ބަނގްލަދޭޝްގެ ވަގުތީ ސަރުކާރުން ވަނީ ރޯހިންގާ ރެފިއުޖީން މިޔަންމާގެ އަރަކާން ސަރަހައްދަށް އަނބުރާ ފޮނުވާލުމަށް ސިއްރު ޕްލޭނެއް އެކުލަވާލާފައެވެ. މީޑިއާ ރިޕޯޓްތައް ބުނާ ގޮތުގައި މިއީ ކުރިން ހުށަހަޅާފައިވާ "ރާކައިން ކޮރިޑޯ" ގެ ޕްލޭން ދޫކޮށްލުމަށްފަހު އަލުން އެކުލަވާލާފައިވާ ޕްލޭނެކެވެ.
މި ޕްލޭންގެ ތަފްސީލުތަކާ ބެހޭ ގޮތުން ރިޕޯޓް ކުރަމުން މީޑިއާއިން ބުނަނީ، މި ޕްލޭންގައި ރޯހިންގާ ހަނގުރާމަވެރިންނަށް ހަތިޔާރު ދިނުމާއި ތަމްރީނު ދިނުން ހިމެނޭ ކަމަށެވެ. އަދި މިކަމަކީ، މިއީ ރޮހިންގާ ސަރަހައްދުގައި ހަރަކާތްތެރިވާ އަރަކާން އާމީ (އޭއޭ) އާ ދެކޮޅަށް ކުރިއަށް ގެންދާ މަސައްކަތެއް ކަމަށް ބެލެވެއެވެ. އަރަކާން އާމީން މިހާރު ވަނީ ރާކައިން ސްޓޭޓްގެ 17 ސަރަހައްދަކުން 14 ސަރަހައްދެއް އެމީހުންގެ ބަރުގެ ދަށަށް ގެނަސްފައެވެ.
ރޯހިންގިޔާ ސޮލިޑަރިޓީ އޯގަނައިޒޭޝަން (އާރްއެސްއޯ) އަކީ މީގެ ކުރިން ރޮހިންގާ ގެ މައްސަލަތަކުގައި ވާހަކަ ދައްކަިއ ހެދި ޖަމުއިއްޔާއެކެވެ. ނަމަވެސް މި ޖަމުއިއްޔާ ވަނީ އެތައް އަހަރެއް ވަންދެން ހަރަކާތެއް ނެތި ގޮސްފައެވެ. އެހެން ނަމަވެސް އައު ޕްލޭނާއެކު ރޯހިންގިޔާ ސޮލިޑަރިޓީ އޯގަނައިޒޭޝަން (އާރްއެސްއޯ) އަލުން ހަރަކާްތތެރިވާ ކަމަށް ރިޕޯޓުތަކުން ދައްކައެވެ. މީސްމީޑިއާގައި އާންމުކޮށްފައިވާ ފޮޓޯތަކުން ދައްކާގޮތުގައި އަރަކާންގައި ހަތިޔާރު ހިފައިގެން ރޮހިންގާއިން މާޗް ކުރަމުންދާ މަންޒަރު ފެނެއެވެ. މިއީ ސަރަހައްދީ ސިޔާސީ ގޮންޖެހުންތައް އިތުރުވާނެ ކަމެއް ކަމަށް ބެލެވެއެވެ. މި ކަމުގައި ޕާކިސްތާނުން ބަނގްލަދޭޝަށް އެހީ ތެރިވާ ކަމަށާއި، ޕާކިސްތާންގެ އިންޓެލިޖެންސް އޮފިސަރުންނާއެކު ރޮހިންގާ ސަރަހައްދުގެ ބޯޑަރު ސާރވޭ ކޮށްފައިވާ ކަމަށް ރިޕޯޓްތައް ބުނެއެވެ. އިންޑިއާއިން ވަނީ މިކަމާ ގުޅިގެން ކަންބޮޑުވުން ފާޅުކޮށްފައެވެ.
ބަނގްލަދޭޝްއިން ވެސް ވަނީ މި މައްސަލަ ބައިނަލްއަޤްވާމީ ފޯރަމްތަކުގައި އަމިއްލައަށް އިސްނަގައިގެން މަޝްވަރާ ކުރުމަށް ނިންމާފައެވެ. ނަމަވެސް، އަސްކަރީ ބާރު ބޭނުން ކޮށްގެން ރެފިއުޖީން އަނބުރާ ފޮނުވާލުމުގެ ސްޓްރެޓެޖީއަކީ މިޔަންމާ ބަނގްލަދޭޝް ސަރަހައްދުގައި އިތުރު ހަމަނުޖެހުން އުފެދުމަށް މަގުފަހިވެދާނެ ކަމެއް މުހައްލިލުން ފާހަގަ ކުރެއެވެ.
