މައްކާގައި ޢާންމުކޮށް ބާއްވަމުން އަންނަ ޤުރުއާން ހިތުދަސްކުރުމާއި، ތަޖުވީދާއި، ތަފްސީރު ކުރުމުގެ ބައިނަލްއަޤްވާމީ ޝަރަފުވެރި މުބާރާތް "ކިންގް އަބްދުލްއަޒީޒް އިންޓަނޭޝަނަލް ޤުރުއާން ކޮމްޕެޓިޝަން" ގެ 46 ވަނަ އެޑިޝަން ފަށައިފިއެވެ. މިފަހަރުގެ މުބާރާތުގައި 133 ޤައުމަކުން 334 ބައިވެރިން ވާދަކުރާއިރު، މިއީ މި މުބާރާތުގެ ތާރީޚުގައި ވެސް އެންމެ ގިނަ ޤައުމުތަކާއި ބައިވެރިން ބައިވެރިވާ ފަހަރެވެ.
ދެ ޙަރަމްފުޅުގެ ޚާދިމު ސަލްމާން ބިން އަބްދުލްޢަޒީޒްގެ އިސްނެންގެވުމާއި ބެއްލެވުމުގެ ދަށުން، ސަޢުދީ އަރަބިއްޔާގެ މިނިސްޓްރީ އޮފް އިސްލާމިކް އެފެއާޒްއިން އިންތިޒާމުކޮށްގެން ކުރިއަށްދާ މި މުބާރާތް ކުރިއަށްދަނީ 8 ގެ ނިޔަލަށެވެ.
އަންހެނުންނަށް ޚާއްޞަ ވަކި ބައެއް
މި އަހަރުގެ މުބާރާތުގެ އެންމެ ޚާއްޞަ އެއް ކަމަކީ، ތާރީޚުގައި ފުރަތަމަ ފަހަރަށް އަންހެނުންނަށް ޚާއްޞަ ވަކި މުބާރާތަކާއި ނިންމުމުގެ ރަސްމިއްޔާތެއް މައްކާގެ ހިލްޓަން ކޮންވެންޝަން ހޮޓެލްގައި ބޭއްވުމެވެ. އަދި ފިރިހެނުންގެ ފައިނަލް ބުރުތަކާއި ނިންމުމުގެ ރަސްމިއްޔާތު އޮންނާނީ މަސްޖިދުލް ޙަރާމްގައެވެ.
މުބާރާތުގެ ބައިތަކާއި އިނާމު: މި މުބާރާތުގައި 5 ބަޔަކުން ވާދަކުރެއެވެ:
- ކިޔެވުމުގެ ހަތް ގިރާއަތާއެކު މުޅި ޤުރުއާން ހިތުދަސްކޮށްގެން ކިޔައި ދިނުން
- މުޅި ޤުރުއާން ހިތުދަސްކުރުމާއެކު އޭގެ މާނައާއި ތަފްސީރު އެނގުން
- މުޅި ޤުރުއާން ހިތުދަސްކުރުން.
- 15 ފޮތް ހިތުދަސްކޮށްފައިވުން
- ޖެހިޖެހިގެން 5 ފޮތް ހިތުދަސްކޮށްފައި ވުން
މި މުބާރާތުގެ އިނާމަށް ދޭ ޖުމްލަ ފައިސާގެ އަދަދަކީ 10.26 މިލިއަން ސަޢުދީ ރިޔާލެވެ. އެއީ ގާތްގަނޑަކަށް 2.74 މިލިއަން އެމެރިކާ ޑޮލަރެވެ. މިއީ މި މުބާރާތުގެ ތާރީޚުގައި ވެސް ދެވޭ ފައިސާގެ އެންމެ ބޮޑު އިނާމެވެ.
