އެމެރިކާގެ މަޝްހޫރު ހާވަޑް މެޑިކަލް ސްކޫލްގެ ލޮންގްވުޑް ކެމްޕަސްގައި ހުންނަ ގޯލްޑެންސަން އިމާރާތުގައި ހޮނިހިރު ދުވަހުގެ ފަތިހުގެ ވަގުތެއްގައި ބާރުގަދަ ގޮވުމެއް ގޮވައިފިއެވެ. މި ހާދިސާއާ ގުޅިގެން ސަރުކާރުގެ އިދާރާތަކުން ވަނީ އަވަސް ފިޔަވަޅުތަކެއް އަޅާފައެވެ. މި ހާދިސާގައި އެއްވެސް މީހަކަށް އަނިޔާއެއް ލިބިފައި ނުވި ނަމަވެސް، އޮފިޝަލުން ބުނަނީ މި ގޮވުމަކީ ގަސްތުގައި ބަޔަކު ގޮއްވާފައިވާ ގޮއްވުމެއް ކަމަށެވެ.
މެންދަމު 3:00 ޖެހުމުގެ ކުޑައިރުކޮޅެއް ކުރިން، އިމާރާތުގެ ހަތަރު ވަނަ ފަންގިފިލާގައި ގޮއްވާލި މައްސަލަ އެފްބީއައިއިން ވަނީ ސީރިއަސް މައްސަލައެއްގެ ގޮތުގައި ތަހުގީގު ކުރަން ފަށާފައެވެ.
ހާވަޑް ޔުނިވަރސިޓީގެ ފުލުހުން ބުނި ގޮތުގައި، އެ ސަރަހައްދުން ދެ މީހަކު ފިލާފައިވާތަން ފެނިފައިވެއެވެ. ކެމްޕަސްގެ ފުލުހަކު އެ ދެ މީހުން ހުއްޓުވަން މަސައްކަތް ކުރި ނަމަވެސް، އެކަން ކާމިޔާބުވެފައެއް ނުވެއެވެ.
ބޮސްޓަން ފަޔަރ ޑިޕާޓްމަންޓުން ވަނީ އިމާރާތް އެއްކޮށް ބަލާ ފާސްކޮށްފައެވެ. އެތަނުން އިތުރު ގޮވާ އެއްޗެއް ފެނިފައެއް ނުވެއެވެ.
