ޔަހޫދީން ހިންގާ ޓެރަރިސްޓް ސަރުކާރުގެ އިންޓެލިޖެންސް އޭޖެންސީ މޮސާޑަށް ޖާސޫސި އީރާނުގެ މީހަކު ތެހެރާނުން ދަންޖައްސދައިފިއެވެ. މިމާހާއަކީ ބަހްމާން ޗޫބިއަސްލް ނަމަކަށް ކިޔާ މީހެކެވެ. އޭނާގެ މައްޗަށް ކަނޑައެޅުނު މަރުގެ ޙުކުމް އީރާނުން ވަނީ ތަންފީޒުކޮށްފައެވެ. މިއީ ޖޫން މަހު އިޒްރޭލާއި އެމެރިކާއިން އީރާނާ ދެކޮޅަށް ހިންގި އުދުވާނީ ހަމަލަތަކުގެ ފަހުން، ޔަހޫދީންނަށް ޓަކައި ޖާސޫސީ ކުރުމުގެ ދަޢުވާގައި މަރުގެ ޙުކުމް ތަންފީޒު ކޮށްފައިވާ 10 ވަނަ މީހާއެވެ.
އީރާނުގެ ޝަރުޢީ ދާއިރާގެ ރަސްމީ ނޫސް އޭޖެންސީ މީޒާންގެ ރިޕޯޓެއްގައި ބުނެފައިވާ ގޮތުން، ޗޫބިއަސްލްއަކީ އީރާނުގެ ސަރުކާރުގެ ޑޭޓާބޭސްތަކަށް ފޭދިގަނެ ގައުމީ ޑޭޓާ ސެންޓަރުތަކަށް ހަމަލަ ދީ، މައުލޫމާތުން ވައްކަން ކުރި މީހެކެވެ. އޭނާގެ މައްޗަށް "ބިމުގައި ފަސާދަ އުފެއްދުމުގެ" ދަޢުވާ ކޮށް ފައި ވެއެވެ. އަދި އޭނާއަށް ދަށުން އިއްވާފައިވާ ޙުކުމް ބޮޑު ކޯޓުން ވަނީ ދަމަހައްޓާފައެވެ.
މި މަހުގެ ކުރީކޮޅު، މިފަދަ އެހެން ތުހުމަތުތަކެއްގައި ބާބަކް ޝަހްބާޒީ ނަމަކަށް ކިޔާ މީހަކަށްވެސް މަރުގެ ޙުކުމް ތަންފީޒުކޮށްފައިވެއެވެ. އިންސާނީ ޙައްޤުތަކަށް މަސައްކަތްކުރާ ޖަމާޢަތްތަކުން ބުނެފައިވާ ގޮތުގައި، ޝަހްބާޒީއަކީ އުކްރެއިންއަށް ހަނގުރާމައިގައި އެހީތެރިވުމަށް ދާ މީހުން ފޮނުވުމުގެ މަސައްކަތުގައި އުޅުނު މީހެކެވެ.
ޖޫން މަހު ޔަހުދީންނާއި ޔަހޫދީންގެ ޒަޔަނސިްޓް ޕްރޮގްރާމަށް ވާގިވެރިވާ އެމެރިކާއިން ކުރިއަށް ގެންދިޔަ 12 ދުވަހުގެ ހަނގުރާމައިގައި ޔަހޫދީ ޒަޔަނިސްޓުން ވަނީ އީރާނުގެ ޖެނެރަލުންނާއި، ނިއުކްލިއަރ ސައިންޓިސްޓުން ޝަހީދުކޮށް އާންމުން ދިރިއުޅޭ ސަރަޙައްދުތަކަށް ޓެރަރިސްޓް ޙަމަލާދީ ފައެވެ. މި ހަނގުރާމައިގައި އެމެރިކާއިން ޓެރަރިސްޓް އިޒްރޭލަށް އެހީތެރިވެދީ، އީރާނުގެ ނިއުކްލިއަރ ތަންތަން ގޮއްވާލަން އުލެފައި ވެއެވެ. އެމްނެސްޓީ އިންޓަނޭޝަނަލްގެ ރިޕޯޓުގައި ބުނެފައިވާ ގޮތުން، މި ހަނގުރާމައިގައި މަދުވެގެން 1,100 އީރާނު ރައްޔިތުން ޝަހީދުކޮށްފައި ވާނެއެވެ.
