ދުނިޔޭގެ އިގްތިސާދަށް އަންނަމުންދާ ލޮޅުންތަކާއި މާލީ ގޮންޖެހުންތަކުގެ ތެރެއިންވެސް، ދިވެހިރާއްޖޭގެ ދާޚިލީ އިގްތިސާދީ ހާލަތު ހަރުދަނާދަކަން ހާމަކޮށްދެމުން، ދައުލަތަށް ލިބުނު ޓެކްސް އާމްދަނީ އިތުރުވެއްޖެއެވެ. މިއާއެކު، މިއަހަރުގެ އޯގަސްޓް މަހުގެ ކުރީކޮޅާ ހަމައަށް ދައުލަތަށް ލިބުނު ޖުމްލަ އާމްދަނީ ވަނީ ނިމިދިޔަ އަހަރުގެ އެ މުއްދަތާ އަޅާބަލާއިރު 9.3 އިންސައްތައިގެ ކުރިއެރުމެއް ހޯދާފައެވެ.
މިނިސްޓްރީ އޮފް ފައިނޭންސް އެންޑް ޕަބްލިކް އެންޓަރޕްރައިޒަސްއިން އާންމުކޮށްފައިވާ އެންމެ ފަހުގެ ވިކްލީ ފިސްކަލް ޑިވެލޮޕްމަންޓްސް ރިޕޯޓުން ދައްކާ ގޮތުގައި، 06 އޯގަސްޓް 2026 ގެ ނިޔަލަށް ދައުލަތަށް އާމްދަނީ އާއި ހިލޭ އެހީގެ ގޮތުގައި 26.5 ބިލިއަން ރުފިޔާ ވަނީ ލިބިފައެވެ. މިއީ ފާއިތުވި އަހަރުގެ އެ މުއްދަތުގައި ލިބުނު 24.2 ބިލިއަން ރުފިޔާއާ އަޅާބަލާއިރު އިގްތިސާދީ ފުޅާމިނާއި ވިޔަފާރީގެ ހަރަކާތްތައް އިތުރުވަމުންދާކަމުގެ ނިޝާނެކެވެ.
ޓެކްސް އިތުރުވުމާއި ވިޔަފާރީގެ ނަފާ
ދައުލަތުގެ މާލީ އަސާސް ކަމުގައިވާ ޓެކްސް އާމްދަނީ ވަނީ 18.7 ބިލިއަން ރުފިޔާއިން 20.5 ބިލިއަން ރުފިޔާއަށް (10.1 އިންސައްތަ) މައްޗަށް ގޮސްފައެވެ. މީގެ ތެރެއިންވެސް އެންމެ ފާހަގަކޮށްލެވޭ ކުރިއެރުމެއް ހޯދާފައިވަނީ އާންމު މުދަލާއި ޚިދުމަތުގެ އަގުން ނެގޭ ޓެކްސް (ޖީ.ޖީ.އެސް.ޓީ) އާއި ކޯޕަރޭޓް އިންކަމް ޓެކްސްއެވެ.
- ޖީ.ޖީ.އެސް.ޓީ: 10.4 އިންސައްތައިގެ ކުރިއެރުމަކާއެކު 3.4 ބިލިއަން ރުފިޔާ.
- ކޯޕަރޭޓް އިންކަމް ޓެކްސް: 1.4 އިންސައްތައިގެ އިތުރުވުމަކާއެކު 2.7 ބިލިއަން ރުފިޔާ.
- ވިޔަފާރީގެ ފައިދާއިން ނަގާ ޓެކްސް: 18.5 އިންސައްތައިގެ ފާހަގަކޮށްލެވޭ އިތުރުވުމަކާއެކު 5.3 ބިލިއަން ރުފިޔާ.
އިމްޕޯޓް ޑިއުޓީން ލިބުނު އާމްދަނީ 13.2 އިންސައްތަ އިތުރުވެ 2.0 ބިލިއަން ރުފިޔާއަށް އަރާފައިވުމާއި، ގްރީން ޓެކްސް އަދި އެއާޕޯޓް ސަރވިސް ޗާޖުގެ އާމްދަނީ އިތުރުވުމަކީ ދިވެހިރާއްޖޭގެ މާކެޓަށް އެތެރެކުރެވޭ މުދަލާއި ފަތުރުވެރިކަމުގެ ދާއިރާއަށް އޮތް އިތުބާރު ދެމިއޮތްކަމުގެ ހެކިތަކެކެވެ.
