ދުނިޔޭގެ ވިޔަފާރިއާއި ބެންކު މުއާމަލާތްތަކުގައި އެމެރިކާ ޑޮލަރަށް ބަރޯސާވާ މިންވަރު ކުޑަކުރުމަށް ގިނަ ޤައުމުތަކަކުން މަސައްކަތް އަވަސްކޮށްފައިވާ ތަން ފެށިފައިވާކަމަށް އިޤްތިޞާދީ ތަޖުރިބާކާރުން ބުނެއެވެ. މިއީ ދުނިޔޭގެ މާލީ ނިޒާމަށް ބޮޑެތި ބަދަލުތަކެއް ގެނެސްފާނެ ކަމެއް ކަމަށް ވެސް އެނަލިސްޓުން ލަފާކުރެއެވެ.
މިފަހަކަށް އައިސް، ދުނިޔޭގެ އިޤްތިޞާދުގައި ބާރަކަށް ވަމުންދާ ޤައުމުތަކުގެ މެދުގައި ހަކަތައާއި މުދާ ބަދަލުކުރުމުގެ މުޢާމަލާތްތައް ވަނީ އެ ޤައުމުތަކުގެ އަމއްލަ ފައިސާއިން ހަމަޖެއްސުމަށް އެއްބަސްވުންތައް ހަދަން ފަށާފައެވެ. އަދި ސަރަޙައްދީ ގައުމުތަކުގެ މެދުގައި ސަރަހައްދީ ނިޒާމެއްގެ ދަށުން މުދަލާއި ޚިދުމަތަށް ފައިސާ ދެއްކުމުގެ ނިޒާމުތައް ފުޅާކުރަމުން ދިއުމަކީ މި ބަދަލުގެ މުހިންމު ހެއްކެކެވެ. މިއީ ބައެއް ފަރާތްތަކުން ސިފަކުރާ ގޮތުގައި ދުނިޔޭގެ މާކެޓްތަކުން ޑޮލަރަށް ބަރޯސާ ވުމާއި ޑޮލަރުގެ ބާރު ކުޑަވާން ފެށުމުގެ ހެއްކެކެވެ. މާނައަކީ މިއީ "ޑީ-ޑޮލަރައިޒޭޝަން"ގެ ޓްރެންޑެކެވެ.
އޭޝިއާއިން ފެށިގެން ލެޓިން އެމެރިކާއާ ހަމައަށް ތަފާތު ގައުމުތަކުގެ މަރުކަޒީ ބޭންކުތަކުން ވަނީ ރަނުގެ ރިޒާވްސް އިތުރުކޮށް، ބޭރު ފައިސާގެ ރިޒާވްސް ތަފާތުކޮށްފައެވެ. މީގެ އިތުރުން، ބްރިކްސްގެ ގައުމުތަކުން ވަނީ މުދަލަށް ފައިސާ ދެއްކުމާއި މުއާމަލާތްތަކުގައި ޑޮލަރު ނޫން ގޮތެއް ހޯދުމާ ބެހޭ މަޝްވަރާތައް ކުރިއަށް ގެންގޮސްފައެވެ.
އިޤްތިޞާދީ މާހިރުން ބުނަނީ އެމެރިކާގެ މާލީ ބާޒާރާއި ނުފޫޒުގެ ސަބަބުން ޑޮލަރަކީ އަދިވެސް ދުނިޔޭގައި އެންމެ ބޮޑަށް ބޭނުންކުރެވޭ އަދި އެންމެ އިތުބާރު ހުރި ފައިސާކަމުގައިވީ ނަމަވެސް، މިހާރު ކަން މިދާގޮތުން ދައްކުވައިދެނީ އިސްތިރާޖީ އަދި ސިޔާސީ ގޮތުން އެމެރިކާ ފަހަތަށް ޖައްސާލާ މަންޒަރެވެ.
