ވެލާނާ އިންޓަނޭޝަނަލް އެއާޕޯޓުން (ވީއައިއޭ) ބޮޑު އަދަދެއްގެ ޑޮލަރުތަކެއް ފޭރުނު މައްސަލާގައި ހައްޔަރުކުރި އަށް މީހުންގެ މައްޗަށް ދައުލަތުން ދައުވާ އުފުލައިފިއެވެ. މި ހާދިސާއަކީ މިދިޔަ އަހަރުގެ އޮކްޓޫބަރު މަހުގެ ތެރޭގައި ހިނގާފައިވާ ސީރިއަސް މައްސަލައެކެވެ.
މިދިޔަ އަހަރުގެ އޮކްޓޫބަރު މަހުގެ 27 ވަނަ ދުވަހުގެ ފަތިހު 4:45 ހާއިރު ހިނގި މި ހާދިސާގައި، މޫނު ނިވާކޮށްގެން ތިބި ބަޔަކު ވަނީ ބޭންކް އޮފް މޯލްޑިވްސް (ބީއެމްއެލް) ގެ ފައިސާ ބްރީފްކޭހެއް ފޭރިގެންފައެވެ. މި ފޭރުން ހިންގާފައިވަނީ އެއާޕޯޓުގެ ބާ ޓާމިނަލާއި އާ ޓާމިނަލް ގުޅުވައިދޭ ވޯކްވޭގެ ތެރެއިންނެވެ.
މި މައްސަލައާ ގުޅިގެން ފުލުހުން ކުރިއަށް ގެންދިޔަ ތަހުގީގަށްފަހު އެކި ފަހަރު މަތިން ޖުމްލަ އަށް މީހަކު ވަނީ ހައްޔަރުކޮށްފައެވެ. މި މައްސަލައިގައި ދައުވާ އުފުލާފައިވާ މީހުންގެ ތެރޭގައި ހިމެނެނީ: ޢަބްދުލްއައްވަލް އިބްރާހީމް އަބޫބަކުރު (27އ)، އަޙްމަދު މާޙިދު (44އ)، ޢަލީ އަފްޒަލް (21އ)، މާޒިން މޫސާ (25އ)، އަޙްމަދު ރައިހާން ނަޢީމް (20އ)، އިބްރާހީމް އަނޫފް (24އ)، ޙުސައިން ޝަހުދު (30އ) އަދި އސްމާޢީލް ސިރްޙާން (30އ) އެވެ.
މި މައްސަލައިގައި ހިމެނޭ މީހުންނަކީ ރާއްޖޭގެ އެކި ރަށްރަށަށް ނިސްބަތްވާ މީހުންނެވެ.، އޭގެ ތެރޭގައި ގއ. ވިލިނގިލި، ތ. ވިލުފުށި، ސ. ހިތަދޫ، ލ. މާވަށް، މާލެ، ކ. ގުރައިދޫ އަދި ރ. މަޑުއްވަރީގެ މީހުން ހިމެނެއެވެ.
