އިންޑިއާގެ ހައިޑްރޮޖަން އިން ދުއްވާ ރޭލުގެ ޓެސްޓްތައް ކުރިއަށް

އިންޑިއާގެ ހަރިޔާނާ ސްޓޭޓްގެ ޖިންދް އާއި ސޮނިޕަތު ގުޅުވައިދޭ ހައިޑްރޯޖަން ބޭނުންކޮށްގެން ދުއްވާ ފުރަތަމަ ރޭލު ބޮޑުވަޒީރު ނަރެންދުރަ މޯދީ ހުކުރު ދުވަހު އިފްތިތާހު ކޮށްދެއްވައިފިއެވެ. މިއީ އަދި ދުނިޔޭގެ މަދު ގައުމުތަކެއް ބޭނުން ކުރާ ޓެކްނޮލޮޖީއެކެވެ. މިއީ ތިމާވެށްތަށް ގެއްލުންދޭ ހަކަތައާ ޚިލާފަށް ސާފު ހަކަތައިގެ ޓެކްނޮލޮޖީ ބޭނުންކުރުމުގައި އިންޑިއާގެ ރޭލު ދަތުރުގައި އެޅި ފުރަތަމަ ފިޔަވަޅެވެ.

މި ފުރަތަމަ ހައިޑްރޯޖަން ފަސިންޖަރު ރޭލު، ޖިންދް އާއި ސޮނިޕަތާ ދެމެދު އޮންނަ 89 ކިލޯމީޓަރުގެ ރޭލު ދަތުރު ގަޑިއަކު 75 ކިލޯމީޓަރުގެ ދުވެލީގައި ގާތްގަނޑަކަށް ދެ ގަޑިއިރުން ނިންމާނެއެވެ. މި ދަތުރުގައި 14 ސްޓޭޝަނަކަށް ރޭލު ހުއްޓާނެއެވެ. ނޮދަން ރޭލްވޭއިން ވަރަށް އަވަހަށް މި ރޭލުގެ ވިޔަފާރި ދަތުރުތައް ރަސްމީކޮށް ފަށާނެ ތާރީޚެއް އިއުލާން ކުރާނެ ކަމަށް ބުނއެވެ.

ޖިންދްއިން މި ރޭލުގެ ދަތުރުތައް ފައްޓަވައިދެއްވުމަށްފަހު މޯދީ ވިދާޅުވީ، "މިއަދުވެސް އަޅުގަނޑުމެން ކިޔަނީ އިންޑިއާގެ ފުރަތަމަ ރޭލު ދުވީ 1853 ގައި ބޮމްބޭ އާއި ތާނޭއާ ދެމެދު ކަމަށެވެ. ހަމަ އެފަދައިން، މުސްތަގުބަލުގައި ހައިޑްރޯޖަން ރޭލުތަކުގެ ވާހަކަ ދެކެވޭ ކޮންމެ ހިސާބަކުން، ޖިންދް، ސޮނިޕަތު އަދި ހަރިޔާނާގެ ނަންތައް އަންނާނެއެވެ."

"ރޭލުގެ ތާރީޚަށް ބަލާއިރު، 19 ވަނަ ގަރުނަކީ ސްޓީމް އިންޖީނުގެ ޒަމާނެވެ. 20 ވަނަ ގަރުނު ފާހަގަވެގެންދިޔައީ ޑީސަލް އަދި އިލެކްޓްރިކް ރޭލުތަކުންނެވެ. އަދި މިހާރު، 21 ވަނަ ގަރުނަކީ ހައިޑްރޯޖަން ރޭލުތަކުގެ ގަރުނެވެ. މިއަދު އިންޑިއާ ރޭލްވޭސްއިން މިވަނީ މި 21 ވަނަ ގަރުނުގެ ޓެކްނޮލޮޖީއާއެކު ކުރިއަށް ބޮޑު ފިޔަވަޅެއް އަޅާފައި،" މޯދީ ވިދާޅުވިއެވެ.

މި ރޭލު މައިގަނޑު ގޮތެއްގައި އުފައްދާފައިވަނީ ކުރިން ބޭނުންކުރި ޑީސަލް ޑީސަލްއިން ދުއްވި ރޭލުތަކުގެ ޑީސަލް އިންޖީނުތައް ނަގައި، އޭގެ ބަދަލުގައި ހައިޑްރޯޖަން އިލެކްޓްރިކް ޕްރޮޕަލްޝަން ސިސްޓަމެއް ހަރުކޮށްގެންނެވެ. މި ރޭލުން ދުވާލަކު ދެ ދެކޮޅު ދަތުރު ކުރާނެއެވެ. އެއީ ޖުމްލަ 356 ކިލޯމީޓަރުގެ ރާސްތާއެކެވެ. އަދި، އެ ދަތުރުތަކަށް ގާތްގަނޑަކަށް 300 ކިލޯގްރާމްގެ ހައިޑްރޯޖަން ބޭނުންވާނެއެވެ. ރޭލަށް ހަކަތަ އެޅުމަށްޓަކައި 3،000 ކިލޯގްރާމްގެ ހައިޑްރޯޖަން ރައްކާކުރެވޭ ޕްލާންޓެއް ޖިންދްގައި ވަނީ ގާއިމުކޮށްފައެވެ.

މޮދީ ވިދާޅުވީ ދުނިޔޭގައި ހައިޑްރޯޖަން ރޭލުތައް އުފެދުނުތާ އަދި މިވީ އެންމެ 7 ނުވަތަ 8 ވަރަކަށް އަހަރު ކަމަށާއި މިވަގުތު ދުނިޔޭގައި ހައިޑްރޯޖަން ރޭލު ދުއްވުމުގެ ގާބިލުކަން ލިބިފައިވަނީ އެންމެ ތިން ހަތަރު ގައުމަކަށް ކަމަށެވެ. އަދި އެ ގައުމުތަކުގައިވެސް ހައިޑްރޯޖަން ރޭލުތައް އަދި އޮތީ ފެށުމުގެ މަރުހަލާގައި ކަމަށް ވިދާޅުވިއެވެ.

3200 ހޯސްޕަވަރުގެ ބާރުމިނުގައި 10 ކޯޗުގެ ހިމެނޭ މި ރޭލުގައި އެއްފަހަރާ އެންމެ ގިނަވެގެން 2,600 ފަސިންޖަރުންނަށް ދަތުރުކުރެވޭނެއެވެ. ރޭލުގެ ސަލާމަތީ ކަންކަން ވަރުގަދަކުރުމުގެ ގޮތުން، ހައިޑްރޯޖަން ގޭސް ލީކުވާކަން ދެނެގަންނަ 15 ޑިޓެކްޓަރާއި، ހޫނު ދެނެގަންނަ 7 ޑިޓެކްޓަރުގެ އިތުރުން އަލިފާން ދެނެގަންނަ 3 ޑިޓެކްޓަރު ހަރުކޮށްފައިވެއެވެ.