ސްޕެއިންގެ ޤައުމީ ޓީމާއި ބާސެލޯނާގެ ތަރި ލަމީން ޔަމާލް، ވޯލްޑް ކަޕްގައި ސައުދީ އަރަބިއްޔާއާ ދެކޮޅަށް ކުޅުނު މެޗުގައި ގޯލެއް ޖެހުމަށްފަހު އުފާފާޅުކުރުމުގެ ގޮތުން ކުރި "ސަޖިދައިގެ" ސަބަބުން، ސްޕެއިން އަދި ޔޫރަޕްގެ ހައްދުފަހަނަ އަޅާފައިވާ ކަނާތު ފިޔައިގެ ފަރާތްތަކުން އޭނާއާ ދެކޮޅަށް ނަސްލީ ތަފާތުކުރުމުގެ ވަރުގަދަ ކެމްޕެއިނެއް ފަށައިފިއެވެ.
ޔަމާލްއާ ދެކޮޅަށް މި ހިންގާ ކެމްޕެއިނަކީ ކުއްލިއަކަށް ފެށުނު ކަމެއް ނޫނެވެ. މީގެ ކުރިން އިނގިރޭސިވިލާތުގެ "ޓެލެގްރާފް" ނޫހުން ޔަމާލްގެ ޤައުމީ އަދި ސިޔާސީ ޚިޔާލުތަކާ ހާއްސަކޮށް ފަލަސްތީނަށް ތާއީދުކުރުމާއި ނަސްލީ ތަފާތުކުރުމާ ދެކޮޅަށް އޭނާ ދައްކާފައިވާ ވާހަކަތައް ގުޅުވައިގެން ލިޔުނު ރިޕޯޓަކުން މިކަމުގެ ބިންގާ އެޅުނެވެ.
އެ މެޗުގައި އޭނާ ކުރި ސަޖިދައަކީ، ހައްދުފަހަނަ އަޅާފައިވާ ފަރާތްތަކަށް އޭނާއާ ދެކޮޅަށް ނަސްލީ ތަފާތުކުރުމުގެ ވާހަކަތައް ފެތުރުމަށް ލިބުނު ފުރުސަތަކަށް ވަނީ ވެފައެވެ. އޭނާއާ ދެކޮޅު ކެމްޕެއިންގައި ބޭނުންކޮށްފައިވާ މައިގަނޑު ހަމަތަކަކީ:
- ދީނީ ހަމަނުޖެހުން: "ސްޕެއިންއަކީ ކްރިސްޓިއަން ޤައުމެއް، މުސްލިމް ޤައުމެއް ނޫން" ކަމަށް ބުނެ، ކުޅިވަރުގެ ތެރޭގައި މުސްލިމުންގެ ޝިއާރުތައް ފެނުމަކީ ޤައުމީ ހައިސިއްޔަތަށް ހުރި ނުރައްކަލެއް ކަމަށް ދެއްކުން.
- އާބާދީ ބަދަލުވުމުގެ ބިރު: ޔަމާލް ފަދަ ހިޖުރަކުރާ ފަރާތްތަކުގެ ދަރިން ކާމިޔާބީ ހޯދުމަކީ، ޔޫރަޕްގެ އާބާދީގެ އޮނިގަނޑު ބަދަލުކުރުމަށް ހިންގާ "ރޭވުމެއް" ކަމަށް ސިފަކުރުން.
- ޤައުމީވަންތަކަމާ މެދު ސުވާލު އުފެއްދުން: ޔަމާލްގެ މޮރޮކޯ އަދި ގިނީގެ އަސްލާއި އޭނާގެ ފަލަސްތީނަށް ތާއީދުކުރާ ހިޔާލުތައް ބޭނުންކޮށްގެން، އޭނާއަކީ "ޙަޤީޤީ ސްޕެއިން މީހެއް ނޫން" ކަމަށް ބުނެ ޤައުމީވަންތަކަމާ މެދު ސުވާލު އުފެއްދުން.
މި ހަމަލާއާ ގުޅޭ މީޑިއާ ޑިޖިޓަލް އެނަލިސިސްއިން ދައްކާ ގޮތުގައި، މި ކެމްޕެއިންގައި 2،249 އެކައުންޓަކުން ގާތްގަނޑަކަށް 6،000 ޕޯސްޓް ވަނީ ކޮށްފައެވެ. މިއީ ވަރަށް ރޭވުންތެރިކަމާއެކު ހިންގާފައިވާ އިންތިޒާމީ ކަމެއްކަން މި ހިސާބުތަކުން އެނގެއެވެ.
މި ހަމަލާތަކުން ދޭހަވަނީ، ކުޅިވަރުގެ ދަނޑުގައި ކިތަންމެ މޮޅު ކުޅުމެއް ދެއްކިޔަސް، ހައްދުފަހަނަ އަޅާފައިވާ ފަރާތްތަކުގެ ލޮލުގައި ޔަމާލް ފަދަ ނަސްލީ އަދި ދީނީ ގޮތުން ތަފާތު މީހުންނަށް އޮތް ނަޒަރު ބަދަލުނުވާ ކަމެވެ.
