ބަނގްލަދޭޝްގެ ކުރީގެ ބޮޑުވަޒީރު ޝެއިޚް ހަސީނާ ވެރިކަމުން ދުރުކުރެވުނުތާ އަހަރެއް ފާއިތުވެގެން ދިޔައިރު، އެ ޤައުމުގައި ހަމަނުޖެހުމާއި އިޤްތިޞާދީ ހީނަރުކަން އިތުރުވެ، ސިޔާސީ ހަރުކަށި ފަރާތްތަކުގެ ނުފޫޒު ފުޅާވަމުންދާކަމަށް ބެލެވެއެވެ. ނޯބަލް އިނާމު ހާސިލުކޮށްފައިވާ މުހައްމަދު ޔޫނުސްގެ ވަގުތީ ސަރުކާރުން އަމަން އަމާންކަން ޤާއިމުކުރުމަށް ކުރަމުންދާ މަސައްކަތްތައް ކާމިޔާބު ވަމުންދާ ތަނެއް ނުފެންނަ ކަމަށް މީޑިއާއިން ދެކެއެވެ.
އާންމު ހަމަނުޖެހުންތަކާއި ހުޅުޖެހުން ކޮންޓްރޯލު ކުރުމަށް "އޮޕަރޭޝަން ޑެވިލް ހަންޓް" ގެ ނަމުގައި ސިފައިންނާއި ފުލުހުން ގުޅިގެން ހިންގަމުންދާ އޮޕަރޭޝަންގައި މިހާތަނަށް 1،500 އަށްވުރެ ގިނަ މީހުން ހައްޔަރު ކޮށްފައި ވެއެވެ. މި އޮޕަރޭޝަން ފެށިފައިވަނީ އާންމުންގެ މެދުގައި އަނިޔާވެރިކަން އިތުރުވެ، ހަރުކަށި ފިކުރުގެ ހަރަކާތްތައް އިތުރު ވުމާ ގުޅިގެންނެވެ.
ތަހުލީލުކުރާ ފަރާތްތަކުން ދެކެނީ ބަނގްލަދޭޝްގެ ހާލަތު މިސްރުގެ ސަރުކާރާ ދެކޮޅަށް ނިކުތް އަރަބި ރަބީޢު ފަދަ ހާލަތަކަށް ބަދަލުވުމުގެ ނުރައްކާ މިހރު ފެންނަ ކަމަށެވެ. ޒުވާނުންގެ މެދުގައި ހަރުކަށި ކަން އިތުރު ވުމާއި މިޔަންމާ އާ ދެމެދު އޮންނަ ރޮހިންގާއާ ގުޅޭ ސަރަހައްދީ ހަމަނުޖެހުންތަކާއި، އަދި އޭގެ އިތުރުން ދައުލަތުގެ މުއައްސަސާތައް ބަލިކަށި ވުމަކީ ދުރު ރާސްތާގެ އަމާންކަމަށް ނުރައްކާވެދާނެ ކަންކަން ކަމުގައި މުހައްލިލުން ދަނީ ފާހަގަ ކުރަމުންނެވެ.
ބަނގްލަދޭޝްގައި ގިނަ އަދަދަކަށް އުޅޭ ރޯހިންގާ ރެފިއުޖީންގެ މައްސަލައަށް ހައްލެއް ހޯދުމަށް އަދިވެސް ސަރުކާރާއި ސިފައިން މަސައްކަތް ކުރަމުންދާއިރު، ޤައުމީ އެއްބައިވަންތަކަމަށް މަސައްކަތް ކުރުމަށްވެސް ގޮވާލުންތައް ގޮވާލަމުން ދެއެވެ.
ފައިލް ފޮޓޯ
