ހިފާފައިވާ ހުޅަނގު އައްސޭރީގައި ފަލަސްތީނުގެ ރައްޔިތުންނާ ދެކޮޅަށް ޔަހޫދީ މުޑުދާރު ސެޓްލަރުން ހިންގާ ހަމަލާތަކުގައި އިޒްރޭލުގެ ސަރުކާރާއި ސަލާމަތީ ބާރުތަކުގެ ސީދާ ބައިވެރިވުން އެބައޮތް ކަމަށް އދ. ގެ އިންކުއަރީ ކޮމިޝަނުން ހާމަކޮށްފިއެވެ.
ތަހުގީގުގެ މުހިންމު ހޯދުންތައް:
- ސަލާމަތީ ބާރުތަކުގެ އެހީ: ރިޕޯޓުގައި ބުނާ ގޮތުން، ފަލަސްތީނުގެ ރައްޔިތުންނަށް ހަމަލާދީ، އެމީހުންގެ ބިންތަކުން ނެރެލުމަށް ސެޓްލަރުން ހިންގާ ހަރަކާތްތަކުގައި އިޒްރޭލުގެ ސަލާމަތީ ބާރުތަކުން ދަނީ އެމީހުންނަށް ރައްކާތެރިކަން ދީ، ހަމަލާތަކުގައި ބައިވެރިވަމުންނެވެ.
- ހަމަލާތައް އިތުރުވުން: 2023 ވަނަ އަހަރާ އަޅާބަލާއިރު، ފަލަސްތީނުގެ އަވަށްތަކަށާއި ދަނޑުބިންތަކަށް ދޭ ހަމަލާތައް 130 އިންސައްތަ އިތުރުވެފައިވެއެވެ. މީގެ ތެރޭގައި މޫނު ނިވައިކޮށްގެން ތިބި ގްރޫޕްތަކުން ހިންގާ ހަމަލާތައް ގިނަކަން ފާހަގަކުރެވިފައިވެއެވެ.
- ކުޑަކުދިންނަށް ކުރާ އަނިޔާ: ކޮމިޝަނުން ވަނީ ފަލަސްތީނުގެ ކުޑަކުދިންނަށް ސެޓްލަރުން އަނިޔާކޮށް، ރަހީނުކޮށް، ގަސްގަހާގެހީގައި ބަނދެފައި ބަހައްޓާފައިވާ ބިރުވެރި ހާދިސާތައް ވެސް ލިޔެކިޔުމުން ރިކޯޑުކޮށްފައެވެ.
- ޖިންސީ ފުރައްސާރަ: ފަލަސްތީނުގެ އަންހެނުންނަށް ބިރުދެއްކުމުގެ ގޮތުން ސެޓްލަރުން ޖިންސީ ފުރައްސާރައާއި އިންޒާރު ދޭ ކަމަށް ރިޕޯޓުގައިވެއެވެ.
ގާނޫނީ ގޮތުން އޮތް ހާލަތު:
ބައިނަލްއަގުވާމީ ގާނޫނުތަކާއި ބައިނަލްއަގުވާމީ ކޯޓުތަކުން ދެކޭ ގޮތުގައި، ހުޅަނގު އައްސޭރީގައި އިޒްރޭލުން އާބާދުވެފައިވާ ސެޓްލްމަންޓްތަކަކީ ގާނޫނާ ޚިލާފު ތަންތަނެވެ. އދ. ގެ ކޮމިޝަނުން ފާހަގަކުރާ ގޮތުގައި، މި ހަމަލާތަކަކީ އިޒްރޭލުގެ ރަސްމީ ސިޔާސަތުތައް ހިންގުމަށް ބޭނުންކުރާ ވަސީލަތެކެވެ. މީގެ ސަބަބުން އިޒްރޭލުގެ ސިފައިންނާއި ސެޓްލަރުންގެ ތަފާތު ކުރުމެއް ނެތް މިންވަރަށް މިހާރު ވަނީ އަމަލުތައް ގުޅިފައެވެ.
