ޖުލައި 26، އަކީ، މިސްރުގެ ސިނަމާގެ ޖާދޫގަރު، މުހައްމަދު ޚާން ނިޔައުވިތާ 10 އަހަރު ފުރޭ ދުވަހެވެ. ޚާންގެ ފަންނީ ހަޔާތުގެ ވާހަކަ ދައްކާއިރު، ދިވެހިރާއްޖެއާއި އޭނާއާ ދެމެދު އޮތް ގުޅުމަކީ، މިއަދުވެސް ސިނަމާގެ ތާރީޙުގެ ސަފުހާތަކުން ފެންނަން އޮތް މުހިންމު މަސައްކަތެކެވެ.
މިސްރާއި ރާއްޖެ ގުޅިގެން 1984 ވަނަ އަހަރު އުފެއްދި ފިލްމު "ޔޫސުފް އެންޑް ޒައިނަބު" ގެ ވާހަކަ ފެށެނީ، މާލޭގެ މަގުތަކުންނާއި، ޚާންގެ ހުވަފެނީ ލޮލުން ދުށް ދިވެހި ރާއްޖޭގެ ގުދުރަތީ ރީތިކަމުންނެވެ. މިއީ ރާއްޖޭގައި މަންޒަރުތައް ނަގައިގެން އުފެއްދި، ބައިނަލްއަގްވާމީ ފުރަތަމަ ފިލްމީ މަޝްރޫއުތަކުގެ ތެރެއިން އެއް ފިލްމެވެ. މި ފިލްމު އުފެއްދުމުގެ މަސައްކަތް މާލޭގައި ކުރިއަށްދިޔައިރު، އެއީ ދިވެހި ސިނަމާގެ ކުރިމަގަށް ލިބުނު ބޮޑު އުއްމީދަކަށްވިއެވެ.
މި ފިލްމުގެ މަސައްކަތުގައި ރާއްޖެއަށް އައި މުހައްމަދު ޚާނާއި ފާރޫޤު ފީޝާވީއަށްވެސް މި ޖަޒީރާތައް ވެގެން ދިޔައީ މުޅިން އާ ދުވަހަކުވެސް އެމީހުން ތަޖުރިބާ ކޮށްފައި ނުވާފަދަ ތަޖުރިބާއަކަށެވެ. އެމީހުންނާ އެކު މި ދަތުރުގައި ބައިވެރިވި ސިނަމާ ކްރިޓިކް ނޫސްވެރިޔާ ސާމީ އައްސަލަމޯނީ މި ތަޖުރިބާތައް ޔައުމުއްސާބިއު މަޖައްލާގައި ތަފްސީލުކޮށް ދިނެވެ.
ޔޫސުފް އެންޑް ޒައިނަބްގެ ފިލްމީ މަޝްރޫއުގެ ފަހަތުގައި އޮތީ، މުހައްމަދު ޚާން އާއި ކުރީގެ ރައީސް މައުމޫން އަބްދުލްގައްޔޫމާ ދެމެދު އޮތް ގާތް އެކުވެރިކަމެކެވެ. ގާހިރާގެ އަލްއަޒްހަރު ޔުނިވާސިޓީގައި މައުމޫން ތައުލީމު ހާސިލުކުރެއްވި ދުވަސްވަރު، އެ ދެ ބޭފުޅުންގެ މެދުގައި އުފެދުނު ގާތްކަމާއި ފިލްމީ ފަންނަށް ހުރި ޝައުގުވެރިކަމުގެ ސަބަބުން، ރާއްޖޭގެ ރީތިކަން ބައިނަލްއަގްވާމީ ސިނަމާއަށް ގެނައުމުގެ ވިސްނުން ޚާން ގެންގުޅުއްވިއެވެ.
ފިލްމުގެ ވާހަކަ އާއި ތަރިން
-
ވާހަކަ: ގާހިރާގައި ލޯބީގެ ނާކާމިޔާބީއާ ކުރިމަތިލާ ޔޫސުފް، ދިވެހިރާއްޖޭގެ އެއިރުގެ ރަށްފުށުގެ އަށެއް ކަމަށްވާ ދަރަވަންދޫއަށް ދަތުރު ކުރެއެވެ. އެއިރު އެއީ މިހާރުގެ ދަރަވަންދޫއެއް ނޫނެވެ. އޭނާ އެ ރަށަށް ދަނީ އަރަބި ބަހާއި އިސްލާމީ ތައުލީމު ކިޔަވައިދިނުމަށެވެ. އެ ރަށުން ޒައިނަބު އާ ދިމާވެ، އުފެދޭ ލޯބީގެ ގުޅުމާއި، އެ ގުޅުމުގެ ތެރެއިން އުފެދޭ ސަގާފީ އަދި އިޖުތިމާއީ ހަމަނުޖެހުންތައް ފިލްމުން ފުރިހަމައަށް ދައްކުވައިދެއެވެ.
-
ތަރިން: ޔޫސުފްގެ ރޯލުން މިސްރުގެ މަޝްހޫރު ތަރި ފާރޫގް އަލްފީޝަވީ ފެނިގެންދެއެވެ. އަދި ޒައިނަބުގެ ރޯލުން ދިވެހި ބަތަލާ މަރިޔަމް ރަޝީދާ ފެނިގެންދެއެވެ. މީގެ އިތުރުން މިސްރުގެ ތަރި ލައިލާ އުލްވީ އާއި ދިވެހި ތަރިން ކަމަށްވާ މުހައްމަދު އާސިފް އަދި މުހައްމަދު ނިޒާރުގެ ހުނަރުވެރި އެކްޓިންގ ވެސް މިފިލްމުން ފެނިގެންދެއެވެ.
ސިނަމާގެ އުސްތާޒު: މުހައްމަދު ޚާންގެ ފަންނީ ދަތުރު
މުހައްމަދު ޚާން (1942–2016) އަކީ މިސްރުގެ ސިނަމާގައި ވަރަށް ތަފާތު ސިނަމާއީ ބަހުރުވައެއް ގެންގުޅުއްވި ޑައިރެކްޓަރެކެވެ. 1979 އިން 2014 އަށް އޭނާ ވަނީ 24 ފިލްމު ގެނެސްދެއްވާފައެވެ. ޚާންގެ ފިލްމުތަކަކީ ހަމައެކަނި ވިޔަފާރީގެ ވިސްނުމުގައި ހަދާފައިވާ އެއްޗެއް ނޫނެވެ؛ އެއީ މުޖުތަމައުގެ ހަގީގަތްތައް، ވަރަށް ފުންކޮށް އަދި ހިތްގައިމު ގޮތަކަށް ގެނެސްދިން ފަންނީ މަސައްކަތްތަކެކެވެ.
"ދަރުބަތު ޝަމްސް" (1979) އިން ފެށިގެން އޭނާގެ ފިލްމުތަކުން ފެނިގެންދަނީ އިންސާނީ ގުޅުންތަކާއި، މުޖުތަމައުގެ ތެރޭގައި ހާސްވެފައިވާ ފަރުދުންގެ ޝުއޫރުތަކެވެ. "އަލްޚަރީފް" (1983) އާއި "ޒައުޖަތު ރަޖުލް މުހިއްމް" ފަދަ ފިލްމުތަކަކީ މިއަދުވެސް ދުނިޔޭގެ ފިލްމީ ފާޑުކިޔުންތެރިންގެ މެދުގައި މަގުބޫލު މަސައްކަތްތަކެވެ.
ޚާންގެ ހަޔާތުގެ ފަހު ދުވަސްވަރުގެ މަސައްކަތްތަކުން، ފިލްމީ ދާއިރާއަށް އޭނާ ހުރި ލޯތްބާއި، އެކަމަށް އޭނާ ބެހެއްޓި އިހުތިރާމް ފެނިގެންދެއެވެ. އޭނާގެ އެންމެ ފަހުގެ ފިލްމު "ގަބްލަ ޒަހުމަތިއް ސައިފް" (2016) އަކީ ސިނަމާއަށް އޭނާ ވެދެއްވި އެންމެ ފަހުގެ ލޯބީގެ ހަދިޔާ ކަމަށް ގިނަ ފަރާތްތަކުން ދެކެއެވެ. މުހައްމަދު ޚާން ނިޔައުވިއިރު އޭނާ ދޫކޮށްފައި ދިޔަ ފިލްމީ ތަރިކައަކީ، މިސްރުގެ ސިނަމާގެ ތާރީހުގައި ވެސް އަބަދުމެ ދެމިހުންނާނެ ޚާއްސަ ހަނދާނެކެވެ.
