މިއަހަރުގެ ފުރަތަމަ 26 ހަފްތާގައި ދައުލަތުގެ ބަޖެޓުން ސަބްސިޑީއަށް ޚަރަދުކޮށްފައިވާ މިންވަރު، މިދިޔަ އަހަރުގެ މި މުއްދަތާ އަޅާބަލާއިރު 19 އިންސައްތަ ދަށްވެފައިވާ ކަމަށް މާލީ ވުޒާރާގެ އެންމެ ފަހުގެ ރިޕޯޓުން ދައްކައިފިއެވެ. މި މުއްދަތުގައި ސަބްސިޑީއަށް ޖުމްލަ 1.6 ބިލިޔަން ރުފިޔާ ޚަރަދުކޮށްފައިވެއެވެ.
މާލީ ވުޒާރާއިން ކޮންމެ ހަފްތާއަކު އާންމުކުރާ ތަފާސްހިސާބުތަކުން އެނގޭގޮތުގައި، ގްރާންޓް، ކޮންޓްރިބިއުޝަން އަދި ސަބްސިޑީއަށް މިހާތަނަށް ޖުމްލަ 4.9 ބިލިޔަން ރުފިޔާ ޚަރަދުކޮށްފައި ވެއެވެ. މިއީ މިދިޔަ އަހަރުގެ މި މުއްދަތުގައި ޚަރަދު ކޮށްފައިވާ 5.2 ބިލިޔަން ރުފިޔާއަށްވުރެ ދަށް އަދަދެކެވެ. ސަބްސިޑީ ޚަރަދު ދަށްވެފައިވުމަކީ ދައުލަތުގެ ބަޖެޓް މެނޭޖު ކުރުމަށް ގެނަސްފައިވާ ބަދަލު ފާހަގަ ކޮށްދޭ ކަމެކެވެ.
ސަބްސިޑީއަށް ޚަރަދުކުރި މިންވަރު ދަށްވެފައިވީ ނަމަވެސް، ޞިއްޙީ ދާއިރާގެ އެންމެ ބޮޑު ސަބްސިޑީ ސްކީމް ކަމަށްވާ އާސަންދައަށް ކުރި ޚަރަދު ވަނީ އިތުރުވެފައެވެ. މިހާތަނަށް އާސަންދައަށް 1 ބިލިޔަން ރުފިޔާ ޚަރަދުކޮށްފައިވާއިރު، މިއީ މިދިޔަ އަހަރުގެ މި މުއްދަތަށްވުރެ 9.9 އިންސައްތަ އިތުރު އަދަދެކެވެ. މީގެ އިތުރުން، ރާއްޖޭގެ ކައުންސިލްތަކަށް ދައުލަތުން ދޭ ގްރާންޓް ވަނީ 4.4 އިންސައްތަ ދަށްވެ، 1 ބިލިޔަން ރުފިޔާއަށް އަރާފައެވެ.
ހަފްތާ ރިޕޯޓް: މިއަހަރުގެ ޖުލައި 17 ގެ ނިޔަލަށް ދައުލަތުގެ ބަޖެޓުން ޖުމްލަ 19.4 ބިލިޔަން ރުފިޔާ ޚަރަދުކޮށްފައިވާއިރު، އާމްދަނީއާއި ހިލޭ އެހީގެ ގޮތުގައި 20.5 ބިލިޔަން ރުފިޔާ ލިބިފައިވެއެވެ. މިދިޔަ އަހަރުގެ މި މުއްދަތުގައި ދައުލަތަށް ލިބިފައިވަނީ 19 ބިލިޔަން ރުފިޔާއެވެ. މިއީ ދައުލަތުގެ އާމްދަނީ އިތުރުވެ، ބަޖެޓްގެ ދަރަނި ކުރެވޭ ކަމުގެ ނިޝާނެކެވެ.
