ބަންގްލަދޭޝްގެ ސަރުކާރުން ވަނީ އޮގަސްޓް 5 ވަނަ ދުވަސްވާ އަންގާރަ ދުވަހަކީ ޖުލައި މަހުގެ އުތުރިއެރުމުގެ އަހަރީ ދުވަސް ފާހަގަކުރުމުގެ ގޮތުން ރަސްމީ ބަންދު ދުވަހެއްގެ ގޮތުގައި ކަނޑައަޅާފައެވެ.
މި ބަންދަކީ މިދިޔަ އަހަރު ދަރިވަރުން އާންމު ހަރަކާތަށް ނުކުމެ ސަރުކާރު ވައްޓާލުމަށް މުޒާހަރާތައް ބޭއްވި މުނާސަބާގެ ކާމިޔާބީ ފާހަގަ ކުރާ ދުވަހެވެ. މި މުނާސަބާ ފާހަގަކުރުމަށް 36 މެންބަރުންގެ ކޯޑިނޭޓިންގ ކޮމިޓީއެއް އެކުލަވާލާފައި ވެއެވެ. އަދި ޖުލައި 1 އިން އޮގަސްޓް 5 އަށް 36 ދުވަހުގެ ޕްރޮގްރާމެއް ބަނގްލަދޭޝްގެ އެކި ހިސާބުތަކުގައި ގެންދަނީ ބާއްވަމުންނެވެ.
މިނިސްޓްރީ އޮފް ކަލްޗަރަލް އެފެއާޒުން އިންތިޒާމްކުރާ މި ހަރަކާތްތައް ހެނދުނު 11:00 އިން ފެށިގެން ކުރިއަށް ގެންދާނެއެވެ. އަދި ހަވީރު 5:00 ގައި ޖުލައި މަހުގެ އިއުލާން ރަސްމީކޮށް އިއްވުން އޮންނާނެ އެވެ. އަދި ރޭގަނޑު 8:00 ގައި ބޭންޑް އާޓްސެލްގެ ހާއްސަ މިއުޒިކަލް ޕާފޯމަންސެއް ވެސް ބާއްވާނެއެވެ.
މާދަމާ ބަންގްލަދޭޝްގެ ހުރިހާ ބޭންކުތަކެއް ބަންދު ވާނެއެވެ. ނަމަވެސް އޭޓީއެމް، އޮންލައިން އަދި މޮބައިލް ބޭންކިންގ ފަދަ ޑިޖިޓަލް ޚިދުމަތްތައް ލިބެން ހުންނާނެއެވެ. މީގެ އިތުރުން ލީސިންގ ކުންފުނިތަކާއި އެހެނިހެން މާލީ މުއައްސަސާތައްވެސް ބަންދުވާނެއެވެ.
ސަރުކާރުގެ އޮފީސްތަކާއި، ސަރުކާރު މުއައްސަސާތަކުގެ އިތުރުން ސްޓޮކް އެކްސްޗޭންޖްތައްވެސް ބަންދު ކުރުމަށް ނިންމާފައި ވެއެވެ. އަދި އަމިއްލަ ޖަމްއިއްޔާތަކަށްވެސް އެމީހުންގެ އިޚްތިޔާރުގައި ބަންދު އިއުލާންކުރުމުގެ ފުރުސަތު އޮންނާނެއެވެ.
