ރާއްޖޭގެ ބާޒާރުގައި އަސާސީ ތަކެތީގެ އަގު އިންތިހާއަށް އުފުލި، ބޭރު ފައިސާގެ އަގަށާއި މާލީ ދަތިކަމަށް ސަރުކާރުން ނުކުޅެދިފައިވާ ކަމަށް ބުނެ، މައި އިދިކޮޅު ޕާޓީ، އެމްޑީޕީ އިން ބޮޑު މުޒާހަރާއަކަށް ނުކުންނަން ނިންމައިފިއެވެ.
"ދަތިވެއްޖެ" ގެ ނަމުގައި ބާއްވާ މި މުޒާހަރާ އޮންނާނީ އޯގަސްޓް މަހުގެ 12 ވަނަ ދުވަހުގެ ހަވީރު 16:30 ގައި ސޯޝަލް ސެންޓަރު ކައިރިންނެވެ.
އެމްޑީޕީގެ ޗެއާޕާސަން އަދި ކުރީގެ ރައީސް މުޙައްމަދު ނަޝީދު ސޯޝަލް މީޑީއާގައި ޙިއްޞާކުރެއްވި ތަފާޞީލުތަކުން ދައްކާގޮތުގައި، މިހާރު ބާޒާރުގައި ތަކެތީގެ އަގު މައްޗަށް ދިއުމުގެ ސަބަބުން އާންމު ރައްޔިތުންނަށް ދިރިއުޅެން ވަނީ ބޮޑެތި ގޮންޖެހުންތަކާ ކުރިމަތިލާންޖެހިފައެވެ. ރައީސް ނަޝީދު ވަނީ ޑޮލަރުގެ އަގު ތިރިނުވަނީސް، ސަރުކާރުން އަސާސީ ޚިދުމަތްތަކަށް ކުރާ ޚަރަދުތައް ފިޔަވައި އެހެން އެއްވެސް އިތުރު ޚަރަދެއް ނުކުރުމަށް ގޮވާލައްވާފައެވެ.
މި އިހުތިޖާޖަކީ ރާއްޖޭގެ މާލީ ސިޔާސަތުތަކާއި، މިހާރުގެ ސަރުކާރުގެ އިޤްތިޞާދީ މެނޭޖްމަންޓާ މެދު އާންމުންގެ މެދުގައި އުފެދިފައިވާ ނުރުހުން ބޭރުކޮށްދިނުމުގެ ހަރަކާތެކެވެ.
