ޖަޕާނުގެ ބޮޑުވަޒީރު ޝިގެރޫ އިޝިބާ މިއަދު އިސްތިއުފާ ދެއްވައިފިއެވެ. މިއީ ދުނިޔޭގެ ހަތަރުވަނައަށް އެންމެ ބޮޑު އިގްތިސާދަށް ގޮންޖެހުންތައް ކުރިމަތިވާނެ ކަމެއް ކަމަށް ބެލެވެއެވެ. އިޝިބާ މަގާމުން އިސްތިއުފާ ދެއްވީ އިންތިޚާބުގައި އޭނާގެ ޕާޓީއަށް އެކަށީގެންވާ ކާމިޔާބީއެއް ހޯދިފައި ނުވުމުންނެވެ.
މީގެ އެންމެ އަހަރެއްހާ ދުވަސް ކުރިން ވެރިކަމާ ހަވާލުވެވަޑައިގަތް އިޝިބާގެ ދައުރުގައި، ދިރިއުޅުމުގެ އަގުތައް މައްޗަށް ދިއުމާ ގުޅިގެން އާންމުން ވަނީ ސަރުކާރު ދެކެ ނުރުހުންފާޅުކޮށްފައެވެ. ޕާލަމެންޓުގެ ދެގޭގެ އިންތިޚާބުތަކުގައި ވެރިކަން ކުރާ ކޯލިޝަނަށް މިހާރު ވަނީ މެޖޯރިޓީ ގެއްލިފައެވެ.
އިޝިބާގެ އިސްތިއުފާ އިއުލާން ކުރެއްވީ އެމެރިކާއާއެކު ކުރިއަށް ގެންދިޔަ ވިޔަފާރި މަޝްވަރާތަކުގައި ޖަޕާނަށް ކުރިއެރުން ހޯއްދަވައި ދެއްވުމަށްފަހުއެވެ. ސިޔާސީ ހަލަބޮލިކަމާ ގުޅިގެން ޖަޕާނުގެ ޔެންއާއި ސަރުކާރުގެ ބޮންޑުތަކުގެ އަގު ވަނީ ދަށަށް ގޮސްފައެވެ.
ބޮޑު ވަޒީރު ކަމުގެ މަގާމަށް، އިޝިބާގެ ބަދަލުގައި ދެން ކުރިމަތި ލައްވާނީ، ލިބަރަލް ޑިމޮކްރެޓިކް ޕާޓީގެ ތަޖުރިބާކާރު ސަނާއޭ ތަކައިޗީ ފަދަ، މާލީ ސިޔާސަތު ކުރިއެރުވުމަށް ބާރުއަޅުއްވާނެ ބޭފުޅެއް ކަމަށް ބެލެވެއެވެ. މީގެ އިތުރުން، އިޝިބާގެ ދަށުން ދިރިއުޅުމުގެ އަގުތައް މައްޗަށް ދިއުން ހުއްޓުވުމަށް މަސައްކަތް ކުރެއްވި، މަޝްހޫރު ޝިންޖިރޯ ކޮއިޒުމީވެސް ވަނީ އާ ލިބަރަލް ޑިމޮކްރެޓިކް ޕާޓީގެ އައު ލީޑަރެއްގެ ގޮތުގައި ފާހަގަކުރެވިފައެވެ.
