ޕާކިސްތާނުގެ ދަށުގައިވާ ކަޝްމީރުގެ އިންތިޚާބުގެ ފުރަތަމަ ފިޔަވަހީގެ ވޯޓުލުން މިއަދު ކުރިއަށްދިޔައިރު، ހަމަނުޖެހުންތަކާއި އިންތިޚާބީ ގިނަ މައްސަލަތަކެއް ފެންމަތިވެއްޖެއެވެ.
ހިނގި ހާދިސާތައް:
-
މީހަކު މަރުވުން: ކޮޓްލީ ޑިސްޓްރިކްޓްގައި ހިނގި ހަމަނުޖެހުންތަކެއްގެ ތެރޭގައި ޕާކިސްތާން ޕީޕަލްސް ޕާޓީގެ ސަޕޯޓަރަކު ވަނީ މަރުވެފައެވެ. ޕާޓީގެ ފަރާތުން ތުހުމަތުކުރާ ގޮތުގައި އޭނާ މަރުވީ ޕާކިސްތާން މުސްލިމް ލީގް-ނަވާޒްގެ ކެންޑިޑޭޓް ސަރުދާރު އުމައިރު ނައީމްގެ ސަޕޯޓަރުން ބަޑިޖެހުމުގެ ސަބަބުންނެވެ.
-
ވޯޓުލުން މެދުކެނޑުން: ހަމަނުޖެހުންތަކާ ގުޅިގެން ކޮޓްލީ އާއި ބިމްބަރުގެ ބައެއް ވޯޓުލާ މަރުކަޒުތަކުގެ ވޯޓުލުން މުޅި ދުވަހަށް މެދުކަނޑާލަން ޖެހުނެވެ. ބައެއް މަރުކަޒުތަކުގައި ވޯޓު ފޮށިތައް ވަގަށް ނެގުމާއި އަލިފާން ރޯކުރުމުގެ ހާދިސާތައް ވެސް ހިނގާފައިވެއެވެ.
-
ސިޔާސީ ވާދަވެރިކަން: ވެރިކަން ކުރާ ކޯލިޝަންގެ ބައިވެރިން ކަމަށްވާ ޕީޕީޕީއާއި ޕާކިސްތާން މުިސްލިމު ލީފް ނަވާޒް އިން ދަނީ އެއް ބަޔަކު އަނެއް ބަޔަކަށް އިންތިޚާބަށް ނުފޫޒު ފޯރުވަން މަސައްކަތްކުރާ ކަމަށް ތުހުމަތު ކުރަމުންނެވެ.
އިންތިޚާބީ މާހައުލު:
މި އިންތިޚާބު ބާއްވެނީ މީގެ ހަފުތާތަކެއް ކުރިން ފެށިގެން ސަރަހައްދުގައި ކުރިއަށްދާ ނުތަނަވަސްކަމާއި މުޒާހަރާތަކުގެ ތެރޭގައެވެ. މި މުޒާހަރާތަކާ ގުޅިގެން ޕާކިސްތާން ތެހްރީކޭ އިންސާފް އިން ވަނީ އިންތިޚާބު ބޮއިކޮޓް ކޮށްފައެވެ.
ސަލާމަތީ ކަންކަން ބެލެހެއްޓުމަށް ޕާކިސްތާނުގެ ޕަންޖާބު ޕްރޮވިންސުން 14،000 ފުލުހުން ވަނީ ރުކުރުވާލާފައެވެ. މިއީ 53 ގޮނޑީގެ ލެޖިސްލޭޓިވް އެސެމްބްލީއަށް މެމްބަރުން ހޮވުމަށް ތިން ފިޔަވައްސަކަށް ބަހާލައިގެން ކުރިއަށްގެންދާ އިންތިޚާބެކެވެ. ދެވަނަ ފިޔަވަހީގެ ވޯޓުލުން އޮގަސްޓް 2 ގައި އޮންނާނެއެވެ.
