވަޒީރު ޝެއިޚް ހަސީނާ ވެރިކަމުން ދުރުކޮށްލުމަށް ހިންގުނު އަނިޔާވެރި ހަމަނުޖެހުންތަކަށް އަހަރެއްހާ ދުވަސް ފާއިތުވެގެން ދިޔަ ނަމަވެސް، އެ ޤައުމުގެ ޒުވާނުންގެ ވަޒީފާގެ ދަތިކަން ހައްލު ކުރުމުގައި އައު ސަރުކާރުން ކާމިޔާބު ވެފައެއް ނުވެއެވެ.
ބަނގްލަދޭޝްގެ ހަމަނުޖެހުންތަކުގެ ސަބަބުން 1،400 އަށްވުރެ ގިނަ މީހުން މަރުވެފައިވެއެވެ. މި ހަމަނުޖެހުމަށް މިމަހު 5 ގައި އަހަރު ފުރޭނެއެވެ.
މި ހަމަނުޖެހުން ފެށިގެން އައީ ސިވިލް ސަރވިސްގެ ވަޒީފާތަކަށް މީހުން ހޯދުމުގައި ވަކި ބަޔަކަށް ޚާއްޞަކޮށް އިސްކަން ދީފައިވާ ކޯޓާގެ މައްސަލައާ ގުޅިގެންނެވެ. ސަރުކާރުގެ ވަޒީފާތަކުގެ ދެބައިކުޅަ އެއްބައި ޚާއްޞަކޮށްފައި އޮތީ ވެރިކަން ކުރާ ޕާޓީގެ މީހުންނާއި އަންހެނުންނާއި، ނުކުޅެދުންތެރިކަން ހުންނަ ފަރާތްތަކާއި، 1971 ވަނަ އަހަރުގެ މިނިވަންކަމުގެ ހަނގުރާމައިގެ ޝަހީދުންގެ ދަރިންނަށެވެ. ނަމަވެސް، އޭގެ ފަހުން އެ ޤައުމުގެ ހައިކޯޓުން ވަނީ މި ކޯޓާގެ ނިސްބަތް 7 އިންސައްތައަށް ދަށްކޮށްފައެވެ.
ހަމަނުޖެހުންތަކަށް ފަހު، ނޮބެލް ޕްރައިޒް ލިބިވަޑައިގެންފައިވާ މުޙައްމަދު ޔޫނުސްގެ އިސްނެންގެވުމުގެ ދަށުން ވަގުތީ ސަރުކާރެއް އުފެދި، ފުޅާ ދާއިރާއެއްގައި އިޞްލާޙީ އެޖެންޑާއެއް އެކުލަވާލާފައިވީ ނަމަވެސް، ކަންކަން ރަނގަޅުވާ ކަމުގެ ނިޝާނެއ ނުފެނެއެވެ. ޒުވާނުންނަށް ވަޒީފާގެ ފުރުޞަތުތައް ހޯދައިދިނުމަކީ އަދިވެސް ބޮޑު ގޮންޖެހުމެއްކަމަށް ތަޖުރިބާކާރުން ފާހަގަކުރެއެވެ. މީގެ އިތުރުން، ފެކްޓަރީތައް ބަންދުކުރުމުގެ ސަބަބުން ވަޒީފާގެ ފުރުޞަތުތައް އިތުރަށް ދަށްވެފައިވެއެވެ.
އިންޓަނޭޝަނަލް ލޭބަރ އޯގަނައިޒޭޝަން (އައިއެލްއޯ) ގެ ތަފާސްހިސާބުތަކުން ދައްކާ ގޮތުގައި، ބަންގްލަދޭޝްގެ ޒުވާނުންގެ ތެރެއިން ގާތްގަނޑަކަށް 30 އިންސައްތަ މީހުންނަކީ ވަޒީފާއެއް ނެތި އުޅޭ މީހުންނެވެ،
