ބަނގްލަދޭޝް ބޭންކުގެ އެންމެ ފަހުގެ ތަފާސްހިސާބުތަކާއި ޑާކާ ޓްރިބިއުންގެ ރިޕޯޓުތަކުން ދައްކާގޮތުގައި، އެ ގައުމުގެ މާލީ ނިޒާމަށް ވަނީ ނުރައްކާތެރި ހާލަތެއް ކުރިމަތިވެފައެވެ. ބޭންކުތަކާއި، ބޭންކު ނޫން މާލީ އިދާރާތަކުގެ ލޯނު ޑިފޯލްޓްވުން އިންތިހާއަށް އިތުރުވެފައިވާ ކަމަށް މި ރިޕޯޓުތަކުން ދައްކައެވެ.
ޖޫން މަހުގެ ނިޔަލަށް ޑިފޯލްޓްވެފައިވާ ލޯނުތަކުގެ އަދަދު ވަނީ 6 ލައްކަ ކްރޯޑް ޓަކާއަށް އަރާފައެވެ. މީގެ އިތުރުން 3.18 ލައްކަ ކްރޯޑް ޓަކާގެ ލޯނުތަކެއް ވަނީ ކޯޓު މަރުހަލާގައެވެ. އަދި އިތުރު އެތައް ލޯނެއް ރައިޓްއޮފް ކޮށްދިނުމުގެ މަރުހަލާއާއި ޝަރީއަތުން މަޑު ޖައްސާލުމުގެ މަރުހަލާގައިވެސް އުޅެއެވެ. ކްރެޑިޓް އިންފޮމޭޝަން ބިއުރޯއިން މި މަޢުލޫމާތުތައް އަޕްޑޭޓްކުރުމުން، ޑިފޯލްޓް ވެފައިވާ ލޯނުގެ ޖުމްލަ އަދަދު 9 ލައްކަ ކްރޯޑް ޓަކާއަށް އަރާނެ ކަމަށް ލަފާކުރެވެއެވެ.
އޭޝިއަން ޑިވެލޮޕްމަންޓް ބޭންކް (އޭޑީބީ) އިން ވަނީ ބަނގްލަދޭޝްގެ ބޭންކިންގ ނިޒާމަކީ އޭޝިއާގެ އެންމެ ބަލި ނިޒާމު ކަމުގައި ސިފަކޮށްފައެވެ. 2024 ވަނަ އަހަރު ދޫކޮށްފައިވާ ހުރިހާ ލޯނުތަކުގެ ތެރެއިން 20.2 އިންސައްތަ ލޯނު ވަނީ ޑިފޯލްޓް ވެފައެވެ. މިއީ ކުރީ އަހަރާ އަޅާބަލާއިރު 28 އިންސައްތައިގެ އިތުރުވުމެކެވެ.
މި ހާލަތު ރަނގަޅުކުރުމަށް، ބަނގްލަދޭޝް ބޭންކުން ވަނީ ދަތި ހާލުގައި ހުރި ފަސް އިސްލާމިކް ބޭންކު އެއްކޮށް، ޔުނައިޓެޑް އިސްލާމީ ބޭންކުގެ ނަމުގައި ސަރުކާރުގެ އައު ބޭންކެއް އުފެއްދުމަށް ނިންމާފައެވެ. މި ބޭންކަށް 20,000 ކްރޯޑް ޓަކާގެ ރައުސުލްމާލު އިންޖެކްޓް ކުރެވޭނެއެވެ. މި ބޭންކުތަކުގެ ޑިފޯލްޓް ރޭޓް 48 އިންސައްތައިން 98 އިންސައްތައަށް އަރައެވެ.
އޭޑީބީން ލަފާކުރާ ގޮތުގައި 2025 ވަނަ މާލީ އަހަރުގައި ބަނގްލަދޭޝްގެ ޖީޑީޕީ 3.9 އިންސައްތައަށް އަދި 2026 ގައި 5.1 އިންސައްތައަށް ކުރިއަރާނެއެވެ. ނަމަވެސް ސިޔާސީ ހަމަނުޖެހުންތަކާއި، އިންފްލޭޝަން އަދި ޑިމާންޑް ދަށްވުން ފަދަ ކަންކަމަކީ މި ކުރިއެރުމަށް ހުރި ގޮންޖެހުންތަކެއް ކަމުގައި އެ ބޭންކުން ފާހަގަކުރެއެވެ.
