ދެކުނު އޭޝިއާގައި ގުދުރަތީ ކާރިސާތައް ދަނީ އާދަޔާ ޚިލާފަށް އިތުރު ވަމުންނެވެ. ދެކުނު އޭޝިއާ ސަރަހައްދުގައި ދިމާވާ ކާރިސާތަކަށް އެންމެ އިތުބާރުހުރި ގޮތެއްގައި ފުރަތަމަ އެހީތެރިއެއްގެ ގޮތުގައި އަބަދުވެސް އިންޑިއާ ހަކަރާތްތެރިވާކަން ފާހަގަ ކުރެވެއެވެ. ސަރަހައްދުގެ ގައުމުތަކުގެ އިތުރުން އެހެން ހިސާބުތަކަށް ދިމާވާ ބިންހެލުމާއި، ސައިކްލޯންތަކާއި، ރެފިއުޖީންގެ ހާލަތާއި، ބަލި ފެތުރުމުގެ ކާރިސާތަކުގައި އިންޑިއާ އިން ވަނީ އެހީތެރިކަން ފޯރުކޮށްދިނުމުގައި މުހިންމު ހުނަރުތަކެއްް ހޯދާފައެވެ. އަދި މިދާއިރާގައި އެގައުމުގެ ސްޓްރެޓެޖިކް އެހީތެރިކަން ފޯރުކޮށްދިނުމުގެ ދައުރުވެސް ވަނީ ފުޅާ ވެގެން ގޮސްފައެވެ.
1970 އިން ފެށިގެން ދެކުނު އޭޝިއާގައި ގުދުރަތީ ކާރިސާތައް ފަސް ގުނައަށް އިތުރުވެފައިވާ ކަމަށް ދައްކައެވެ. މިކަމުގެ ސަބަބުން ސަރަހައްދުގެ ގައުމުތަކަށް 80 ބިލިއަން އެމެރިކާ ޑޮލަރުގެ އިގްތިސާދީ ގެއްލުމާ ކުރިމަތިލާން ޖެހެއެވެ. މި ސަރަހައްދަކީ ފެންބޮޑުވުމާއި، ސައިކްލޯންތަކާއި، ބިންހެލުންތަކަށް ވަރަށް ބޮޑަށް ހާމަވެފައިވާ ސަރަހައްދެކެވެ.
އިންޑިއާއިން ކާރިސާތަކުގައި ދޭ އިންސާނީ އެހީތެރިކަމުގެ ލީޑަރޝިޕް ފާހަގަކުރެވުނީ 2004 ވަނަ އަހަރުގެ އިންޑިއާ ކަނޑުގެ ސަރަހައްދުގެ ގައުމުތަކަށް ކުރިމަތިވި ސުނާމީގައެވެ. އެ ކާރިސާގައި އިންޑިއާއަށްވެސް ބޮޑެތި ގެއްލުންތަކެއް ލިބުނެވެ. ނަމަވެސް، އިންޑިއާއިން ބޭރުގެ އެހީ ބަލައި ގަނެފައެއް ނުވެއެވެ. އަދި ސްރީލަންކާ އާއި ދިވެހިރާއްޖެއަށް އެހީތެރިކަން ފޯރުކޮށްދިނެވެ. އޭގެ އިތުރުން ބަންގްލަދޭޝް، މިޔަންމާ އަދި ނޭޕާލްގައި ދިމާވި ކާރިސާތަކުގައިވެސް އިންޑިއާއިން ވަނީ މަދފު ވަގުތުކޮޅެއްގެ ތެރޭގައި އެހީތެރިކަން ފޯރުކޮށްދީފައެވެ.
2015 ވަނަ އަހަރު ނޭޕާލްގައި ހިނގި ބޮޑު ބިންހެލުމުގައި ކުރިއަށް ގެންދިޔަ "އޮޕަރޭޝަން މައިތްރީ" އަކީ އިންޑިއާގެ އެންމެ ބޮޑު ބޭރުގެ އެހީތެރިކަމުގެ މިޝަނެވެ. އަދި ފަހުން 2025 ގައި މިޔަންމާގައި ހިނގި ބިންހެލުމުގައި "އޮޕަރޭޝަން ބްރަހްމާ" ގެ ދަށުން 60 އެނދުގެ ޓްރޯމާ ސެންޓަރަކާއި، 80 މެންބަރުންގެ ޚާއްސަ އެހީދޭ ޓީމަކާއެކު 52 ޓަނުގެ އެހީގެ ތަކެތި ފޯރުކޮށްދީ ފައި ވެއެވެ.
އިންޑިއާގެ އެހީތެރިކަން ހިމެނިގެން ދަނީ ހަމައެކަނި ގުދުރަތީ ކާރިސާތަކުގައި އެކަންޏެއް ނޫނެވެ. ކޮވިޑް-19 ބަލިމަޑުކަމުގައި އިންޑިއާއިން ވަނީ 82 ގައުމަކަށް ހިލޭ ބޭސް އަދި ރައްކާތެރިކަމުގެ ސާމާނު ފޯރުކޮށްދީފައެވެ. އަދި 2017 ގައި ރޮހިންގާ ރެފިއުޖީންގެ ހާލަތުކުރިމަތި ވުމުން "އޮޕަރޭޝަން ހިއުމެނިޓީ" ގެ ދަށުން މިޔަންމާއަށް އެކަނި ވެސް 6.4 މިލިއަން ޑޮލަރުގެ އެހީ ފޯރުކޮށްދީފައި ވެއެވެ.
