ބަންގްލަދޭޝްގެ ބޮޑުވަޒީރު ތާރިގު ރަހްމާން، މެލޭޝިއާ އަދި ޗައިނާއަށް ރަސްމީ ދަތުރުފުޅެއް ފެށުމަށް ހަމަޖެހިއްޖެއެވެ. މި ދަތުރުފުޅަކީ ބަންގްލަދޭޝްގެ އިގްތިސާދީ ގުޅުންތައް ބަދަހިކުރުމާއި، ބޭރުގެ އިންވެސްޓްމަންޓުތައް ހޯދުމުގެ އިތުރުން ގުޅުންތައް އިތުރަށް ހަރުދަނާ ކުރުމަށް ކުރައްވާ މުހިންމު ޑިޕްލޮމެޓިކް ފިޔަވަޅެކެވެ.
މި ދަތުރުފުޅުގެ ތެރެއިން ޗައިނާއާއެކު 15 އާއި 17 އާ ދެމެދުގެ އަދަދަކަށް އެއްބަސްވުންތަކުގައި ސޮއިކުރާނެ ކަމަށް ބެލެވެއެވެ. މީގެ ތެރޭގައި އެއްބަސްވުންތަކާއި، ފަހުމުނާމާތަކާއި، އަމަލީ ޕްލޭންތައް ހިމެނެއެވެ. ބަންގްލަދޭޝްގެ ފޮރިން ސެކްރެޓަރީ އާސަދު އަލަމް ސިޔާމް ވިދާޅުވި ގޮތުގައި، މި ދަތުރުފުޅުގައި ޓީސްޓާ މަޝްރޫއާ ގުޅޭގޮތުން ވެސް މަޝްވަރާ ކުރެވޭނެއެވެ.
-
ބޮޑުވަޒީރު މާދަމާ މެލޭޝިއާގެ ކުއަލަލަމްޕޫރަށް ފުރާވަޑައިގަންނަވާނެއެވެ. މި ދަތުރުފުޅުގައި ވިޔަފާރިއާއި، މަސައްކަތްތެރިންގެ ދާއިރާއިން ގުޅުން ބަދަހިކުރުމަށް ހާއްސަ އިސްކަމެއް ދެވޭނެއެވެ.
-
މެލޭޝިއާގެ ދަތުރުފުޅަށްފަހު، ހޯމަ ދުވަހު މެންދުރުފަހު ބޮޑުވަޒީރު ޗައިނާއަށް ފުރާވަޑައިގަންނަވާނެއެވެ. ޗައިނާގެ ދާލިއަންގައި ބާއްވާ ވޯލްޑް އިކޮނޮމިކް ފޯރަމްގެ "ސަމަރ ދާވޮސް ފޯރަމް" ގައި ބައިވެރިވެވަޑައިގަންނަވާނެއެވެ.
-
ޗައިނާގެ ބޮޑުވަޒީރު ލީ ޗިއަންގް އާއި، ރައީސް ޝީ ޖިންޕިންއާ ބޮޑުވަޒީރު ބައްދަލުކުރައްވާނެއެވެ.
މިއީ މި އަހަރުގެ ފެބްރުއަރީ މަހު ވެރިކަމާ ހަވާލުވެވަޑައިގަތުމަށްފަހު، ބޮޑުވަޒީރު ތާރިގު ރަހްމާން ކުރައްވާ ފުރަތަމަ ރަސްމީ ބޭރު ދަތުރުފުޅެވެ. މި ދަތުރުފުޅުގައި ބޮޑުވަޒީރުގެ އަރިހުގައި 27 މެމްބަރުންގެ ވަފުދެއް މެލޭޝިއާއަށް އަދި 28 މެމްބަރުންގެ ވަފުދެއް ޗައިނާއަށް ދަތުރުކުރާނެއެވެ.
